Mika 3
3
Mika unokayikanya batungamili be Iziraela
1Ngono ndakati,
“Ihwani woku imwi batungamili ba Jakubo,
imwi babusi be bathu be Iziraela.
Apa ate kulikwenyu kuziba kutambunuka kene?
2Imwi munobenga tjakanaka ngono mukada tjakabipa,
imwi muno mwawula ganda le bathu bangu,
ne nyama muyimwawula mu mafupa abo,
3imwi munoja nyama ye bathu bangu
muviya ganda labo mulisundula mubali,
muvunilila mafupa abo ebe zwitibhutibhu
mubatemelela semunoti i nyama inolongwa mu ikajana,
se nyama inolongwa mu hali.”
4Ngono ipapo banowolilila Yahwe
koga abatowobadabila.
Banowobasumbikila buso gwabo mu tjibaka itjetjo
ngekwe bubi gwabakashinga.
5Yahwe bakati ngekwe balebesambeli banotungamilila bathu bangu ntome, belebeleka
beti, “Kunyalala,”
bedwa wabapa tjinojiwa,
koga usabapa tjinojiwa
bebe belulwamisila kugwa naye.
6Ndizo wali kowobe busiku kumuli gusina mbono,
zhalima lowobe mu muli lisina ndakidzo.
Zhuba lowomilila balebesambeli,
ngono masikati anowobatundubalila balebesambeli.
7Baboni banowolengudzika,
bakandili banowobhakhwa nge shoni,
bose koga banowozwimba njiso dzabo
ngoti kusina dabilo kudwa ku Ndzimu.
8Koga imi ndizhele simba,
nge Meya ya Yahwe
ne kutambunuka ne masimba
kubudza Jakubo bupanduki gugwe,
kubudza Iziraela tjibi tjitje.
9“Ihwani woku imwi batungamili be nsha wa Jakubo,
imwi babusi be bathu be Iziraela
banoshima kutambunuka,
mube muleyanya kose kwakatambunuka,
10imwi munobaka Ziyoni ngotebula malopa,
mubaka Jerusalema nge mbipo.
11Babusi bayo banosumikilisila tjizwimba nlomo,
bapirisiti banodiyila themba,
ne balebesambeli bayo banokandila bebona mari.
Koga benayila Yahwe bebe beti,
‘Apa Yahwe abateli pakati kwedu kene?
Akuna mbatsha dzingatiwila.’
12 #
Jeremiya 26:18
Ndizo wali nge kwenyu
Ziyoni inowolimiwa se nnda,
Jerusalema inowobe duluthulu le malala
duthu le ng'umba ye Ndzimu likabe datha lakamela ishakana.”
Kalanga Bible © Bible Society of Botswana, 2008, 2018.