Zwipo 9
9
Aroni unoyisa zwibhayilo
1Mu zhuba le buzhanakadzi Mushe kadana Aroni ne bakololo babe ne batungamili be Iziraela. 2Ngono kadwa Aroni kati, “Tola nkong'wana we tjibhayilo tje tjibi ne nyundo ye tjibhayilo tjinopisiwa, dzose dzisina bulema, udzizhise mbeli kwa Yahwe. 3Kakale udwe bana be Iziraela uti batole mbudzi ndume ili tjibhayilo tje tjibi, ne phulu ne pkhwizana, dzose dzina gole ling'ompela dzisina bulema, dzili tjibhayilo tjinopisiwa, 4ne ngabe ne nyundo dzili tjibhayilo tje mbakisano, mudzithame tjibhayilo mbeli kwa Yahwe ne tjipo tje mathunde tjakashanganyiwa ne mafuta, ngobe nasi Yahwe banowozwilakidza kumuli.”
5Ngono bakazhisa zwabakadwiwa ndi Mushe mbeli kwe nshasha we bushanganilo, gubungano lose likasedzela pejo likama mbeli kwa Yahwe. 6Ngono Mushe kabadwa kati, “Kuthu ikoku ndiko kwamalauligwa ndi Yahwe kuti mukuthame, kuti ndizo tjedza tja Yahwe tjimupenyele.” 7#Bahebheru 7:27Ndizo Mushe kadwa Aroni kati, “Sedzela ku tjibeso tjinopisigwa zwibhayilo, uyise tjibhayilo tjitjo tje tjibi ne tjibhayilo tjitjo tjinopisiwa uzwithamigwe gadzano na Yahwe ne bathu bo, ube uzhisa tjipo tje bathu ubathamile mbakisano na Yahwe sekwa bakalaula.”
8Ndizo Aroni kasedzela ku tjibeso tjinopisigwa zwibhayilo kabhaya phulu ye tjibhayilo tje tjibi, tjakabe tjili tjitje. 9Bakololo ba Aroni bakazhisa malopa kunli, ngono kadubika tjinyala tjitje mu malopa kaabhoma mu nyanga dze tjibeso tjinopisigwa zwibhayilo. Ngono malopa asala kaatebulila kuzhe ku bhato le tjibeso. 10Ndizo kapisa mafuta ne so ne lutembe gwe moyo zwakadwa mu tjibhayilo tje tjibi, kazwipisila mu tjibeso tjinopisigwa zwibhayilo sekwalauligwa Mushe ndi Yahwe. 11Koga nyama ne ganda kanozwipisila kuzhe kwe bukotokelo.
12Wakabhaya tjibhayilo tjinopisiwa, ngono bakololo babe bakazhisa malopa kunli, kaanyasa mu tjibeso tjinopisigwa zwibhayilo kutjipoteleka. 13Bakapitshila tjibhayilo tjinopisiwa kunli, ntezho ne ntezho ne nsholo, kazwipisila mu tjibeso tjinopisigwa zwibhayilo. 14Kasuka zwamukati ne thozo naizo kazwipisilanya ne tjibhayilo tjinopisiwa mu tjibeso tjinopisigwa zwibhayilo.
15Shule kwa ipapo kayisila bathu tjibhayilo, katola mbudzi ye tjibhayilo tje tjibi yakabe ili ye bathu, kayibhaya kaiyisa ili tjibhayilo tje tjibi, sekwaakathama nge tjibhayilo tje kutanga tje tjibi. 16Ngono kayisa tjibhayilo tjinopisiwa, katjiyisa kuyendidzana ne nlayo. 17Kayisa tjipo tje mathunde, kanokola luboko gugwe guli zhele katjipisila mu tjibeso tjinopisigwa zwibhayilo pezhugwi kwe tjibhayilo tjinopisiwa tjapisiwa mangwanana. 18#Zwipo 3:1-11Kabhaya ngabe ne nyundo, dzili zwibhayilo zwe mbakisano zwe bathu, ngono bakololo ba Aroni bakanzhisila malopa, kaanyasa mu tjibeso tjinopisigwa zwibhayilo kutjipoteleka. 19Aroni kabiga mafuta e ngabe ne ye nyundo, bhesu ne lizwizwi ne so ne lutembe gwe moyo, 20bakabiga mafuta pezhugwi kwe ifuba, kapisa mafuta mu tjibeso tjinopisigwa zwibhayilo. 21Koga ifuba ne tjidzwa tje luji Aroni kazwizunguza kube tjibhayilo tjakazunguziwa mbeli kwa Yahwe, sekwakalaugwa ndi Mushe.
22 #
Mbalo 6:22-26
Ipapo Aroni kamilidzila maboko awe ku bathu kabakombolela, kabe edeluka edwa kuyisa tjibhayilo tje tjibi ne tjibhayilo tjinopisiwa ne tjibhayilo tje mbakisano. 23Mushe na Aroni bakabe bengina mu nshasha we bushanganilo, ngono bakati bebhudila kuzhe bakakombolela bathu, ngono tjedza tja Yahwe tjikaboneka ku bathu bose. 24Moto ukadeluka udwa pana Yahwe ukapisa tjibhayilo tjinopisiwa ne mafuta amu tjibeso tjinopisigwa zwibhayilo, kukati bathu bose bekubona, bakamimila, bakawa nge njiso mu kushatha ne kutja.
Currently Selected:
Zwipo 9: KBTP
Highlight
Share
Compare
Copy
Want to have your highlights saved across all your devices? Sign up or sign in
Kalanga Bible © Bible Society of Botswana, 2008, 2018.
