Njimbo 25
25
Ntembezelo unokumbila bhatsho
1Ndomilidzila meya yangu kumuli Yahwe.
2Ndzimu wangu, ndogalabgwe mu muli,
musindiletje abhakhwa nge shoni.
Musiletje zwita zwangu
zwikazwikudza pezhugwi kwangu.
3Musiletjedze ibabo banogalabgwe
mu muli bakabhakhwa nge shoni.
Letjani ibabo bana yemula
dze kutjebela ba bhakhwe nge shoni.
4Mundithame ndizibe zila dzenyu Yahwe,
mundidiye zila dzenyu.
5Munditungamile mu malebeswa enyu, mundidiye,
ngoti ndimwi Ndzimu we jidzo langu;
Ndogalamoyo mu muli zhuba lose.
6Kumbulani ngoni dzenyu Yahwe,
nenge ludo gwenyu gusingazunguzike,
ngoti zwodwa kule zwili yapo.
7Musikumbule tjibi tje butjetjana gwangu,
kene kutjuluka nlayo kwangu.
Mundikumbule kuyendidzana
nge ludo gwenyu gusingazunguzike,
muthamila ndulamo yenyu Yahwe!
8Yahwe bakalulwama kakale bakatambunuka;
ndizo banodiya batjinyi zila yabo.
9Banotungamila banozwiyisa
pasi muna tjakalulwama.
Banodiya banozwiyisa pasi
kutobela zila yabo.
10Dzose zila dza Yahwe ludo ne kugalikabgwe,
kuna banotobela tjidumano ne milayo yabo.
11Ngekwe zina lenyu Yahwe,
mundizwiibhatigwe kutjinya kwangu,
ngoti kutjinya kwangu kukulu.
12Ndiani kene nthu unotja Yahwe?
Banowon'diya zila yaakafanila shalula.
13Iye unowobhudilila mu butjilo,
ne bana babe banowothuwa shango.
14Buzwalani gwa Yahwe gumuna banobatja
ngono banobathama kuti bazibe tjidumano tjabo.
15Mesho angu anogala akalinga kuna Yahwe,
ngoti banowodusa makumbo angu mu gwanga.
16Shandukilani ku ndili mundihwile ngoni,
ngoti ndimu bushoma kakale ndadziyidzika.
17Kudziyidzika kwangu kwakula,
mundiduse mu kuhwazogwadza kwangu.
18Lingani kudziyila kwangu ne kudziyidzika kwangu,
ndizo mundizwiibhatigwe jinyo langu lose.
19Bonani kuti zwita zwangu zwingapani,
nenge kuti bakandibenga kungapani.
20Tjengetani butjilo gwangu, mundiangule,
musindiletje abhatisiwa shoni,
ngoti ndotizhila kumuli.
21Dzene malebeswa ne kutambunuka
zwinganditjengeta, ngoti ndakalinga imwi.
22Ndzimu, dzutunulani Iziraela,
mu kudziyidzika kwayo kose.
Kalanga Bible © Bible Society of Botswana, 2008, 2018.