Zwipo 8
8
Zhodziwa kwa Aroni ne bakololo babe
(Kufuluka 29:1-37)
1Yahwe bakadwa Mushe bakati, 2“Tola Aroni ne bakololo babe bazhe ne zwiambalo zwabo zwe bupirisiti ne mafuta anozhodziwa ne nkong'wana we tjibhayilo tje tjibi ne nyundo mbili ne seme ina zwiwunga zwisina mbidzo. 3Ube ukubunganyila gubungano lose mbeli kwe nkoba we nshasha we bushanganilo.”
4Mushe kathama sekwa adwiwa ndi Yahwe, ngono gubungano likakubunganila mbeli kwe nkoba we nshasha we bushanganilo. 5Mushe kadwa gubungano kati, “Etji nditjo tjakalaugwa ndi Yahwe kuti tjithamiwe.”
6Ndizo Mushe kapitshila Aroni ne bakololo babe mbeli, ngono kabangudza nge vula. 7Kaambadza Aroni hazu, kansunga nge mwandabula, kan'ambadza jasi, kan'ambadza efodi, kansunga nge mwandabula we efodi wakalukwa zwakanaka nge bunyambi. 8Kan'ambadza khiba ye ifuba, mu khiba iyeyo kalonga urimu ne thumimu#8:8 urimu ne thumimu: Zwithu zwibili zwakabe zwakanamatidziwa mu tjiambalo tje ifuba, zwishingisiwa kulakidza tjinoshakwa nge Ndzimu.. 9Kan'ambadza hwutshe mu nsholo, ngono mbeli kwayo kanamatidza golide ili tjilakidzo tje kuyengemala, Yahwe sekwa bakadwa Mushe.
10Ndizo Mushe katola mafuta anozhodziwa kazhodza bugalo gwe Ndzimu kose ne zwija zwimuguli, kabe ezwipa Yahwe. 11Kanyasa mafuta anozhodziwa mu tjibeso tjinopisigwa zwibhayilo katendeka, kazhodza tjibeso tjinopisigwa zwibhayilo ne zwija zwatjo zose ne bhavu linonguligwa ne tjigadziko tjalo, kazwiyengemadza. 12Kadila Aroni mafuta mamwe mu nsholo, enzhodzela bupirisiti kumpa Yahwe. 13Ndizo Mushe kasedzedza bakololo ba Aroni, kabaambadza hazu, kabasunga nge mwandabula mu thunji, kabaambadza zwiala sekwakadwiwa Mushe ndi Yahwe.
14Mushe kasedzedza nkong'wana we tjibhayilo tje tjibi, ngono Aroni ne bakololo babe bakabiga maboko abo pezhugwi kwe nsholo wawo. 15Mushe kaubhaya, ngono katola malopa nge tjinyala tjitje kaabhoma mu nyanga dze tjibeso tjinopisigwa zwibhayilo kutjipoteleka, etjitjenapadza, katebulila malopa kuzhe ku tjigadziko tje tjibeso, etjipa Yahwe kuthamila gadzanyo mutjili. 16Mushe katola mafuta wose e zwamukati ne lutembe gwe moyo ne so mbili ne mafuta adzo, kazwipisila mu tjibeso tjinopisigwa zwibhayilo. 17Ngono nyama yose ye nkono ne ganda lawo ne zwamukati kanozwipisila kuzhe kwe bukotokelo sekwakadwiwa Mushe ndi Yahwe.
18Ndizo kazhisa nyundo ye tjibhayilo tjinopisiwa, ngono Aroni ne bakololo babe bakabiga maboko abo pezhugwi kwe nsholo we nyundo. 19Mushe kaibhaya, kanyasa malopa ayo mu tjibeso tjinopisigwa zwibhayilo kutjipoteleka. 20Kukati nyundo isinotjekelegwa nge mitezho, Mushe kapisa nsholo ne mitezho ne mafuta. 21Kukati zwamukati ne thozo zwasukwa nge vula, Mushe kapisa nyundo yose mu tjibeso, tjili tjibhayilo tjinopisiwa, kube nnuhwo unonuhwa zwinozipa, tjipo tjinopisiwa mu moto kupiwa Yahwe, Yahwe kwabakadwa Mushe.
22Ndizo kazhisa imwe nyundo, ili ye kuzhodziwa kwe bapirisiti, ngono Aroni ne bakololo babe bakabiga maboko abo pezhugwi kwe nsholo we nyundo. 23Mushe kaibhaya, katola mamwe e malopa ayo kaabhoma pa theswi ye zebe ye luji ya Aroni ne mu tjinyala tjikulu tje luboko gugwe gwe luji ne mu tjinyala tjikulu tje gumbo lile le luji. 24Ne bakololo ba Aroni baka sedzedziwa, ngono Mushe kabhoma mamwe e malopa pa theswi dze zebe dzabo dze luji ne mu zwinyala zwikulu zwe maboko abo e luji ne mu zwinyala zwikulu zwe makumbo abo e luji, Mushe katebulila malopa asala mu tjibeso tjinopisigwa zwibhayilo kutjipoteleka. 25Ndizo katola mafuta ne bhesu ne mafuta wose e zwemukati ne lutembe gwe moyo ne so mbili ne mafuta adzo ne tjidzwa tje luji, 26mu seme ye zwiwunga zwisina mbidzo yakabe ili mbeli kwa Yahwe, katola tjiwunga tjing'ompela ne khekhe ling'ompela lina mafuta ne kokisi ling'ompela, kazwibiga pezhugwi kwe mafuta ne tjidzwa tje luji. 27Katola zwithu zose izwezo kazwipa Aroni ne bakololo babe mu maboko, bakazwizunguza zwili zwipo zwinozunguziwa pana Yahwe. 28Ipapo Mushe katola zwithu izwezo mu maboko abo, kazwipisila mu tjibeso tjinopisigwa zwibhayilo pezhugwi kwe tjibhayilo tjinopisiwa, tjikabe tjibhayilo tje kuzhodziwa, kube nnuhwo unonuhwa zwinozipa, tjipo tjinopisiwa mu moto kupisigwa Yahwe. 29Ngono Mushe katola ifuba, katjizunguza kube tjibhayilo tjakazunguziwa mbeli kwa Yahwe, wakabe uli ntezho wa Mushe we nyundo ye kuzhodziwa, sekwakadwiwa Mushe ndi Yahwe.
30Ndizo Mushe katola mamwe e mafuta anozhodziwa ne mamwe e malopa amu tjibeso tjinopisigwa zwibhayilo kaanyasa muna Aroni ne mu zwiambalo zwizwe ne mu bakololo babe ne mu zwiambalo zwabo, kayengemadza Aroni ne zwiambalo zwizwe ne bakololo babe ne zwiambalo zwabo.
31Mushe kadwa Aroni ne bakololo babe kati, “Tolani nyama muibhikile pa nkoba we nshasha we bushanganilo, ngono muijilepo ne tjiwunga tjimu seme ye tjipo tje kuzhodziwa sekwandakaleba nditi, ‘Aroni ne bakololo babe banotjija.’ 32Ngono kunowobe kwasala mu nyama ne tjiwunga mowokupisa nge moto. 33Musitongobhuda mu nshasha we bushanganilo mu mazhuba ali kutendeka, kudzina mazhuba e kutjwayiwa kwenyu aswika, ngobe kutjwayiwa kwenyu kowotola mazhuba ali kutendeka. 34Yahwe bakalaula kuti kuthamiwe sekwa kwathamiwa nasi muthamigwa gadzano na Yahwe. 35Mugale pa nkoba we nshasha we bushanganilo siku ne sikati kwe mazhuba ali kutendeka, muthame tjinoshakwa ndi Yahwe, kusajalo mowofa, ngobe ndiko sekwa ndakalauligwa. 36Ngono Aroni ne bakololo babe bakathama zwithu zose zwakalauligwa Mushe ndi Yahwe.”
Currently Selected:
Zwipo 8: KBTP
Highlight
Share
Compare
Copy
Want to have your highlights saved across all your devices? Sign up or sign in
Kalanga Bible © Bible Society of Botswana, 2008, 2018.
