Njimbo 59
59
Ntembezelo wekutjidza balulwami mu zwita
1Mundiangule mu zwita zwangu, Ndzimu;
mundivikile muna ibabo banondigwisa.
2Mundiangule muna ibabo banoshinga bubi;
munditjidze muzwing'wamalopa.
3Nangwenu bakandilalila beshaka pedza butjilo gwangu.
Ibabo bakasima banondigwisa,
ngono kusina mmwe nlandu
kene tjibi tjabanondigwisila Yahwe,
4akuna itjo tjandakatjinya, koga banolabuka
bezwilulwamisila kundihwisa zogwadza.
Milikani, mundibhatshe kakale mubone tjinoshingikala!
5Yahwe Ndzimu we mibunga, Ndzimu we Iziraela.
Mukani mulobe zwitjaba zose;
mushaye wamasiya wa ibabo bematjenjedu
banotjenjelela kuthama bubi.
6Madekwana mamwe ne mamwe banobuya, bebukula
se mbgwa kakale beyendayenda mu nzi nkulu.
7Habajee, banobomba nge milomo yabo,
ne matama anopitsha mu milomo yabo,
banoalakana beti, “Ndiani unowotihwa?”
8Koga mobaseka, Yahwe
moseka tjaba dzose bulengwe.
9Imwi simba langu, ndowogala ndilipejo namwi;
ngobe imwi, Ndzimu, ndimwi luswingo gwakandibakilila.
10Ndzimu wangu unowondishanganidza mu ludo gwawo gusingazunguzike;
Ndzimu wangu unowothama kuti ndikunde zwita zwangu.
11Musibabulaye, pamwe bathu bakanyi kwangu bangadwa bekangang'wa;
thamani kuti badzungayile nge simba lenyu,
mubadelusile pasi, imwi She, tjivikili tjedu.
12Muthamila tjibi tje milomo yabo ne matama anodwa mu milomo yabo.
Ngababhatshigwe nge mazwikudzu abo.
Muthamila bhiso ne manyepkhwa abanoleba.
13Mubalobese nge bushongola gwenyu,
mubalobese kuswikila bepelela.
Kuti bathu bazibe kuti Ndzimu unobusa tjaba ya Jakubo
kunoti ku phelelo dze shango.
14Madekwana mamwe ne mamwe banobuya,
bebukula se mbgwa
kakale beyendayenda mu nzi nkulu.
15Banotendeleka beshaka zojiwa,
kakale bebomba ha basingawane tjinobagutsha.
16Koga ndowomba ngekwe simba lenyu;
ndowombila pezhugwi ngekwe ludo gwenyu
gusingazunguzike kuli mangwanana.
Ngobe makabe luswingo gwakandibakilila
nenge dizhilo langu mu nsi we kudziyidzika.
17Imwi simba langu, ndowomumbila njimbo dzinomukudza,
ngobe imwi, Ndzimu, mu luswingo gwakandipoteleka,
mu iwo Ndzimu unondilakidza ludo gusingazunguzike.
Kalanga Bible © Bible Society of Botswana, 2008, 2018.