Nahumu 1
1
1 #
Isaya 10:5-34; 14:24-27; Zefaniya 2:13-15 Dama ngekwe Ninive. Lukwalo gwe mbono ya Nahumi we ku Elikoshi.
Kugwadzila moyo Ninive kwa Yahwe
2Yahwe Ndzimu una fupa kakale unobgwilizila,
Yahwe banobgwilizila, bazhele bushongola,
Yahwe banobgwilizila zwita zwabo,
mu kugwadza moyo kwabo banobhayana ne zwita zwabo.
3Yahwe abatotjimbidza gwadzamoyo
kakale bana masimba makulu,
abangaletje una nlandu asalobgwa shamu.
Zila yabo imuna tjampupudze ne mu dutu,
makole i hwuluba ye makumbo abo.
4Banotjemela gungwa bakathama kuti lipkhwe,
banopkhwisa njizi dzose.
Ku Bhashani neku Karimeli kobuna,
ne maluba e Lebanoni anowoma.
5Mbeli kwabo matombo anotengenyeka,
matuthu kanyawuka,
shango inomilidzika pabalipo ne
lubumbo na bose banogala mu guli.
6Ndiani ungamidzana nge bushongola gwabo kene?
Ndiani ungadzikitadzila kugwadzamoyo kwabo kunotjisa kene?
Bushongola gwabo gotebuka se moto,
shongwe banodzipkhwanya dzikabe zwikwetjekwetje.
7Yahwe bakalulwama,
ndibo dizhilo mu misi ye zwinodziyidza.
Banobakilila ibabo banogalabgwe mubali,
8koga nge nkubila unokuba
banowozhisa ku bhelelo zwita zwabo,
banowolonda zwita zwabo mu zhalima.
9Tjimwe kene ilini tjamungalanganila Yahwe,
banowotjilobesa,
akuna tjita tjinowomuka kakale.
10Banonga matenjana e mihwa akapombana,
bakanga zwilaladzi zwang'wa,
banowopisiwa se malala e bushwa akawoma.
11Mukuli iwe Ninive kwabhuda mmwe,
unolukila Yahwe gwanga
ekumbuludza nge bubi.
12Tjinolebgwa ndi Yahwe etji,
“Nakuto bakasima kakale bali banji,
banowolobesiwa bakasibepo.
Juda, nenguba ndakakuhwisa zogwadza,
anditjowokuhwisa zogwadza kakale.
13Ngwenu wali ndowovuna jokwi limu mitshibha yenyu
ndibe ndithubula mitjili yakamusunga.”
14Yahwe bakadusa nlayo nge kuko Ninive beti,
“Zina lilo alitjowobepo nge kusingapele.
Ndowokolomodza midzimu yakabezhiwa ne yakabumbiwa
imu ng'umba ye midzimu iyo.
Ndowolulwamisa ikumbu tjitjo
ngoti auteli we tjimwe.”
15 #
Isaya 52:7
Bonani, pezhugwi kwe matombo makumbo e thumwa
inozhisa ndebo mbuya,
unoleba ngekwe mbakiso!
Zana mizano iyo iwe Juda,
ushinge tjawakatuna kutjishinga.
Babiibi abatjowofa bakunginilila kakale,
banowolobesiwa.
Kalanga Bible © Bible Society of Botswana, 2008, 2018.