Njimbo 72
72
Ntembezelo wa mambo
1Imwi Ndzimu ipani mambo zila ye kusumikilisa kwakatambunuka,
nkololo we bushe mumpe ndulamo yenyu,
2kuti ndizo mambo asumikilise bathu benyu nge ndulamo,
nenge bathu benyu banosheta basumikilisiwe kwakatambunuka.
3Dzene shango ingabe ne kunyalala ikabhudilila
nenge kubona ndulamo.
4Dzene mambo bakalebelekela bashayi,
katjidza bana be basheti
kakale kapkhwapkhwata batshambilidzi.
5Dzene bathu bakamunamata zhuba ne mwedzi zwitjapenya,
mu zwizekugwana zose.
6Dzene anganga vula inona mu likulakula,
se midumbi inodilidzila shango.
7Kuti mu mazhuba awe dzene ndulamo ingawanda,
nenge kunyalala kuandame kuswikila mwedzi wafa.
8 #
Zakhariya 9:10
Dzene angabusa kudwa ku gungwa kunoti ku gungwa
ne kudwa ku gwizi kunoti ku phelelo dze shango.
9Dzene zwita zwizwe zwinganthigamila,
kakale zwita zwizwe ngazwilengudzike.
10Dzene bomambo be Tashishi
nebe zwigwizi zwikulekule banganzhisila zwipo,
dzene bomambo be Sheba
nebe Seba banganzhisila zwipo.
11Dzene bomambo bose bangawila pasi bakanthigamila,
tjaba dzose ngadzinshingile.
12Ngobe unotjidza basheti abedana,
bashayi na ibabo basina mbhatshi.
13Unohwila zogwadza ibabo basina matatabuko kakale besheta,
kakale unotjengeta matjilo e basheti.
14Mukutshambilidzwa nenge kuhwisiwa zogwadza,
unobatjidza kakale matjilo abo
anosheteka kwazo mu mesho awe.
15Dzene angatjila tjibaka tjilefu!
Dzene golide ye Sheba angaipiwa.
Dzene angatembezelegwa misi yose.
Dzene angakombolegwa nge misi yose.
16Dzene shango ingabe ne mathunde manjinji
dzene angapasula kafukidza shango;
dzene zwizwalo zwayo zwikanga zwe Lebanoni;
kakale dzene bathu bangawanda mu mizi mikulu
se bushwa gumu shango.
17Dzene zina lile lingabepo tjatjose,
tjilumbi tjitje tjilalame se zhuba.
Dzene tjaba dzose dzinga kombolegwa nge zina lile;
bathu bose banon'dana wakakombolegwa!
18Ngakukudziwe Yahwe, Ndzimu we Iziraela,
iwo koga unothama zwithu zwinotjenamisa.
19Ngakukudziwe zina lawo gulu nge kusingapele:
dzene gudzo lawo linga zhala shango yose.
Ngakujalo kakale Ngakujalo.
20Mitembezelo ya Dafite nkololo wa Jesi yapelela.
Kalanga Bible © Bible Society of Botswana, 2008, 2018.