Njimbo 135
135
Lumbo gunokudza
1Kudzani Yahwe!
Kudzani zina la Yahwe,
mubakudze, imwi balanda ba Yahwe,
2imwi bamile mu ng'umba ya Yahwe,
mu misha ye ng'umba ye Ndzimu wedu.
3Kudzani Yahwe, ngobe Yahwe bakalulwama,
mbilani zina labo njimbo dzinobakudza, ngobe bana ngoni.
4Ngobe Yahwe bakazwishalulila Jakubo,
iye Iziraela kube fumwa yabo.
5Ngobe ndoziba kuti Yahwe bankulukulu,
She wedu upezhugwi kwe midzimu yose.
6Tjimwe ne tjimwe Yahwe tjabanoda thama
banotjithama, kudzimu ne mu shango,
mu makungwa ne kusi tjose kwe vula.
7Ndibo banothama kuti makole amilidze ku phelelo dze shango,
banothama lipenyo gwe vula
bebe bedusa phepo mu mabiganyilo abo.
8Ndibo bakabulaya mbano dze Baegipiti
dzose dze bathu ne dze phuka
9bakazhisa zwilakidzo ne matjenamiso
pakati kuko, iwe Egipiti,
muna Faro ne balanda babe bose.
10Bakalobesa zwitjaba zwinjinji
bakabulaya bomambo bakasima,
11Sihoni, mambo we Bamori,
na Ogo, mambo we Bhashani,
ne mibuso yose ye Kanana,
12bakakoba shango yabo kube lukata
lukata gwe bathu babo Baiziraela.
13Zina lenyu, imwi Yahwe, limile nge kusingapele,
tjilumbi tjenyu, imwi Yahwe, tjoswika ku zwizekugwana zose.
14Ngobe Yahwe banowogwila bathu babo,
kakale banowohwila ngoni balanda babo.
15 #
Njimbo 115:4-8; Zumbunulo 9:20 Midzimu ye zwitjaba i siliva ne golide,
yakathamwa nge bathu nge maboko
16Ina milomo koga ayitolebeleka,
ina mesho koga ayitobona,
17ina zebe koga ayitohwa,
kakale ayina meya mu milomo yawo.
18Ibaba banoyithama
na bose banoigalabgwe
banowonga iyo.
19Imwi ng'umba ye Iziraela, kudzani Yahwe!
Imwi ng'umba ya Aroni, kudzani Yahwe!
20Imwi ng'umba ya Levi, kudzani Yahwe!
Imwi banotja Yahwe, kudzani Yahwe!
21Ngakukudziwe Yahwe mu Ziyoni
ibo bagele mu Jerusalema.
Kudzani Yahwe.
Kalanga Bible © Bible Society of Botswana, 2008, 2018.