Makungulupeswa 4
4
Mbuyilo ye butjenjedu
1Imwi bakololo, ihwani kudiya kwa tate benyu,
mu bhulutane, kuti mube ne hwisiso,
2ngobe ndomupa zwidiyo zwibuya
musilashe zwidiyo zwangu.
3Ndakati ndili nkololo wa tate bangu,
nditji ntjetjana, ndili ndoga mwana muna mme,
4tate bakandidiya beti kundili,
“Moyo uwo ubhate matama angu
londolodza milayo yangu, utjile.
5Usikangang'we, kakale usifupatile matama e nlomo wangu.
Wana butjenjedu, uwane hwisiso.
6Usitongolasha butjenjedu, gowokutjengeta
ugude gowokulinda.
7Kutangisa kwe butjenjedu ndi woku, wana butjenjedu
na kose kwaunga wana, uwane hwisiso.
8Ugukudze, gowokumilidzila pezhugwi
gowokukudza ha unga gugumbatila.
9Gowokubigila tjiala tjakanaka mu nsholo uwo
guka kuambadza tjiala tje bubuya.”
10Undihwe nkololo wangu, ngono uamutjile matama angu
kuti makole e butjilo gugo abe manjinji.
11Ndakudiya zila ye butjenjedu
ndakutungamilila mu zila dzakatambunuka.
12Ha uyenda, thambo dzidzo akuna tjingadzipinganyidza
kakale ha ulabuka, autowokuthiwa ne tjimwe.
13Ubhate ndayo yangu, usitongoilasha
uitjengete, ndigo butjilo gugo.
14Usingine mu zila ye babi
usiyende muzila ye bakabipa.
15Usibe ne hanya nayo, usiitobele,
uileye uyende kwaunoyenda.
16Ngobe abangayizele basathama tjimwe tjakabipa;
abangadzibone hwope kusina wabatjinyila.
17Banoja zojiwa zwe mbipo
be ng'wa nkumbi we phipiti.
18Zila ye bakalulwama inonga tjedza tje mazhokuyedza
tjinopaphidzika kuswikila masikati makulu.
19Zila ye bathu babi inonga zhalima lakatizwititi,
abatoziba tjingabakutha muili.
20Nkololo wangu, bhulutana matama angu,
teya zebe muna zwandinoleba.
21Asitongodwa mu mesho awo,
uabhate nge moyo uwo.
22Ngobe ndigo butjilo muna unoawana,
i bhodzo mu mbili uwe.
23Tjengeta moyo uwo nge butjenjedu,
ngobe kudwa muuli kowunga hwoba dze butjilo.
24Dusa ndebo dzakaleyana mukuli
uduse ndebo dzakabipa mu nlomo uwo.
25Mesho awo ngaalinge mbeli,
mesho awo alinge kwaunoyenda.
26 #
Bahebheru 12:13
Yelanjele zila yaunotshamba muili,
ngono zila dzidzo dzose dzowotambunuka.
27Usitongo pambukila kuluji kene ku lumeshwe,
tshedusa gumbo lilo muna zwakabipa.
Kalanga Bible © Bible Society of Botswana, 2008, 2018.