Nahumu 2
2
Kuwa kwe Ninive
1Mpaladzi waswika kuwobhayana nawe Ninive.
Linda mbako dze matizhilo,
tjengeta zila
usunga thunji dzidzo
ushingise matatabuko awo wose!
2Ngoti Yahwe banowobuza mu tjimo gudzo la Jakubo
se gudzo le Iziraela,
nenguba bathukudzi bakabathukudza
bakatjinya mizhambi yabo.
3Zwivikisi zwe babhayani babe zwishaba,
bagwi babe bakambala zwiambalo zwishaba kwakabondelela.
Koloyi dzidze dze ngwa dzopenya
mu zhuba ladzalulwamisigwa ngwa,
ne mathumo anokuswiwa.
4Koloyi dze ngwa dzolabuka dzizhala zila,
dzovirima dziyenda yeno na yeno mu zwibata.
Dzolingika se mithuto ye mavone,
dzilabuka se lupenyo gwe vula.
5Unodana batungamili babo,
banotshatsharika abezha kwabadang'wa.
Banolabukila ku guma,
ndizo tjidzibili tjibe tjibigwa pakalingisana.
6Mikoba ye njizi ikazhuka,
ngono nzi we bumambo ukapela masimba.
7Nlayo wadwa wekuti nzi utapiwe,
balandakadzi bawo basengwe,
belila se njiba
bakabhata hana dzabo.
8Ninive inonga dziba,
ngono vula yalo ipkhwa.
Mmwe unodana eti, “Imani! Imani!”
Ngono kube kusheta unoshanduka.
9Tapani siliva!
Tapani golide!
Fumwa izhele ipapa!
Kuzhele tjimwe ne tjimwe tjakanaka!
10Ninive yakashakadziwa ikatapigwa, ikakolomogwa!
Moyo inotimbama, zwidwi zwikatetema,
thunji dzose dzozunguzika njiso dzose dzofubala.
11Lingayi ngwenu wali guwu le shumba
pabakabe bejisila bana babo?
Pangayi pakabe peyendayenda shumba ne shumbakadzi
ne shumbana kusina tjadzinotja?
12Shumba yakamwawulanya kwakalizana bana bayo
ikasina tjayakabhata kupa shumbakadzi yayo.
Yakazhadza makuwu ayo nge zwayakabulaya
ne makuhwana akazhala.
13Yahwe Masimbawose bakati,
“Bona, ndobhayana nawe.
Ndowopisa koloyi dzidzo dzose nge moto
thumo nayilo lowoja shumbana dzidzo.
Akuna tjandinowokusiyila tjawungabulaya mu shango.
Mahwi e thumwa dzidzo aatowohwika kakale.”
Kalanga Bible © Bible Society of Botswana, 2008, 2018.