Makungulupeswa 7
7
Jenjedzo ngekwe phombgwekadzi
1Nkololo wangu, londolodza matama angu,
kakale utjengete milayo yangu,
2londolodza milayo yangu utjile
ubhate zwidiyo zwangu ne ludo gugo gose,
3uzwisungilile mu zwinyala zwizo,
uzwikwale mu moyo uwo.
4Uti ku butjenjedu, “U hazwadzi yangu,”
udane hwisiso nzwalani wepa moyo,
5kuti ubakililike mu bamba,
fukula inoleba matama anosodzoloka.
6Ngoti ndakashozhela
nge fesitere le ng'umba yangu,
7ngono ndakabona pakati kwe basakatjenjela,
abona we tjilengwe pakati kwe bazhuzha,
8e nyenyeledza ali mu zila epinda pa ndzibo uwe
etola zila inoyenda ku ng'umba ye fukula
9kuli madekwana kwatjibhata,
mu zhalima le busiku.
10Ipapo tjinyolotjo nkadzi kanshanganidza,
akaambala se fukula, wakatjenjelela ntome.
11Nkadzi iwoyu unolebanya,
unotjutjula aatogala pasi,
12unobe mu dzizila kabe mu matengeselo,
unolalila mu ndzibo mmwe ne mwe.
13Unontshakatila e mputa,
unolebeleka akasima moyo eti kunli,
14“Ndakadusa tjipo tje mbakisano
ngono nasi ndalipa zwandakagadzabwe,
15ndizo ngwenu ndazha kukushanganidza,
ndakushaka ngono ndakuwana.
16Ndawala bulawo gwangu ne matyila mabuya,
ana mibala yakanaka e jila le Egipiti,
17ndafafayidza bulawo gwangu nge mafuta anonuhwilila,
e mira, gonde ne sinamoni.
18Buya, tishathisane nge ludo kuswikila mangwanana,
ngatizwishathise nge ludo.
19Ngobe nlume wangu aapo mu nzi,
wakatola gwendo bulefu,
20wakayenda ne hwomo ye mari,
unowobuya tjose mwedzi uli ntjena”
21Nge ndebo iye yakanaka unonkwekweredza,
ne matama awe anosodzoloka wakambhata.
22Tjinyolotjo nzhuzha unonsala shule,
se ng'ombe ikwebegwa kunobulawa,
kene se phuka yabhatshigwa,
23kuswikila thumo liipubula mabula,
se nyuni iwila mu dati,
aatoziba kuti unowolipa ne butjilo gugwe.
24Ndizo ngwenu, imwi bakololo, mundibhulutane,
kakale muteedze kwazo matama e nlomo wangu.
25Musi letje mimoyo yenyu ikapambukila ku zila dzidze,
musitongo lashikila mu zijana dzidze,
26ngobe banjinji baakaliga, baakabulaya abana mbalo.
27Ng'umba iye i zila inoyenda ka Satani,
idelukila ku ng'umba dze lufu.
Kalanga Bible © Bible Society of Botswana, 2008, 2018.