Njimbo 102
102
Ntembezelo we ntjetjana akadziyidzika
1Ihwani ntembezelo wangu, imwi Yahwe,
tjililo tjangu ngatjiswike kumuli.
2Musindisumbikile buso gwenyu
mu zhuba le kudziyidzika kwangu.
Zhulani zebe dzenyu,
mutjimbidze kundidabila andidana!
3Ngobe mazhuba angu anopinda se busi,
mafupa angu anopisa se moto we vutho.
4Moyo wangu wakaputa wakaswaba se bushwa,
ndokangang'wa kuja zojiwa.
5Anditjina nyama ndabe mafupa woga,
ngekugomelela kwangu pezhugwi.
6Ndonga gola le tjilambanyika,
se gunda le matongo.
7Ndolala ndakalinga,
ndonga nyuni iyoga pezhugwi kwe tjilungwani tje ng'umba.
8Zwita zwangu zoshwa zwileba nge kwangu,
ibabo banondigongobola banoshingisa
zina langu kupa bhiso.
9Ndoja nlota se zojiwa,
mishodzi yangu yakashangana ne tjandinong'wa,
10ngobe kugwadza moyo kwenyu kukulu,
makandimilidza mukandiposela kutjena.
11Mazhuba angu anonga ntutshi we madekwana,
ndoswaba se bushwa.
12Koga imwi Yahwe, mugele mu bushe nge kusingapele kose,
zina lenyu loswika ku zwizekugwana zose.
13Mowomilika mukahwilangoni Ziyoni,
ngobe gwabe lubaka gwe kummilila,
lubaka gwakabigwa gwatjiswika.
14Ngobe mabgwe awo ndianodika kwazo mu balanda benyu,
kakale banohwila ngoni hwuluba yawo.
15Zwitjaba zowotja zina la Yahwe,
na bomambo bose be shango banowotja gudzo labo.
16Ngobe Yahwe banowomusa Ziyoni kakale,
banowoboneka mu gudzo labo.
17Banowodabila ntembezelo we bashayi,
abatowolingila pasi ntembezelo wabo.
18Oku ngakukwaligwe tjizekugwana tjinowozha,
kuti itjaba tjisathu tjazwagwa tjizhe tjikudze Yahwe.
19Ngobe bakalinga pasi kudwa
kudzimu ku bugalo gwabo gwakayengemala,
kudwa kudzimu Yahwe bakalinga shango,
20kuti bahwe gomela kwe basungwa,
kusunungula ibabo bakabe basumikilisigwa lufu,
21kuti ndizo balume basumikile zina la Yahwe mu Ziyoni,
nekuti likudziwe mu Jerusalema,
22ha zwitjaba zwikubungana,
ne mibuso, kunamata Yahwe.
23Bakanditema mafupa pakati kwe tjibaka,
bakanditapudzila mazhuba e butjilo.
24Ndoti, “Imwi Ndzimu wangu, musinditole
makole angu atji pakati,
makole enyu anoswika
ku zwizekugwana zose.”
25 #
Bahebheru 1:10-12
Imwi makati ntolo mukateya thiwa dze shango,
nenge zhuzhugwi nshigo we maboko enyu.
26Zowoloba, koga imwi mowogalila tjose.
Zowoshakala se tjiambalo.
Mozwilabadzana se zwiambalo, ngono zopinda,
27koga imwi monga se kwamagala muli iko,
ne makole enyu aana paanopelela.
28Bana be balanda benyu banowotjila bakavikiligwa,
bana babo banowotjilila mbeli kwenyu.
Kalanga Bible © Bible Society of Botswana, 2008, 2018.