Njimbo 71
71
Ntembezelo unokumbila butjilo gulefu
1Ndotizhila kumuli Yahwe;
thamani kuti ndisitongo bhatisiwa shoni.
2Mu bululwami gwenyu munditjidze kakale mundigwile;
munditeedze kakale munditjidze.
3Ibeni shongwe ye dizhilo langu.
Ibeni luswingo gwakasima, kuti nditjidziwe,
ngobe mu shongwe yangu kakale mu luswingo gwangu.
4Munditjidze, imwi Ndzimu wangu,
mundiduse mu simba le babi,
mu kubhakhwa nge basingazibe ndulamo kakale
bana mimoyo mikukutu mu kushinga bubi.
5Imwi She Yahwe, ndimwi kugalabgwe kwangu,
ndakagalabgwe mu muli Yahwe
kudwa mu butjetjana gwangu.
6Ndakanayila imwi kudwa mu kuzwagwa kwangu;
ndimwi makandidusa mu ntumbu wa mmeyangu.
Ndodwilila nge kumukudza.
7Ku banji ndakabe ndinga tjilema,
koga imwi mu dizhilo langu lakasima.
8Nlomo wangu uzhele kumukudza,
ne kukudza zina lenyu zhuba lose.
9Musindilashe mu nsi we kukwegula kwangu;
musindifupatile andapelegwa nge masimba.
10Zwita zwangu zolebeleka nge kwangu,
ibabo banoshaka ndibulaya banolangana.
11Banoti, “Muntatamile mu mbhate,
Ndzimu wankanlasha
akuna ungantjidza.”
12Imwi Ndzimu, musibe kule nami;
Imwi Ndzimu wangu, libilidzani kundibhatsha!
13Ibabo banonditilika nlandu
ngababhatisiwe shoni kakale banyeledziwe;
ibabo banoshaka kundihwisa zogwadza
ngabadadigwe bashayigwe hanya kunobhatisa shoni.
14Koga imi ndowodwilila ndigalabgwe,
kakale ndowodwilila ndimukudza kakale kanjinji.
15Nlomo wangu unowoleba ngekwe mishingo yenyu ye ndulamo,
ne ngekwe mishingo yenyu ye jidzo zhuba lose,
nenguba ili minji kusina tjilizanyo.
16Ndowozha ndikudza mishingo mikulu ya She Yahwe,
ndowokudza ndulamo yenyu koga.
17Imwi Ndzimu, kudwila mu butjetjana gwangu makandidiya,
ndizo ndodwilila ndikudza mishingo yenyu inotjenamisa.
18Ndizo ne mu nsi we kukwegula ne kuthunya nsholo,
imwi Ndzimu musindilashe,
kuswikila ndileba ngekwe simba lenyu gulu
mu zwizekugwana zose zwinowozha.
19Simba lenyu nenge ndulamo yenyu, imwi Ndzimu,
zoswika pezhugwi zhugwi,
imwi makathama zwithu zwikulu,
imwi Ndzimu, ndiani unonga imwi kene?
20Imwi makathama kuti ndibone kudziyidzika
kunjinji ne zogwadza zwinjinji
mowondimusa kakale;
kudwa pasi pasi kwe shango
mowondimilidzila pezhugwi kakale.
21Mowopapha kukudziwa kwangu,
mukandinyaladza kakale.
22Ndowomukudzabo nge dende
ndimukudzila kugalikabgwe kwenyu imwi Ndzimu.
Ndowomba njimbo dzinomukudza
ndilidza tjilidzo tje laya,
imwi N'yengemali we Iziraela.
23Nlomo wangu unowomimila ngoshatha
andimumbila njimbo dzinomukudza;
na iyo meya yangu yamakatjidza.
24Zhuba lose lulimi gwangu gowolebeleka
ngekwe bululwami gwe bhatsho yenyu,
ngobe ibabo bakagwisa kundihwisa zogwadza
bakabhatisiwa shoni, bakashayigwa ngoni.
Kalanga Bible © Bible Society of Botswana, 2008, 2018.