Njimbo 78
78
Ndzimu ne bathu bawo
1Bhulutanani zwidiyo zwangu, imwi bathu bangu,
teedzani matama andinoleba.
2 #
Matewu 13:35
Ndowozhula nlomo wangu apa ifaniso,
ndowozumbunula masumbesumbe muna zwa ntolo,
3zwithu zwatakahwa tikazwiziba
zwatakabudziwa ndi bobatategulu bedu.
4Atitowozwisumbikila bana babo,
towozwibudza tjizekugwana tjinozha,
gudzo le mishingo ya Yahwe, ne masimba abo,
ne makaabadzo abakathama.
5Bakathama ndayo kuna Jakubo,
bakabiga nlayo mu Iziraela,
iwo wabakalaulila bobatategulu bedu
kuudiya bana babo.
6Kuti ndizo tjizekugwana tjinozha tjiizibe,
bana basathu bakazwagwa,
banowomilika bakaibudza bana babo,
7kuti ndizo babige kugalabgwe kwabo mu Ndzimu,
ne kusakangang'wa mishingo ye Ndzimu,
koga balondolodze milayo yawo,
8kuti basitongodwa benga bobatategulu babo,
tjizekugwana tjakawoma nsholo kakale tje bupanduki,
tjizekugwana tje moyo wakabe ududumwa,
tje meya yakabe isingagalebgwe mu Ndzimu.
9Baifureimi, bakabhata matati,
bakashanduka mu zhuba le ngwa.
10Abazolondolodza tjidumano tje Ndzimu,
koga bakalamba kuyendidzana ne nlayo wawo.
11Bakakangang'wa tjawakabe wathama,
ne makaabadzo awakabe wabalakidza.
12 #
Kufuluka 7:8—12:32
Mu mesho a bobatategulu babo mu Egipiti
mu ntuthu we Zoani wakashinga makaabadzo.
13 #
Kufuluka 14:21, 22 Wakapalalanya vula ye gungwa ukabapitsha mu guli,
ukathama kuti vula ime se duluthulu.
14 #
Kufuluka 13:21, 22 Masikati wakabatungamila nge gole,
ngono busiku gose ukabatungamila nge tjedza tje moto.
15Wakaphatula shongwe dzikazhuka mu tjilambanyika,
ukabang'wisa vula njinji se inodwa mu madziba akangina.
16 #
Kufuluka 17:1-7; Mbalo 20:2-13 Wakathama wobana dzikadwa mu shongwe,
ukathama kuti vula iwungile pasi se njizi.
17Koga bakadwilila beutjinyila kwakapindilila,
bepandukila Upezhugwi zhugwi bali mu tjilambanyika.
18 #
Kufuluka 16:2-15; Mbalo 11:4-23, 31-35 Bakalika Ndzimu mu mimoyo yabo
nge kushaka zojiwa zwabakabe beyemula kwazo.
19Bakalebeleka kusakanaka ngekwe Ndzimu
beti, “Apa Ndzimu ungatilulwamisila
zojiwa mu tjilambanyika kene?
20Nenguba akaloba shongwe vula ikatebukana
hwobana dzika wunga,
apa ne tjiwunga ungatipa itjobo,
kene ukapa bathu bawo nyama kene?”
21Ndizo, Yahwe bakati behwa, bakazhala bushongola,
moto wabo wakathuta wakalingisana na Jakubo,
gwadzamoyo kwabo kukalingisana Iziraela,
22ngobe bakabe basina bugalimoyo mu Ndzimu,
kakale basingagalebgwe simba lawo linotjidza.
23Ipapa Yahwe belaya zhuzhugwi,
bakazhula mikoba ye kudzimu,
24 #
Johani 6:31
bakabanisila mana kuti baje,
bakabapa thunde le kudzimu.
25Bathu bakaja tjiwunga tje batumwa be kudzimu,
bakabazhisila zojiwa zwakawanda.
26Bakathama kuti phepo ye bhezhuba
ihwuhwudze mu mazhuzhugwi,
nge simba labo bakatungamila phepo ye burwa,
27bakabadelusila pezhugwi kwabo
nyuni dzinowuluka dzili njinji se hwuluba,
dzili nyama njinji se nsetje we phili ye gungwa,
28bakathama kuti dzizhe pa bugalo gwabo,
kupoteleka mishasha yabo.
29Ngono bakaja bakaguta,
ngobe bakabapa tjabakabe beyemula kwazo.
30Koga bakati basathu bakagutsha njemulo dzabo,
zojiwa zwitji mu milomo yabo,
31bushongola gwe Ndzimu gukabamukila,
ngono ukabulaya bakasima tjose mubali,
ukalobesa bazhuzha bakakomba be Iziraela.
32Pezhugwi kwa ikoku kose bakadwilila ngotjinya.
Pezhugwi kwe makaabadzo e Ndzimu abazogalamoyo.
33Ndizo wakathama kuti mazhuba abo apele se mfemo,
ne makole abo abe mu lutjo.
34Ndzimu wakati ubabulaya, bakaushaka,
bakashandukila kuuli nge malebeswa.
35Bakakumbulukigwa kuti Ndzimu ndiwo shongwe yabo,
Ndzimu Upezhugwi zhugwi, ndzutunuli wabo.
36Koga bakashaya lebeswa mu milomo yabo,
bakaunyepela nge ndimi dzabo.
37 #
Mishingo 8:21
Mimoyo yabo inodudumwa nge kwawo,
bakabe basina malebeswa mu tjidumano tjawo.
38Ipapa iwo una ngoni,
wakazwiibhatigwa matjinyo abo,
ngono ukasibalobese,
kanjinji wakazwidziba mu kugwadza moyo kwawo,
ngono ukasimuse bushongola gwawo gose.
39Wakakumbula kuti bani, koga ba nyama, bathu koga,
phepo inopinda isingatjowoshanduka kakale.
40Ndikanjinji seni beupandukila pakati kwe shango,
kakale bakauhwisa zogwadza mu tjilambanyika!
41Bakalika Ndzimu bepaphulula kanjinji,
beshongola N'yengemali we Iziraela.
42Abazotongo kumbula simba lawo,
kene zhuba lawakabadzutunula mu tjita.
43Pawakalakidza zwilakidzo zwawo mu Egipiti,
ne matjenamiso awo mu ntuthu we Zoani.
44 #
Kufuluka 7:17-21
Wakashandula vula dze njizi dzabo dzikabe malopa,
kuti ndizo basitongong'wa mu wobana dzabo.
45 #
Kufuluka 8:20-24;
Kufuluka 8:1-6
Wakabatumila nlunda we thuzi, dzakabaluma
ne mazhula, zwakabakolomola.
46 #
Kufuluka 10:12-15
Zwiling'wa zwabo wakazwipa zwikonyana,
ne zwizwalo zwazo zwikapiwa phashu.
47 #
Kufuluka 9:22-25
Wakabulaya mizhambi yabo nge tjivulamabgwe,
mipaya ukaibulaya nge makaa.
48Wakabulaya ng'ombe dzabo nge tjivulamabgwe,
wakalobesa zwithuwo zwabo nge vula.
49Wakabaligila bushongola gunotjisa,
bushongola ne kugwadzamoyo ne buyendasi,
kuli batumwa be kudzimu banokolomola.
50Wakathamila kugwadzamoyo kwawo zila,
awuzobapitsha lufu,
koga wakalonga butjilo gwabo mu magwadzi.
51 #
Kufuluka 12:29
Wakabulaya mbano dzose dze Egipiti
bana be kutanga be simba le nthu mu mishasha ya Hamu.
52 #
Kufuluka 13:17-22
Ndizo ukatungamila bathu bawo se pkhwizi,
ukabatungamila mu tjilambanyika se zwithuwo.
53 #
Kufuluka 14:26-28
Wakabatungamila, wakabatjengeta mu mbatsha,
kuti ndizo basitje, koga gungwa gukakwididza zwita zwabo.
54 #
Kufuluka 15:17; Joshuwa 3:14-17 Wakabaswikisa ku duthu lawo lakayengemala,
ku dombo lawazwitolela nge luboko gwawo gwe luji ngokunda.
55 #
Joshuwa 11:16-23
Wakatata zwitjaba mbeli kwabo,
wakabapa shango kube lukata gwabo,
ukagadza njudzi dze Iziraela mu mizi yadzo.
56 #
Basumikilisi 2:11-15
Koga bakalika kakale bakapandukila Ndzimu Upezhugwi zhugwi,
abazolondolodza ndayo dzawo,
57bakashandukila ntome bakathama bupitipiti sa bobatategulu babo,
basingagalikebgwe se dati lakapeyama.
58Ngobe bakaukutha, bakaugwadzisamoyo nge magalo abo apezhugwi,
bakaulonga fupa nge midzimwana yabo.
59Ndzimu wakati uhwa, ukazhala bushongola,
ukalasha Iziraela tjose.
60 #
Joshuwa 18:1; Jeremiya 7:12-14; 26:6 Ukasiya bugalo gwawo guku Shilo,
nshasha wawakabe ugala pakati kwe bathu.
61 #
1 Samuele 4:4-22
Ukayisa bhokisi le simba lawo ku busungwa,
gudzo lawo ukaliyisa ku luboko gwe tjita.
62Ukaletjedza bathu bawo kubulawa nge thumo,
ukazhulila bushongola gwawo mu lukata gwawo.
63Moto wakalotesa bazhuzha babo,
baanadi babo bakasibe ne lumbo gwe ndobolo.
64Bapirisiti babo bakabulawa nge bukanu,
tjilikadzi dzabo dzikasitongobe mu tjililo.
65Ndizo She bakamuka sebanomuka mu hwope,
se mbayani wakasima ekuwa ngobe ang'wa nkumbi we zhambi.
66Wakabgwiliza zwita zwawo shule,
wakababhatisa shoni nge kusingapele.
67Wakalamba nshasha wa Josefa,
awuzoshalula ludzi gwa Ifureimi,
68koga wakashalula ludzi gwa Juda,
Dombo le Ziyoni, ilo launoda.
69Wakabaka bugalo gwawo gwakayengemala gukanga mazhuzhugwi,
se shango, iyo yawakathama kuti igale nge kusingapele.
70 #
1 Samuele 16:11, 12; 2 Samuele 7:8; 1 Zwiyitikalo 17:7 Wakashalula nlanda wawo Dafite,
wakantola ali mu matanga e pkhwizi,
71wakan'dusa mu kutjengeta pkhwizi zwele
kuti abe nlisi we bathu bawo be ludzi gwa Jakubo,
Baiziraela, lukata gwawo.
72Wakabatjengeta nge moyo wakatambunuka,
ngono wakabatungamila nge bunyambi gwe luboko gugwe.
Kalanga Bible © Bible Society of Botswana, 2008, 2018.