Makungulupeswa 23
23
1Ha ungagala pasi u ja ne mbusi,
uyele njele tjimbeli kuko,
2ubige mpanga pa hwulo dzidzo
ha uli nthu unoda ja kwazo.
3Usiyemule zwinamunamu zwizwe,
nekuti zojiwa zwinotjebela.
4Usitongo zwinyadza nge kushaka fumwa,
tjenjela uzwidzibe mu nkumbulo uwoyo.
5Ha uyilashila mesho awo, ibile ya yenda,
tjinyolotjo ya milidza mapapilo,
iwuluka se dzu liwulukila zhuzhugwi.
6Usije zojiwa zwe nthu unonyimana,
usiyemule zwinamunamu zwizwe,
7ngekuti unonga zwaanoalakana mu moyo.
Unokudwa eti “Ija u ng'we!”,
Koga moyo uwe usinga jalo.
8Unowothwa kushomanana kwawaja,
ukabe wazanisa matama awo mabuya.
9Usilebelekele mu zebe dze tjilengwe,
ngobe unowolingila pasi butjenjedu gwe matama awo.
10Usi duse n'gathu wa ntolo,
kene ukangina mu minda ye siyang'wa,
11ngobe Ntjidzi wabo wakasima;
unowobamilila mu ndebo dzabo nawe.
12Moyo uwo ngawude kulayiwa,
ne zebe iyo iteedze matama e luzibo.
13Usiletjedze kutjemela mwana,
ha unloba nge shamu, aangafe.
14Ha unloba nge shamu
unogwila kuti asingine mu lufu.
15Mwanangu, ha moyo uwo wakatjenjela,
moyo wangu unowoshathabo.
16Meya yangu inowopembela,
ha nlomo uwo uleba tjakalulwama.
17Moyo uwo usitongo yemula batjinyi,
koga dwilila mu kutja Yahwe zhuba lose.
18Malebeswa wose mbhayilo uyapo
ne kugalabgwe kuko akutowothubugwa.
19Ihwa mwanangu, kakale u tjenjele,
kakale ulonge moyo uwo mu zila yakatambunuka.
20Usibe mmwe we banogungila nkumbi we zhambi,
kene pakati kwe magovu baji be nyama;
21ngobe tjidakwa ne govu banowobe bashayi,
ne hwope dzowombadza nthu makandana.
22Teedza tate babo bakakuzwala,
kakale usilingile mmeyabo pasi ha batjikwegula.
23Tenga lebeswa, usitongo litengesa,
tenga butjenjedu, ndayo ne hwisiso.
24Tate be wakalulwama banowoshatha kwazo,
iye unozwala nkololo wakatjenjela unowonshathila.
25Tate babo na mmeyabo ngabashathe,
nkadzi wakakuzwala ngaashathe.
26Nkololo wangu, undipe moyo uwo,
ne mesho awo ngaabone zila dzangu.
27Ngekuti fukula i gomba lakangina,
ne bamba i tshime lakamanikana.
28Unolalila se ntoleli
epaphidza kusagagwabgwe mu balume.
29Ndiani una mbatsha? Ndiyani una buyendasi?
Ndiyani una phipiti? Ndiyani unong'ong'ola?
Ndiyani wakadusigwa mbonje suli?
Ndiyani una mesho mashabashaba?
30Ndiibabo banogalisa mu nkumbi we zhambi,
ndiibabo banoyenda beshaka nkumbi we zhambi wakashanganyiwa.
31Usilinge nkumbi we zhambi ha uli nshaba,
ha ubayima mu bhepe,
usodzoloka mu hwulo.
32Gwe bupelo unoluma se nyoka,
unoluma se thumbi.
33Mesho awo anowobona mazhangaladzimu,
ne nkumbulo uwo unowoleba mazhuluzhulu.
34Unowonga nthu wakayizela mu gungwa
kene nthu wakayizela pezhugwi kwe bhango le ikepe.
35Unowoti, “Bakandiwomba, koga andizokubala,
bakandiloba, koga andizohwila.
Ndowomuka lini?
Ndowoshaka kung'wa kakale?”
Kalanga Bible © Bible Society of Botswana, 2008, 2018.