Zwipo 17
17
Kuyengemala kwe malopa
1Yahwe bakadwa Mushe bakati, 2Idwa Aroni ne bakololo babe ne bathu bose be Iziraela uti, “Oku ndiko Yahwe kwabakalaula beti, 3Ha mmwe we Baiziraela angabhayila ng'ombe kene pkhwizana kene mbudzi mukati kwe bukotokelo kene kuzhe, 4ebe asingaizhise mbeli kwe nkoba we nshasha we bushanganilo, kuidusa ili tjipo tja Yahwe mbeli kwe bugalo gwa Yahwe, iwoyu nthu abaligwe nlandu we kutebula malopa, kakale athubugwe mu gubungano la Yahwe. 5Ikoku kodwa kuti bathu be Iziraela bangazhisa zwibhayilo zwabo zwabanobhayila mu shango. Kuti bazwizhise kuna Yahwe ku mpirisiti ku nkoba we nshasha we bushanganilo, babe bezwibhaya zwili zwibhayilo zwe mbakisano. 6Mpirisiti abe enyasa malopa mu tjibeso tjinopisigwa zwibhayilo tja Yahwe pa nkoba we nshasha we bushanganilo, abe episa mafuta kuthama nnuhwo unonuhwa zwinozipa kuna Yahwe. 7Ndizo basitjafe babhaya zwibhayilo zwabo bebhayila midzimu ye mbudzi yabanonamata. Oyu nlayo, mu Baiziraela nge kusingapele kuyenda nge zwizekugwana zwabo.
8“Ngono ubadwe uti, ‘Nthu mmwe ne mmwe we Iziraela, kene ntaya ungabe ali pakati kwabo ali nshabi, eyisa tjibhayilo tjinopisiwa kene tjibhayilo, 9ebe asingatjizhise ku nkoba we nshasha we bushanganilo kutjidusila Yahwe, iwoyo nthu unowothubugwa mu bathu bakanyi kwabo.’
10 #
Kutangisa 9:4; Zwipo 7:26, 27; 19:26; Matama 12:16, 23; 15:23 “Ha nthu we ng'umba ye Iziraela kene ntaya ungabe ali pakati kwabo ali nshabi ebe eja malopa, iwoyo nthu waja malopa ndowolingisana naye, ngono ndonthubula mu bathu bakanyi kwabo. 11#Bahebheru 9:22Ngobe butjilo gwe itjili tjimwe ne tjimwe gumu malopa, ndakamupa iwo mu tjibeso tjinopisigwa zwibhayilo kuthamila meya yenyu kugadzana, ngobe malopa ndiwo anozhisa kugadzana ngekwe butjilo. 12Ndizo ndakadwa bathu be Iziraela nditi kushaye nthu pakati kwenyu unowoja malopa nenguba ali ntaya wakawoshaba pakati kwenyu asije malopa.
13“Nthu mmwe ne mmwe we Iziraela kene ntaya unoshaba pakati kwabo, anovima phuka kene nyuni aitebule malopa abe eyavukidzila nge mavu. 14Ngobe butjilo gwe itjili tjimwe ne tjimwe gumu malopa atjo, ndizo ndakadwa bathu be Iziraela nditi, basitongoja malopa e itjili tjipi kene tjipi, ngobe butjilo gwe itjili tjimwe ne tjimwe gumu malopa atjo, ngono ungaja malopa athubugwe mu bathu bakanyi kwabo.
15“Ngono nthu mmwe ne mmwe waja tjazwifila, kene tjabulawa nge tjibandana, ungabe ali ntebe kene ntaya, asuke zwiambalo zwizwe, abe engula mbili, abe etemapala kuswikila zhuba lingina, ndiko kwaanowobe atjenapala. 16Koga ha asasuka zwiambalo zwizwe kene asangula mbili, unowosenga nlandu uwe.”
Currently Selected:
Zwipo 17: KBTP
Highlight
Share
Compare
Copy
Want to have your highlights saved across all your devices? Sign up or sign in
Kalanga Bible © Bible Society of Botswana, 2008, 2018.
