Njimbo 145
145
Lumbo gunokudza Ndzimu
1Ndowomukudza, Ndzimu wangu kakale mambo wangu,
ngono ndowokudza zina lenyu nge kusingapele kose.
2Zhuba ne zhuba ndowomukudza.
Ndowokudza zina lenyu nge kusingapele!
3Yahwe bankulukulu kakale bakafanila kudziwa kukulu kwazo,
bukulu gwabo agutolondeka.
4Tjizekugwana tjimwe tjowokudza mishingo yenyu kunoti ku tjimwe
ngono banowoleba ngekwe bukulu gwe mishingo yenyu.
5Mu bubuya ne bukulu gwe mbuso wenyu,
ngekwe mishingo yenyu inotjenamisa,
akutowondidwa mu moyo.
6Bathu banowosumikila ngekwe mishingo yenyu inotjenamisa
ngono ndowoleba ngekwe bukulu gwenyu.
7Banowolumbidza ngekwe kuandama kwe bululwami gwenyu,
kakale banombila pezhugwi ngekwe ndulamo yenyu.
8Yahwe bana ngoni ne lubu,
abatotjimbidza gwadzamoyo
kakale ludo gwabo nde gusingazunguzike.
9Yahwe bakalulwamila bose,
kakale mahwilongoni abo
amuna zose zwabakathama.
10Mishingo yenyu yose inowoboka, imwi Yahwe,
kakale bagalimoyo benyu bose banowomukudza.
11Banowoleba ngekwe gudzo le bushe gwenyu,
bebuya beleba ngekwe simba lenyu,
12kuzibisa bathu bose ngekwe mishingo yenyu mikulu,
ne gudzo le bubuya gwe bushe gwenyu.
13Bushe gwenyu bushe gusingapele,
nenge ndaulo yenyu imile kuswikila zwizekugwana zose.
Yahwe banogalikabgwe mu matama abo wose,
kakale bana ngoni mu mishingo yabo yose.
14Yahwe banosimisa bose ibabo banowa,
kakale banomisa nge makumbo bose bakatemeka mafupa.
15Mesho abose akalinga kumuli,
ngono mobapa zojiwa zwabo nge nsi wakalingisana.
16Mofumbatunula tjiazha tjenyu,
mugutsha njemulo dze zose zwinotjila.
17Yahwe bakatambunuka mu zila dzabo dzose,
kakale bana moyontjena muna zose zwabakathama.
18Yahwe bapejopejo na bose ibabo banobadana,
kuna bose banobadana nge malebeswa.
19Banoshingikadza njemulo dza bose ibabo banobatja,
kakale banohwa zwililo zwabo, ngono banobatjidza.
20Yahwe banotjengeta bose ibabo banobada,
koga banowolobesa babi bose.
21Nlomo wangu unowogala ukudza Yahwe,
ne bathu bose ngabakudze zina
labo lakayengemala nge kusingapele kose.
Kalanga Bible © Bible Society of Botswana, 2008, 2018.