Nehemiya 9
9
Bathu bano zwileba milandu
1Mu zhuba le bumakumi manna le mwedzi iwoyo zwawo Baiziraela bakakubungana bakazwinyima zojiwa bakaambala masaka#9:1 masaka: Kuambala saka kwakabe kulakidza kuti nthu umu tjililo kene kuna tjisa nshathisa., misholo yabo ili zhele hwuluba. 2Baiziraela bakazwidusa mu batayana ngono bakama bakazwileba milandu yabo neya bobatategulu babo. 3Bakamilika pabakabe balipo bakabala mu lukwalo gwe nlayo wa Yahwe Ndzimu wabo nge tjibaka tjimwe, nge tjibaka tjimwe bakazwileba milandu ne kunamata Yahwe Ndzimu wabo. 4Pakatathila kwakabe kuna Balevi kuli Jeshuwa na Bhani na Kadimiyele na Shebaniya na Bhuni na Sherebiya na Bhani na Kenani bakamimila nge hwi gulu kuna Yahwe Ndzimu wabo. 5Kudwapo Balevi bo Jeshuwa na Kadimiyele na Bhani na Hashabineya na Sherebiya na Hodiya na Shebaniya na Pethahiya bakati “Milikani mukudze Yahwe Ndzimu wenyu nge kusingapele kose. Gudzo ngalibe ku zina lenyu lakayengemala, ngalikudziwe kupinda mazina wose.”
Ntembezelo wekuzwileba milandu
6“Imwi moga, ndimwi Yahwe. Makathama kudzimu ne zwinjinji zwimukuli, makathama shango ne zose zwimuili, gungwa ne zwimulili. Mopa tjimwe ne tjimwe butjilo ne bunjinji gwe kudzimu gomunamata.” 7#Kutangisa 11:31; 12:1; Kutangisa 17:5Ndimwi Yahwe Ndzimu makazwishalulila Abhuramu mukan'dusa mu Uri ye Bakhaladiya, mukantumila zina muti Abhurahama. 8#Kutangisa 15:18-21Makawana moyo uwe una bugalimoyo mu muli ngono mukathama tjidumano naye tjekumpa shango ye Bakanana neye Bahiti neye Baamori neye Baperizi neye Bagirigashi zwizekugwana zwizwe. Makashingikadza matama enyu ngobe muli nlulwami. 9#Kufuluka 3:7; Kufuluka 14:10-12Makabona tshiyilo ya bobatategulu bedu ku Egipiti, mukahwa tjililo tjabo pa Gungwa Shaba. 10#Kufuluka 7:8—12:32Makathamila Faro ne bashingi babe ne bathu be shango iye zwilakidzo zwe makaabadzo, ngobe makabe mu ziba kuti Baegipiti bakabhata bobatategulu bedu tjini. Makazwithamila zina, ilo litjatjila na nasi. 11#Kufuluka 14:21-29; Kufuluka 15:4, 5Makapalalanya gungwa mbeli kwabo kuti ndizo bapalame pakawoma pakati kwe gungwa, badziyidzi babo mukabalashila mukatikati kwe vula njinji se bgwe. 12#Kufuluka 13:21, 22Pezhugwi kwa ikoku mu masikati makabatungamila nge gole, mu busiku mukabatungamila nge moto kubapa tjedza mu zila yabakayenda. 13#Kufuluka 19:18—23:33Makadelukila pezhugwi kwe Dombo le Sinai mukalebeleka nabo kudwa kudzimu, mukabapa milayo yakwako. 14Makabazibisa ngekwe zhuba le Sabata mukabapa milayo ne ndaulo nge nlanda wenyu Mushe. 15#Kufuluka 16:4-15; Kufuluka 17:1-7; Matama 1:21Mu zhala makabapa tjiunga tje kudzimu ngono munyota mukabapa vula inodwa mu shongwe, mukabadwa kuti bayende banotola thundu ye shango yamakatuna tjoselele kuti mowobapa iyo. 16#Mbalo 14:1-4; Matama 1:26-33Ngono ibo, bobatategulu bedu, bakabe ne kuzwikudza kakale bakabe ne mitshibhana bakasibhulutane ndaulo dzenyu. 17#Kufuluka 34:6; Mbalo 14:18Bakalamba teedza kakale bakasitubule kukumbulukigwa matjenamiso amakabathamila. Bakabe ne mitshibhana kakale mu bupanduki gwabo bakashalula ntungamili kuti ndizo ababgwilize mu busungwa ku Egipiti. Ngono imwi mu Ndzimu unozwiibhatigwa, munangoni ne mahwilongoni, ha mutotjimbidza magwadza moyo muna ludo gusingapele. Ndizo amuzobalasha, 18#Kufuluka 32:1-4nenguba bakazwibezhela midzimu ye ng'ombe bebeti, “Woyu i ndzimu wenyu waka mu dusa mu Egipiti,” betuka Ndzimu. 19#Matama 8:2-4Ngono nge ngoni dzenyu hwulu amuzobaletjedzela mu tjilambanyika. Mu masikati gole alizotongomisa kubalakidza zila kene moto ukamisa kuthuta busiku kubalakidza zila yabakabe betobela. 20Makabapa Meya yenyu yakanaka ku badiya. Amuzobanyima mana kakale makabapa vula bana nyota. 21Mu makole ali makumi manna makabatjengeta mu tjilambanyika, kwakabe kusina tjabanosheta, zwiambalo zwabo zwakabe zwisingashakale ne makumbo abo akabe asingazwimbe. 22#Mbalo 21:21-35Makabapa mibuso ne zwitjaba, mukabakobela migathu isipano. Bakatola shango ya Mambo Sihoni we Heshibhoni ne shango ya Mambo Ogi we Bhashani. 23#Kutangisa 15:5; 22:17; Joshuwa 3:14-17Makawatsha zwizekugwana zwabo se nyenyedzi dze zhuzhugwi mukabazhisa ku shango yamakabudza bobatategulu babo kuti bangine muili baitole. 24#Joshuwa 11:23Ndizo zwizekugwana zwakayenda zwikatola shango mukakunda bagali be shango ye Bakanana, mukabalonga mu maboko abo ibo na bomambo babo ne bathu be shango kushinga kuda kwabo nge kwabo. 25#Matama 6:10, 11Bakatapa matizhilo e mizi mikulu ne shango yaka naka bakatola ng'umba dzilizhele thundu dzakathubukana dzakanaka, matshime akatshiwa kale ne minda dze zhambi ne miti ye mitoba ne nge mitjelo isingapele. Bakaja bakaguta bakakola, bakashathila kululwama kwenyu kukulu. 26#Basumikilisi 2:11-16Ne kwakajalo bakabe ne kusahwa kakale bakamupandukila, bakazwifupatidza milayo yenyu kakale bakabulaya balebesambeli benyu, bakabe babatjenjedza kuti ndizo bashandukile kakale kumuli, bakamutuka kwakabangalala. 27Ndizo makabaletjedzela mu maboko e zwita zwabo kuti zwibadziyidze. Ngono mu kudziyidziwa kwabo bakalilila kumuli beshaka bhatsho, koga mukabahwa muli kudzimu, ngono nge ngoni dzenyu makabapa basununguli bakaba tjidza mu zwita zwabo. 28Bakati basino gadzikana bakabgwilila kakale bakathama bubi mbeli kwenyu ngono mukabaletjedzela mu maboko e zwita zwabo kuti ndizo zwibalaule. Bakamulilila kakale ngono mukahwa muli kudzimu, ngono nge ngoni dzenyu mukabasunungula misi yose mu maboko e zwita zwabo. 29#Zwipo 18:5Makabatjenjedza kuti bashanduke ndizo batobelele nlayo wenyu, koga ngekuzwikudza kwabo bakabe basingalondolodze milayo yenyu, nenguba ili iyo inotjidza. Bakabe ne bukomba bakamuzwifupatidza, bakabe ne mitshibhana bakalamba ku muteedza. 30#2 Bomambo 17:13-18; 2 Zwiyitikalo 36:15, 16Makabe ne moyonlefu kwe makole manjinji mubali. Nge Meya yenyu makabatjenjedza ngoshingisa balebesambeli benyu koga bakasiteedze, ndizo mukobaletjedzela be zwitjaba. 31Koga nge ngoni dzenyu hwulu ha muzobaletjedzela tja tjose kene mukabalashilila, ngoti muli Ndzimu unangoni ne lubu. 32#2 Bomambo 15:19, 29; 17:3-6; Ezera 4:2, 10Ngono ngwenu imwi Ndzimu wedu nkulu, imwi muna masimba kakale mutjisa, imwi munolondolodza tjidumano tjenyu tje ludo, musitongotola mang'oni atiwila ne awila bomambo bedu, awila batungamili bedu, awila bapirisiti ne balebesambeli, awila kakale botate bedu ne bathu benyu bose kudwa tjose mu mazhuba a bomambo be Asiriya kunoti nasi ali madatha koga. 33Nekwakajalo makalulwama muna zose zwakatiwila, ngoti makathama nge ndulamo koga iswi takashinga bubi. 34Bomambo bedu, batungamili bedu na bobatategulu bedu abazolondolodza nlayo wenyu, abazobhulutana ndayo kakale bakasiteedze amubatjenjedza. 35Ne mu bushe gwabo bakakong'wa nge kumushingila nenguba bakabe beshathila bubuya gwamakabapa ne shango yakanaka yamakabapa, bakakong'wa nge kumushingila kene kufupatila zila dzabo dzakabipa. 36Ngono ngwenu bonani, nasi tabe balanda, tabe balanda mu shango yamakapa bobatategulu bedu kuti ndizo baje mitjelo yayo ne zwimwe zwakanaka muili. 37Ngekwe jinyo ledu, mitjelo yose inoyenda kuna bomambo bamakaletjedza, banotilaula sekwa banoshaka nge kuda kwabo, tabe mu kudziyidzika kukulu kwazo.
Bathu banothama tjidumano
38Ngekwa izwezwi zose zwakashingikala, tothama tjidumano tjakasima nge nkwalo, batungamili bedu, ne Balevi bedu, ne bapirisiti bedu babiga itempa tjinolakidza ha bedumana nako.
Kalanga Bible © Bible Society of Botswana, 2008, 2018.