Makungulupeswa 13
13
1Nkololo wakatjenjela unohwa ndayo ya tate babe,
koga ndadi aatotjemeleka.
2Nthu unoja zwakanaka zwe mitjelo ye nlomo uwe,
koga njemulo dze bakaipa iphipiti.
3Iye unotjengeta nlomo uwe unotjengeta butjilo gugwe,
iye unolebanya unozwikolomodza.
4Simbe inoyemula, ngono akuna tjainowana,
koga njemulo dze wakalonga meya mu nyama dzozhadzisika.
5Nlulwami unoshima manyepkhwa,
koga nthu mbi unobhatisa shoni.
6Bululwami gotjengeta iye una zila yakatambunuka,
koga tjibi tjo labhulila kutjena mbiimbi.
7Mmwe nthu unozwithama wakafuma, koga aanatjaanatjo,
mmwe unozwithama nshayi, koga ana fumwa njinji.
8Butjilo gwe nthu godzutunugwa nge fumwa iye,
koga nthu we nshayi aana tjingandzutunula.
9Tjedza tje nlulwami tjopenyelela,
koga luvone gwe mbiimbi gowodzima.
10Kuzwikudza kozhisa kukangazhana,
koga butjenjedu gumuna banoamutjila gumbuludzo.
11Fumwa yakawang'wa nge phupu inowopalala,
koga iye unoshaba kushomanana ne kushomanana unoipaphidza.
12Tjakalindigwa kubepo ha tjinonoka tjonyadza meya,
koga tjakalindigwa ha tjaboneka nti we butjilo.
13Iye unolingila dama pasi unozwibulaya,
koga iye unoteedza nlayo unowowana mbhayilo uwe.
14Tjidiyo tje ntjenjedu nsenya we butjilo,
kuti nthu aleye mapuzhu e lufu.
15Nkumbulo wakanaka unozhisa kudiwa nge bathu,
koga zila ye basinga galemoyo ihukutu.
16Mu tjimwe ne tjimwe ntjenjedu unoshinga nge luzibo,
koga tjilengwe tjolakidza bulengwe gwatjo.
17Ntumwa mbi unolonga bathu mu mbatsha,
koga mmilili unogalikabgwe unozhisa bhodzo.
18Bushayi ne kulengudzika zozha kuna iye unolamba kulayiwa,
koga iye unotjemegwa kahwa unokudziwa.
19Njemulo dzazhadzisika dzozipila meya,
koga kushandukila bubi koshimisa ku zwilengwe.
20Iye unoyenda ne bathu bakatjenjela unotjenjelabo,
koga nkwinya we zwilengwe unowongina mu mbatsha.
21Mbatsha dzotobelela batjinyi,
koga kubhudilila mbhayilo we balulwami.
22Nthu wakalulwama unosiyila bana be bana babe lukata,
koga fumwa ye nthu mbi yakabigigwa balulwami.
23Gula le nshayi lina zojiwa zwinjinji,
koga lopaladziwa nge kusatambunuka.
24Iye usingashingise shamu unobenga nkololo uwe,
koga iye unon'da unolonga meya mu nyama kunlaya.
25Nlulwami una zojiwa zwakalizana kun'gutsha,
koga ntumbu we nthu mbi unolila zhala.
Kalanga Bible © Bible Society of Botswana, 2008, 2018.