Mbalo 34
34
Migathu ye shango ye Kanana
1Yahwe bakadwa Mushe bakati, 2“Idwa bathu be Iziraela uti, ‘Ha mungina mu shango ye Kanana, shango yandinowomupa, migathu ye mituthu yenyu ibe sa woku: 3Shango yenyu ku burwa inowobamba kudwa pa tjilambanyika tje Zini, yakasupha ne n'gathu we Edomu. Ngono n'gathu wenyu ku burwa unowobe utangisa ku bhezhuba ku phelelo dze Gungwa le Mwenyu. 4Ube unoshanduka wakalinga zhiambuko le Akirabhimi, ube utjulukila ku Zini. Ngono phelelo dze n'gathu wenyu dzowobe ku burwa gwe Kadeshibhareneya. Ube udwilila unoti ku Hazarada, ube upinda wakalinga ku Azimoni. 5Kakale unowoshanduka kudwa mu Azimoni unoti ku Nkuku we Egipiti, ube unopelela ku gungwa.
6“ ‘N'gathu wenyu ku golombedzo unowobe Gungwa Bukulu.
7“ ‘N'gathu wenyu ku bunandzwa unowobe woyu: Kudwa pa Gungwa Bukulu kunoti ku Dombo le Hori. 8Unowobamba udwa pa Dombo le Hori unoti ku nkoba we Hamati. Ngono phelelo dze n'gathu dzowobe ku Zedadi. 9N'gathu wenyu ku bunandzwa unowotalabukila ku Zifuroni, phelelo dzawo dzowobe ku Hazarenani.
10“ ‘N'gathu wenyu ku bhezhuba unowobamba udwa pa Hazarenani unoti ku Shefamu. 11N'gathu unowodeluka udwa ku Shefamu unoti ku Ribila uli ku bhezhuba kwe Ayini ukadelukila ku ndzibo we Gungwa gwe Khinereti ku bhezhuba. 12N'gathu unowodelukila ku gwizi gwe Jorodani, phelelo dzawo dzowobe ku Gungwa le Mwenyu.
“ ‘Iyeyi ndiyo inowobe shango yenyu ne migathu yayo mbizho dzose.’ ”
13 #
Mbalo 26:52-56
#
Joshuwa 14:1-5
Mushe kadwa Baiziraela kati, “Shango yenyu ndiyo iyeyi, moikobana ngokandila. Ndiyo Yahwe yabakati ipiwe njudzi dzili zhanalume dzina gwamu. 14Ngobe ludzi gwa Rubheni nge misha yabo, ne ludzi gwa Gadi nge misha yabo, ne gwamu le ludzi gwa Manase, bakawana gwabo. 15Njudzi mbili dzina gwamu le ludzi dzakawana gwadzo seli kwe Jorodani ku Jerikho ku bhezhuba.”
Batungamili bakalingisana ngokoba shango
16Yahwe bakadwa Mushe bakati, 17“Mpirisiti Eleazari na Joshuwa nkololo wa Nuni ndibo banowokoba thaka ye bathu be Iziraela. 18Mutole ntungamili mu ludzi gumwe ne gumwe akobe shango kube thaka.” 19Mazina abo ndiawa: We ludzi gwa Juda ndi Khalebu nkololo wa Jefune. 20We ludzi gwa Simiyoni ndi Shemueli nkololo wa Ammihudi. 21We ludzi gwa Bhenjamini ndi Elidadi nkololo wa Khisiloni. 22We ludzi gwa Dani ndi Bhuki we ntungamili ali nkololo wa Jogili. 23We bakololo ba Josefa; kuli be ludzi gwa Manase ndi Hannieli we ntungamili ali nkololo wa Efodi. 24We ludzi gwa Ifureimi ndi Kemueli we ntungamili ali nkololo wa Shifutani. 25We ludzi gwa Zebuluni ndi Elizafani we ntungamili ali nkololo wa Phanaki. 26We ludzi gwa Isakari ndi Paletieli we ntungamili ali nkololo wa Azani. 27We ludzi gwa Asheri ndi Ahihudi we ntungamili ali nkololo wa Shelomi. 28We ludzi gwa Nafutali ndi Phedaheli we ntungamili ali nkololo wa Ammihudi.
29Balume ibaba ndibo bakapiwa ndaulo ndi Yahwe kuti bathubukanye shango baikobele bathu be Iziraela kube thaka, mu shango ye Kanana.
Currently Selected:
Mbalo 34: KBTP
Highlight
Share
Compare
Copy
Want to have your highlights saved across all your devices? Sign up or sign in
Kalanga Bible © Bible Society of Botswana, 2008, 2018.
