Mbalo 19
19
Nlota we ng'ombe shaba
1Yahwe bakadwa Mushe na Aroni bakati, 2“Eyi ndiyo ndongoloso ye ndaulo Yahwe yabakalaula beti, ‘Idwa Baiziraela bazhise ng'ombe shaba ye pholombe isina bulema, isakatongo tilikwa jokwe. 3Ngono muyise ku mpirisiti Eleazari, ibe idusigwa kuzhe kwe bukotokelo ibe ibhayigwa mbeli kukwe. 4Eleazari atole mamwe malopa ayo aanyase nge tjinyala katendeka mbeli kwe nshasha we bushanganilo. 5Ngono ng'ombe yose, ne ganda layo ne malopa ayo ne nswani, zwipisigwe mbeli kukwe. 6Mpirisiti atole lukuni gwe nkosho ne nshangule ne nsungo nshaba azwiposele pakati kwe moto unopisa ng'ombe ye pholombe. 7Shule kwa ikoku mpirisiti asuke zwiambalo zwizwe kakale angule mbili uwe. Shule kwa ikoku abe ebgwilila mu bukotokelo, koga mpirisiti unowobe akatemapala kuswikila zhuba lingina. 8Iwoyo wapisa ng'ombe ye pholombe asukebo zwiambalo zwizwe abe engula mbili, ngono unoshwa akatemapala kudza zhuba lamila. 9#Bahebheru 9:13Ngono nlume wakatjenapala unowola nlota we ng'ombe ye pholombe kanoutebulila kuzhe kwe bukotokelo pakatjenapala. Ngono nlota unobigigwa gubungano le bathu be Iziraela kuwulonga mu vula ino ngula nge bathu kubatjenapadza. Kungula ikoku kothamigwa kubatjenapadza kudusa tjibi. 10Nlume wawola nlota we ng'ombe ye pholombe asuke zwiambalo zwizwe, koga unowobe akatemapala kuswikila zhuba lingina. Ikoku kushingikale mu bathu be Iziraela ne mu nlubili unobe ali pakati kwabo, ube nlayo nge kusingapele.
Kushangana ne itumbu
11“ ‘Wakutha itumbu tje nthu unowotemapala kwe mazhuba ali kutendeka. 12Angule nge vula azwitjenapadze mu zhuba le butatu, abe engula kakale mu zhuba le butendeka, ngono unowobe atjenapala. Koga ha asangula mu zhuba le butatu ne le butendeka, unowobe asakatjenapala. 13Wakutha itumbu tje nthu, ebe asingazwitjenapadze, unowogala akatemapala, ngobe asanyasiwa nge vula inotjenapadza. Unowotemapadza bugalo gwa Yahwe, ngono nthu wakajalo athubugwe mu gubungano le Iziraela.
14“ ‘Woyu ndiwo nlayo wakafanila shingisiwa ha nthu afila mu nshasha, nthu mmwe ne mmwe wangina mu nshasha wafila nthu wakafanila temapala kwe mazhuba ali kutendeka. 15Tjija tjimwe ne tjimwe tjinowobe tjili mwadzi tjisakafumikwa tjowotemapala. 16Nthu ungati ali ku shango kabhata itumbu tje nthu wabulawa nge thumo, kene itumbu tje nthu wafa lufu koga, kene fupa le nthu kene ikumbu, unowobe atemapala. 17Kutjenapadza wakatemapala kowotogwa nlota we tjibhayilo tje tjibi tjinopisiwa, ube ulongwa mu hali ushanganyiwa ne vula inowunga. 18Ipapo nthu wakatjenapala atole nshangule audubika mu vula, abe enyasa nshasha ne zwija zose zwimuuli ne bathu bakabe bali mukati kwawo ne wakutha fupa le nthu kene itumbu tje nthu wabulawa kene itumbu tje nthu wafa koga kene ikumbu. 19Nthu wakatjenapala unowonyasa wakatemapala mu zhuba le butatu ne le butendeka, ndiko kunowoti nge zhuba le butendeka nthu wakatemapala kabe atjenapala. Ngono abe esuka zwiambalo zwizwe ebe e ngula mbili, ngono kowoti zhuba lingina kabe atjenapala.
20“ ‘Koga nthu ungati akatemapala kasizwitjenapadze, uwoyo nthu athubugwe mu gubungano le Baiziraela. Ngobe wakatemapadza bugalo gwakayengemala gwa Yahwe. Ngoti vula inotjenapadza aizonyasiwa munli, nthu uwoyo wakatemapala. 21Ube nlayo mubali nge kusingapele. Nthu unonyasa vula etjenapadza, shule kwa ikoku asuke zwiambalo zwizwe. Ngono unowobhata vula inotjanapadza unowotemapala kuswikila zhuba lingina. 22Tjimwe ne tjimwe tjingabhakhwa nge nthu wakatemapala tjowotemapala. Ngono mmwe ne mmwe ungatjibhata unowotemapala kuswikila zhuba lingina.’ ”
Currently Selected:
Mbalo 19: KBTP
Highlight
Share
Compare
Copy
Want to have your highlights saved across all your devices? Sign up or sign in
Kalanga Bible © Bible Society of Botswana, 2008, 2018.
