Mika 4
4
Yahwe banobusa lubumbo nge kunyalala
(Isaya 2:2-4)
1Mu mazhuba e bupelo
dombo le ng'umba ya Yahwe
lowothumbidziwa lili ilo lefu kupinda matombo mamwe,
lowomilidzigwa pezhugwi kwe matuthu,
ngono bathu banowokulumukila kulili.
2Njudzi njinji dzowozha dziti,
“Buyani ngatiyendeni ku dombo la Yahwe,
ku ng'umba ye Ndzimu wa Jakubo,
kuti utidiye zila dzawo,
kuti tiyende mu zijana dzawo.”
Ngoti nlayo unowodwa mu Ziyoni,
dama la Yahwe lowodwa mu Jerusalema.
3 #
Isaya 2:4; Jowele 3:10 Unowogadzanya njudzi njinji,
bakapedzisa kunyanyayidza pakati kwe njudzi dzakasima dza kule.
Banowothula makanu abo bethama zwikara zwe mapadza
ne mathumo abo bethama mipanga inosunulila.
Ludzi agutowosengela gumwe ludzi bukanu,
naiko abatowozwidiya ngwa kakale.
4 #
Zakhariya 3:10
Mmwe ne mmwe unowogala kusi kwe nzhambi uwe
na kusi kwe mpaya uwe
ngono akuna ungabatjisa
ngoti Yahwe Masimbawose balebeleka.
5Ngoti bathu bose mmwe ne mmwe unoyenda nge zina le ndzimu uwe,
koga iswi towoyenda nge zina la Yahwe Ndzimu wedu nge kusingapele.
Batapiwa be Iziraela banowobuya kanyi kwabo
6Yahwe bakati,
“Mu zhuba ilelo ndowokubunganya banoshudza,
ndika kubunganya batapiwa
naibabo bandakalonga mu buyendasi.
7Banoshudza ndowobathama malimbelimbe,
ibabo bakabe balashigwa kutjena ndowobathama ludzi gwakasima.
Yahwe banowobusa pakati kwabo mu Dombo le Ziyoni
kudwa mu zhuba ilelo kuyenda nge kusingapele.
8Ngono ngekuko iwe ngadzi ye ngubi,
iwe duthu le nkololokadzi Ziyoni,
mbuso wakabe uli uwo kutanga unowobuziwa ku kuli,
bumambo gowozha ku nkololokadzi we Jerusalema.”
9Ini ulila zwingapa ngwenu wali?
Apa akuna mambo mukuli kene?
Nkumbuludzi uwo wakafa kene,
kwawungabe wakamanukigwa se nkadzi ali mu zwibhayo?
10Zhaligwa ugomele se nkadzi ali mu zwibhayo
iwe nkololokadzi we Ziyoni
ngoti ngwenu unowobhuda mu nzi
unokotokela mu shango yakaashama,
unowoyenda ku Bhabhiloni.
Ikoko unowosunungugwa.
Yahwe banowokudzutunula
mu maboko e zwita zwizo.
11Njudzi njinji dzakukubunganila
kubhayana nawe,
dzoti, “Letjani atemapale
iswi tipembelele Ziyoni.”
12Koga abatoziba
njalakang'wa dza Yahwe,
abatohwisisa ndongoloso yabo,
iye unobakubunganya se zwiyako pa lutombo.
13“Milika ushokole iwe nkololokadzi we Ziyoni,
ngoti ndowokupa nyanga dze butale,
ndowokupa thozo dze phangula
ngono unowokwiya njudzi njinji.”
Unowopa Yahwe mbuyilo dzabo dzakawang'wa nge bubi,
fumwa yabo yose unowoyipa She we shango yose.
Kalanga Bible © Bible Society of Botswana, 2008, 2018.