Makungulupeswa 6
6
Jenjedzo limwe
1Nkololo wangu, ha wakazwisunga kuti unowolipa ikoloto tje mbakidzani uwo,
wakagadzabgwe kubhatsha ntaya,
2ha wabhatshigwa nge matama awaleba,
wabhakhwa mu matama e nlomo uwo,
3tjithama woku, nkololo wangu kuti uzwitjidze
ngobe wabe mu simba le mbakidzani uwo,
tjimbidza unkumbile akusunungule.
4Usitongo izelela ndebo iyeyi
usitshung'ayile ne kutukununu kose,
5uzwitjidze se phala itizha mvimi,
se nyuni ipudzumuka mu luboko gwe nteyi.
6Yenda ku jenetha simbe ndiwe
ubone sekwa linoshinga, u tjenjele.
7Alina ntungamili
kene nlingili kene mbusi,
8lolulwamisa zojiwa zwalo mu zhizha
likubunganya zojiwa zwalo mu tjibaka tje kuvuna.
9Unowolala ipapo kuswikila lini, simbe ndiwe?
Unowomuka mu hwope dzidzo lini kene?
10 #
Makungulupeswa 24:33, 34 Kuyizela kushomanana, kutshung'ayila kushomanana
kufukata maboko nthu eti unonyaluluka,
11saikoko bushayi gowozha se mbava,
kusheta kukuwila se nthu wakadedela zwibhayano.
12Nthu usina nshingo, nthu mbiimbi,
unoyenda eleba ndebo dzisakatambunuka,
13eti volivoli mesho, etendeka
ne makumbo ne tjinyala tjitje,
14ne moyo usakalulwama unoluka zwakayipa,
etombelela edzwala sahwanana,
15ndizo wali unotjimbidza ngina mu mbatsha,
mu tjibakanyana unowogwala gusina ndapo.
16Kuna zwithu zwitathatu zwinobengiwa ndi Yahwe,
zwili kutendeka zwabanoshima,
17mesho ana mazwikudzo, lulimi gunonyepa,
ne maboko anotebula lopa lisina nlandu,
18moyo unoluka mano mabiibi,
makumbo anolabuka elibilidzila kunotjinya
19ne nyepi unopa butendeki gwe manyepkhwa
ne nthu unogwisanya bana be nthu.
20Nkololo wangu, londolodza nlayo wa tate babo,
kakale usilashe zwidiyo zwa mme babo.
21Zwigale mu moyo uwo mu zwibaka zose,
uzwisungile mu ntshibha uwo.
22Ha uyenda zowokutungamila,
ha uizela zowokulinda,
kakale ha umuka zowolebeleka nawe.
23Ngobe nlayo luvone kakale zwidiyo i tjedza,
ne kutjemegwa mu butjilo nlenje we butjilo,
24kukubakilila mu nkadzi mbiimbi,
ungakutjebela nge lulimi gwe bubamba.
25Usitongo yemula bubuya gugwe,
usi nletje akakuweba nge mesho awe,
26ngobe fukula inotengwa nge tjiwunga
koga phombgwekadzi inolonga bushayi butjilo gwe nlume.
27Apa nthu ungasenga moto ne hapkhwa,
ukasi mpisile zwiambalo kene?
28Kene nthu ungayenda mu masimbe anopisa
makumbo awe akasitshwe kene?
29Kwakajalo koga ne nthu unowalilana ne nkadzi we mbakidzani uwe,
akuna unonbhata ungasalobgwa shamu.
30Apa bathu abatolingila pasi mbava
inokwiba kuzwigutsha ha ina zhala kene?
31Koga ha ibhakhwa, inowolipa katendeka,
inowolipa nge thundu yose yainayo.
32Iye unothama bupombgwe aana njalakang'wa,
iye unothama ikoko unozwibulaya.
33Mbonje ne shoni ndizo zwaanowowana
ne kulengudzika kukwe akutowofa kwapela.
34Ndandala inothama kuti nlume abe ne bushongola
kakale aatowoshalula ha ebgwilizila.
35Aatowoamutjila ndipo
kene kushathisiwa nge zwipo zwinjinji.
Kalanga Bible © Bible Society of Botswana, 2008, 2018.