Njimbo 44
44
Ntembezelo we mbakililo
1Takahwa nge dzedu zebe, Ndzimu,
bobatategulu bedu bakatibudza,
mishingo yamakashinga mu misi yabo,
mu mazhuba a ntolo.
2Imwi nge maboko enyu makatata tjaba,
koga ibo mukabadzikila,
makadziyidza njudzi,
koga ibo mukabasunungula.
3Abazotapa shango nge mathumo abo
ne tjiazha tjabo atjizobapa kukunda
koga nge tjiazha tjenyu tje luji ne luboko gwenyu
ne tjedza tje buso gwenyu,
ngoti makabashathila.
4Imwi mu mambo wangu ne Ndzimu wangu,
ndimwi munolaula kuti Jakubo akunde.
5Nge simba lenyu toligila pasi zwita zwedu,
nge zina lenyu totshambila pasi banogwa naswi.
6Ngoti anditogalabgwe mu dati langu,
kene thumo langu alinganditjidze.
7Koga makatigwila mu zwita zwedu,
mukashanganya misholo ye banotibenga.
8Todwilila tizwikudza mu Ndzimu,
kakale towoboka zina lenyu nge kusingapele.
9Koga makatilasha mukatiyisa pasi,
amuzoyenda ne babhayani bedu.
10Makathama kuti titizhe zwita zwedu,
zwita zwedu zwakatapa thundu dzedu.
11Makatithama tikanga pkhwizi dzinobhayiwa,
mukatipaladza nge zwitjaba.
12Makatengesa bathu benyu nge themba isi ye tjimwe,
kusina tjinomubuyila mu thengeso yabo.
13Makatithama sapa le babakidzani bedu,
todadigwa ndi ibabo bakatipoteleka.
14Makatithama tikabe sumo mu zwitjaba,
tabe iseko pakati kwe bathu.
15Zhuba lose ndolengudzika,
ne shoni dzandikombola,
16ngekwe matama e batukani ne badadili,
nge kubona tjita ne mbuzuludzi.
17Kose ikoku kwakadelukila mutili,
nenguba tisakamukangang'wa,
kene kuli kushandukila tjidumano tjenyu.
18Mimoyo yedu ayizoshandukila shule,
ne makumbo edu aazobhuda mu zila yenyu,
19kwamungabe makativunilila mu tjimo tje phungubgwe,
makatifukidza nge zhalima gulu.
20Ha tabe takakangang'wa zina le Ndzimu,
kene takanamata ndzimu upoga.
21Apa Ndzimu wabe usingake ukaziba ikoku kene?
Ngobe unoziba zwikohwa zwe moyo.
22 #
Baroma 8:36
Tobulawa zhuba lose nge kwenyu,
tonga pkhwizi dzinobhayiwa.
23Muzwimuse! Mulelileni, She?
Mukani, musitilashile tjose!
24Ini musumbika buso gwenyu?
Ini mukangang'wa dziyidzika kwedu
ne kutshambilidzwa kwedu?
25Tatjibhubama mu hwuluba,
mibili yedu yakakokomela pasi
26Milikani muzhe kuwotibhatsha,
mutitjidze, muthamila ludo gwenyu gusingazunguzike.
Kalanga Bible © Bible Society of Botswana, 2008, 2018.