Mbalo 20
20
Mishingo yeku Kadeshi
(Kufuluka 17:1-7)
1Mu mwedzi we kutanga gubungano lose le bathu be Iziraela likaswika mu tjilambanyika tje Zini, likakotokela mu Kadeshi. Miriamu kafa kabiganyigwa ko.
2 #
Kufuluka 17:1-7
Kwakabe kusina vula ye gubungano, ngono bathu bakazwikubunganya bakamukila Mushe na Aroni. 3Bakadwa Mushe bakati, “Apa kobe kusakayita atabe takafila mbeli kwa Yahwe tjibaka tjakafa zwikamu zwedu kene? 4Apa ini makazhisa gubungano la Yahwe mu tjilambanyika itjetji kene? Makatizhisila kuti towofa iswi ne zwithuwo zwedu kene? 5Ini makatidusa mu Egipiti mutizhisa mu shango mbiimbi yakajali kene? Akuna paungawana thunde kene mpaya kene zhambi kene mitjelo ye pomegiranate, kakale akuna nenge vula inong'wiwa!” 6Mushe na Aroni bakabhuda mu gubungano bakayendila ku nkoba we nshasha we bushanganilo. Bakathingama bakakotamisa njiso dzabo. Ngono tjedza tja Yahwe tjikazwilakidza ku bali.
7Yahwe bakadwa Mushe bakati, 8“Tola ludozo mukubunganye gubungano iwe ne nkulu uwo Aroni, mudwe shongwe mbeli kwe gubungano kuti iwungise vula yayo. Ndizo inobadusila vula, ube upa gubungano vula ling'we libe ling'wisa ne zwithuwo zwalo.” 9Ngono Mushe katola ludozo mbeli kwa Yahwe sekwa bakandwa.
10Mushe na Aroni bakakubunganyila gubungano mbeli kwe shongwe, ngono bakalidwa beti, “Tjihwani ngwenu, imwi bapanduki, apa timudusile vula mu shongwe iyeyi kene?” 11Mushe kamilidza ludozo gugwe kaloba shongwe ndigo kabili, ngono kukapubuka vula isishoma gubungano likang'wa nenge zwithuwo zwalo.
12Koga Yahwe bakadwa Mushe na Aroni bakati, “Ngoti amuzogalamoyo mundili kakale amuzondipa gudzo mbeli kwe Baiziraela, ndizoke amutjonokotosa gubungano ileli mu shango yandakati ndobapa iyo.”
13Ikoku kwakashingikala ku vula dze Meriba#20:13 Meriba: Zina ileli mu Tjihebheru lodwa ng'ong'ola., Baiziraela pa bakang'ong'ola nge kwa Yahwe, ngono Yahwe bakazwilakidza ku bali kuti bakayengemala.
Mambo we Edomu unodzibisa Baiziraela kupinda
14Mushe wakatuma batumwa kudwa mu Kadeshi kuna mambo we Edomu eti, “Mwana wa tate babo Iziraela kati, ‘Unoziba bulemo gwakatiwila; 15bobatategulu bedu sekwa bakabhuda beyenda ku Egipiti, ngono tikagala makole manjinji mu Egipiti, Baegipiti bakatidziyidza na bobatategulu bedu. 16Ngono takati tililila kuna Yahwe bakatihwa. Bakatuma ntumwa we kudzimu kutidusa mu shango ye Egipiti. Ngono ngwenu timu Kadeshi, nzi nkulu umu n'gathu we ntuthu wenyu. 17Tokumbila palama shango yenyu. Ngono atitowobhuda mu zila, kene kuli kupalama minda ye mizhambi, nenguba kuli kung'wa vula mu matshime enyu. Towotobela zila, atitowobhudila ku luji, kene ku lumeshwe, kudzina tinobhuda mu ntuthu wenyu.’ ”
18Koga Edomu kan'dabila eti, “Amungapalame shango yedu. Amungajalo towobhuda nge mathumo tikabhayana namwi.”
19Ngono Baiziraela bakankumbila beti, “Towotobela zila koga, ngono ha iswi kene zwithuwo zwedu zwingang'wa vula yenyu, towoilipa, tokumbila pinda koga, kusina tjimwe kakale.”
20Koga Edomu kadwa Iziraela kati, “Aungapaleme ntuthu wangu.” Edomu kabhuda ne balume bali banjinji, be babhayani bakasima. 21Ngono ngoti Edomu akalamba Baiziraela bepalama ntuthu uwe, ndizo Baiziraela bakashanduka bakansiya.
22Gubungano lose le Iziraela likamilika mu Kadeshi, likanoswika ku Dombo le Hori. 23Yahwe bakadwa Mushe na Aroni bali ku Dombo le Hori, pa n'gathu we Edomu bakati, 24“Aroni aatowongina mu shango yandakapa bathu be Iziraela, unowofa, ngoti makapandukila nlayo wangu ku vula dze Meriba. 25Tola Aroni ne nkololo uwe Eleazari utathile nabo pezhugwi kwe Dombo le Hori. 26Ngono uambule Aroni zwiambalo zwizwe uzwiambadze nkololo uwe Eleazari, ngobe Aroni unofila pezhugwi kwe dombo.” 27Mushe kathama sekwa laula Yahwe, ngono bakatathila pezhugwi kwe Dombo le Hori, gubungano lose lakabalinga. 28#Kufuluka 29:29; Mbalo 33:38; Matama 10:6Ngono Mushe kaambula Aroni zwiambalo zwizwe kazwiambadza Eleazari nkololo uwe. Aroni kafila ipapo pezhugwi kwe dombo. Ndizo Mushe na Eleazari bakadeluka pezhugwi kwe dombo. 29Kukati gubungano lose libona kuti Aroni wafa, likalilila Aroni kwe mazhuba ali makumi matatu (30).
Currently Selected:
Mbalo 20: KBTP
Highlight
Share
Compare
Copy
Want to have your highlights saved across all your devices? Sign up or sign in
Kalanga Bible © Bible Society of Botswana, 2008, 2018.
