Zwipo 15
15
Zwakatemapala zwinodwa mu mbili we nthu
1Yahwe bakadwa Mushe na Aroni bakati, 2Idwani bathu be Iziraela muti, “Ha nlume egwala tjigwele, kudotha kukwe kwakatemapala. 3Ngono oyu ndiwo nlayo ngekwe kutemapala kukwe ngekwe kudotha nenguba bulume gugwe guwungisa, kene azhalilika, kobe kuli kutemapala munli. 4Bulawo gumwe ne gumwe gunowagwa nge nthu unodotha gowotemapala ne tjimwe ne tjimwe tjaagala tjowotemapala. 5Ngono ungakutha bulawo gugwe asuke zwiambalo zwizwe, abe engula mbili, ngono atemapale kuswikila zhuba lingina. 6Ngono iye ungagala mu tjimwe ne tjimwe tjagagwa nge nthu unodotha asuke zwiambalo zwizwe, abe engula mbili, ngono atemapale kuswikila zhuba lingina. 7Ngono iye ungakuthana ne nthu unodotha asuke zwiambalo zwizwe, abe engula mbili, ngono atemapale kuswikila zhuba lingina. 8Ha nthu unodotha angathwila mate mu nthu mmwe wakatjenapala, iwoyo wathwigwa mate asuke zwiambalo zwizwe, ebe engula mbili, ngono atemapale kuswikila zhuba lingina. 9Sale yagagwa kene tjimwe ne tjimwe tjagagwa nge nthu unodotha akataswa tjowotemapala. 10Nthu ungakutha tjabe tjili gegwe nge nthu unodotha unowotemapala kuswikila zhuba lingina ne unosenga tjithu tjakajalo asuke zwiambalo zwizwe, abe engula mbili, ngono atemapale kuswikila zhuba lingina. 11Ha nthu unodotha angabhata mmwe nge maboko asakangugwa, iwoyo wabhakhwa asuke zwiambalo zwizwe, abe engula mbili, ngono atemapale kuswikila zhuba lingina. 12Tjija tje ntapkhwi tjabhakhwa nge nthu unodotha tjipkhwanyiwe ne tjimwe ne tjimwe tje lukuni tjisukwe nge vula.
13“Ngono ha nthu unogwala tjigwele alapiwa apola, azwibaligwe mazhuba ali kutendeka e kutjenapadziwa kukwe, abe esuka zwiambalo zwizwe, kakale angule mbili mu vula ye nsenya inowunga, unowobe atjenapala. 14Mu zhuba le buzhanakadzi atole njiba mbili kene ngurukukwana mbili, azhe mbeli kwa Yahwe ku nkoba we nshasha we bushanganilo, abe edzipa mpirisiti. 15Mpirisiti abe eyisa imwe ili tjibhayilo tje tjibi imwe ili tjibhayilo tjinopisiwa, mpirisiti abe en'gadzanya na Yahwe.
16“Ha nlume azwitjinya ngolasha mbewu ye bulume, angule mbili, abe etemapala kuswikila zhuba lingina. 17Ngono tjiambalo tjimwe ne tjimwe tjakathamwa nge jila kene nge ganda tjatebukigwa nge mbewu ye bulume, tjisukwe nge vula, ngono tjitemapale kuswikila zhuba lingina. 18Ha nlume ne nkadzi bawalilana thobo, bose bangule mibili, ngono batemapale kuswikila zhuba lingina.
19“Ha nkadzi ali mu mazhuba awe e kungula, agale akatemapala mazhuba ali kutendeka, ngono wankutha atemapale kuswikila zhuba lingina. 20Ngono tjimwe ne tjimwe tjaayizela mutjili kene tjaagala ali mu mazhuba awe tjowotemapala. 21Ngono wakutha bulawo gugwe asuke zwiambalo zwizwe abe engula mbili, ngono atemapale kuswikila zhuba lingina. 22Ngono wakutha tjimwe ne tjimwe tjaagala asuke zwiambalo zwizwe, abe engula mbili, ngono atemapale kuswikila zhuba lingina. 23Kungabe bulawo kene tjimwe tjagagwa nge nkadzi ali mu kungula kukwe, watjikutha unowotemapala kuswikila zhuba lingina. 24Ha nlume awalilana thobo ne nkadzi ali mu kungula kukwe, unowotemapala kuswikila mazhuba ali kutendeka, ngono bulawo gumwe ne gumwe gwaanolala muguli gowotemapala.
25“Ha nkadzi angangina mu kungula mazhuba manjinji, atangila mazhuba awe, kene angapitsha mazhuba e kungula kukwe, mazhuba wose iyawo unowodwilila ali mu kutemapala, koga se angabe ali mu mazhuba awe e kungula. 26Bulawo gwaayizela ne tjimwe ne tjimwe tjaagala mu mazhuba e kungula kukwe tjowotemapala. 27Ngono wakutha zwithu izwezwi unowotemapala, ngono asuke zwiambalo zwizwe, abe engula mbili, ngono unowotemapala kuswikila zhuba lingina. 28Koga ha apedza kungula kukwe, azwibaligwe mazhuba ali kutendeka, ngono shule kwa ipapo unowobe atjenapala. 29Ngono mu zhuba le buzhanakadzi atole njiba mbili kene ngurukukwana mbili, adziyise ku mpirisiti, ku nkoba we nshasha we bushanganilo. 30Mpirisiti ayise imwe ili tjibhayilo tje tjibi imwe ili tjibhayilo tjinopisiwa, ngono mpirisiti an'gadzanye na Yahwe ngekwe kutemapala kukwe.
31“Ndizo mugale makathubukanya bathu be Iziraela mu zwithu zwinobatemapadza, kuti basifile mu kutemapala kwabo ngotemapadza bugalo gwangu gumu bali.”
32Oyu ndiwo nlayo we nlume wakatemapadziwa ngogwala tjigwele nenge kuzwitjinya ngolasha mbewu ye bulume, 33nenge nkadzi umu mazhuba, kene kuli dotha kwe nlume kene nkadzi nenge nlume wawalilana thobo ne nkadzi wakatemapala.
Currently Selected:
Zwipo 15: KBTP
Highlight
Share
Compare
Copy
Want to have your highlights saved across all your devices? Sign up or sign in
Kalanga Bible © Bible Society of Botswana, 2008, 2018.
