Makungulupeswa 21
21
1Moyo wa mambo lukoba gwe vula gumu luboko gwa Yahwe;
banogushandulila kumwe ne kumwe kwa banoshaka.
2Zila imwe ne imwe ye nthu yakalulwama mu kubona kukwe,
koga Yahwe banokala moyo.
3Kuthama ndulamo ne kutambunuka,
koamutjilika kuna Yahwe kupinda tjibhayilo.
4Mesho anozwikudza ne moyo unozwida
luvone gwe babi, zwibi.
5Mano ebana moyonlefu nge lebeswa anotungamilila ku mbuzilo,
koga bose bana phupu bano wana bushayi.
6Kuwana fumwa nge lulimi,
konga busi gunopinda kakale i dati le lufu.
7Phipiti ye babiibi inowobatshwayilila kutjena,
ngobe banolamba kuyita tjakatambunuka.
8Zila ye nthu una nlandu yakaleleka,
koga mazwibhato e nthu mbuyanana akalulwama.
9Ku koyita kwazo kugala mu ndzibo we denga le ng'umba,
pana kugala mu ng'umba ina nkadzi una zhoba.
10Meya ye mbiimbi inoda zwibiibi,
n'galidzani naye aatobona ngoni mu mesho awe.
11Ha unodada e lobgwa shamu, tjilengwe tjotjenjela,
ha ntjenjedu elayiwa, unowana luzibo.
12Nlulwami unolingisisa ng'umba ye mbiimbi,
kaligila mbiimbi mu golomodzo.
13Iye usingateedze tjililo tje nshayi,
iye unowoti ha e mimila kukashaya unonteedza.
14Tjipo tjinopigwa mu ikohwa tjodzima shungu,
ne tjizwimba nlomo tjinodusigwa mu apkhwa tjodzima kugwadza moyo kukulu.
15Ha kutambunuka kushingwa, ko shathisa balulwami,
koga i golomodzo ku bashingi be mbipo.
16Nthu unobhuda mu zila ye kuhwisisa,
unowonyaluluka mu gubungano le bafi.
17Iye unoda mizipo unowobe nshayi,
iye unoda nkumbi we zhambi ne mafuta aatofuma.
18Mbiimbi unolipila nlulwami,
ne basingagalemoyo bano lilipila bakatambunuka.
19Koyita kugala mu tjilambanyika,
pana kugala ne nkadzi unazhoba edziidza.
20Mu ng'umba ye ntjenjedu ko gala fumwa nji ne mafuta,
koga tjilengwe tjoja tjipedza kose.
21Iye unoshaka ndulamo ne buthu,
unowana butjilo ne gudzo.
22Nthu wakatjenjela unonginilila nzi nkulu we wakasima,
kaligila pasi matizhilo abanogalabwe muali.
23Iye unotjengeta nlomo uwe ne lulimi gugwe,
unozwidusa mu mbatsha.
24“Ndadi” i zina le unozwikudza, unozwida
unoshinga zwithu nge kuzwikudza kukwe.
25Simbe inobulawa nge njemulo dzayo,
ngobe maboko awe anolamba kushinga.
26Zhuba lose mbiimbi unoshwa eyemula,
koga nlulwami unopa asingatjibe.
27Tjibhayilo tje mbiimbi tjoshimisa,
ngono zwinyanya ha etjizhisa nge nkumbulo wakabipa.
28Ntendeki we manyepkhwa unowoloba,
koga dama le nthu unoteedza lowogalila tjose.
29Nthu mbiimbi unokukutadza tjiso,
koga nthu wakatambunuka una njele mu zila dzidze.
30Akuna butjenjedu, akuna hwisiso ne gumbuludzo,
zwingakulila Yahwe.
31Mbizi inolulwamisigwa zhuba le ngwa,
koga kukunda kodwa kuna Yahwe.
Kalanga Bible © Bible Society of Botswana, 2008, 2018.