Njimbo 46
46
Ndzimu unaswi
1Ndzimu i dizhilo ledu kakale i simba ledu,
i bhatsho ipejo pejo mu lubaka gwe kudziyidzika.
2Ndizo atingatje, nenguba shango ingashanduka
nenguba matombo angatetema
mu kudzongeka kwe vula ye gungwa.
3Nenguba vula ye gungwa ingawona ikatutuma mafulo,
nenguba matombo angatetema mu kudzongeka kwe vula ye gungwa.
4Kuna gwizi gwe vula inoshathisa nzi nkulu we Ndzimu,
bugalo gwakayengemala gwa iye Upezhugwi zhugwi.
5Ndzimu upakati kwe nzi nkulu, awunga tshedugwe nge tjimwe;
Ndzimu unowobhatsha nzi nkulu mu mangwanana makulu.
6Zwitjaba zwakadzongeka, ne mibuso inotetema
Ndzimu unodusa hwi lawo, shango ikanyauka.
7Yahwe we mibunga unaswi;
Ndzimu wa Jakubo i dizhilo ledu
8Izhani mubone mishingo ya Yahwe;
bonani kudziyidzika kwabakazhisa mu shango.
9Banothama kuti ngwa dzime ne kunopelela shango;
banovuna dati bakathubulila thumo
banopisa zwivikili nge moto.
10“Dzikama, uzibe kuti ndi Ndzimu!
Ndokudziwa pakati kwe zwitjaba.
Ndomilidzigwa pezhugwi mu shango.”
11Yahwe we mibunga unaswi
Ndzimu wa Jakubo i dizhilo ledu.
Kalanga Bible © Bible Society of Botswana, 2008, 2018.