Zwipo 14
14
Kuyengemadziwa shule kwe wapola mapele
1Yahwe bakadwa Mushe bakati, 2#Matewu 8:4; Mako 1:44; Luke 5:14; 17:14“Oyu ndiwo nlayo we n'gwele we mapele, ha apola, mu zhuba le kutjenapadziwa kukwe. Azhisiwe ku mpirisiti. 3Mpirisiti unowobhudila kuzhe kwe bukotokelo kanonlingisisa. Ndizo ha bugwele gwe mapele gwakapola, 4mpirisiti unolaula kuti kutogwe nyuni mbili dzinotjila dzakatjenapala ne lukuni gwe nti we nsida ne nsungo nshaba kwakabondelela ne denjana le hisopi. 5Ngono mpirisiti unowolaula kuti imwe nyuni ibulayigwe mu ndilo ye ntapkhwi ina vula yatjegwa mu nsenya iwunga. 6Mpirisiti unowotola nyuni inotjila ne lukuni gwe nsida ne nsungo nshaba kwakabondelela ne denjana le hisopi, ebe ezwidubika mu malopa e nyuni yabulawa akashangana ne vula yatjegwa mu nsenya iwunga. 7Mpirisiti unowonyasa nthu wapola bugwele gwe mapele unotjenapadziwa nge malopa katendeka, ndizo ebe eleba kuti watjenapala. Ebe eletja nyuni inotjila iwulukila ku shango. 8Iwoyo unowotjenapadziwa unowosuka zwiambalo zwizwe, ebe ekera mavudzi awe wose, ebe engula mbili, ndiko kwaanowobe atjenapala, shule kwa ikoko unowobe wobgwilila ku bukotokelo, koga unowogala kuzhe kwe nshasha uwe mazhuba ali kutendeka. 9Mu zhuba le kutendeka unowotesela mavudzi wose mu nsholo kakale ne ndedu ne siye dze mesho ne mavudzi wose mu mbili uwe. Ebe esuka zwiambalo zwizwe ebuya engula mbili, ndiko kwaanowobe atjenapala nge buzhalo.
10“Mu zhuba le buzhanakadzi unotjenapadziwa azhise pkhwizana ndume dzili mbili dzisina bulema ne pkhwizana hadzi ina gole ling'ompela isina bulema ne tjipo tje mathunde tje tjilizanyo tje seme thatu ye bgwisa gwakashanganyiwa ne mafuta angapa kung'ompela kwe butatu gwe le lithara ye mafuta. 11Ngono mpirisiti unontjenapadza aise nthu unotjenapadziwa ne zwipo izwezwi kuna Yahwe pa nkoba we nshasha we bushanganilo. 12Mpirisiti atole imwe ye pkhwizana ndume, aiyise ili tjibhayilo tje nlandu ne gaswa le lithara ye mafuta azwizunguze ili tjibhayilo tjinozunguziwa mbeli kwa Yahwe. 13Mpirisiti abhayile pkhwizana panobhayigwa tjibhayilo tje tjibi ne tjibhayilo tjinopisiwa, mu bugalo gwakayengemala, ngobe tjibhayilo tje nlandu tjonga tjibhayilo tje tjibi nge tje mpirisiti, tjakayengemala kwazo. 14Mpirisiti atole mamwe e malopa e tjibhayilo tje nlandu, ngono mpirisiti abhome pa theswi ye zebe ye luji ye unotjenapadziwa ne pa tjinyala tjikulu tje luboko gwe luji ne pa tjinyala tjikulu tje gumbo le luji. 15Mpirisiti atole mamwe e mafuta mu gaswa le lithara aadile mu tjiazha tjitje tje luboko gwe lumeshwe, 16abe edubika tjinyala tjitje tje luboko gwe luji mu mafuta amu tjiazha tjitje tje luboko gwe luji, abe enyasa mamwe mafuta nge tjinyala tjitje tjinotendeka katendeka mbeli kwa Yahwe. 17Ngono mafuta asala mu tjiazha tje mpirisiti aabhome pa theswi ye zebe ye luji ye unotjenapadziwa ne mu tjinyala tjikulu tje luboko gwe luji ne mu tjinyala tjikulu tje gumbo le luji, pezhugwi kwe malopa e tjibhayilo tje nlandu. 18Ngono mafuta asala mu tjiazha tje mpirisiti aadile mu nsholo we unotjenapadziwa. Ndizo mpirisiti unowon'gadzanya na Yahwe.
19“Ndizo mpirisiti unowobhaya tjibhayilo tje tjibi kugadzanya iwoyo unowotjenapadziwa kutemapala kukwe. Ngono shule kwa ikoku abhaye tjibhayilo tjinopisiwa, 20ngono mpirisiti unowopisa tjibhayilo tjinopisiwa ne tjipo tje mathunde pa tjibeso tjinopisigwa zwibhayilo. Ndizo mpirisiti unowogadzanya n'yengemadziwa na Yahwe, ndiko kwaanowobe atjenapala.
21“Koga ha ali nshayi usingake katubula kungapo, atole pkhwizana ing'ompela ye tjibhayilo tje nlandu kube tjipo tjinozunguziwa kuti agadzanyiwe na Yahwe ne kung'ompela mu gumi kwe eifa kwe bgwisa gwakanathiwa gwakashanganyiwa ne mafuta kube tjipo tje mathunde ne gaswa le lithara ye mafuta, 22ne njiba mbili kene ngurukukwana mbili, sekwa angatubula, ing'ompela inowobe ye tjibhayilo tje tjibi imwe ikabe tjibhayilo tjinopisiwa. 23Mu zhuba le buzhanakadzi unowozwiyisa ku mpirisiti kutjenapadziwa, pa nkoba we nshasha we bushanganilo mbeli kwa Yahwe. 24Ngono mpirisiti unowotola pkhwizana ye tjibhayilo tje nlandu ne gaswa le lithara ye mafuta, mpirisiti unozwitola zwili tjipo tjinozunguziwa mbeli kwa Yahwe. 25Mpirisiti unowobhaya pkhwizana ye tjibhayilo tje nlandu, ngono ebe etola mamwe e malopa e tjibhayilo tje nlandu eabhoma pa theswi ye zebe ye luji ya iwoyo unotjenapadziwa ne mu tjinyala tjikulu tje luboko gwe luji ne mu tjinyala tjikulu tje gumbo lile le luji. 26Ngono mpirisiti unowodila mamwe e mafuta mu tjiazha tje luboko gugwe gwe lumeshwe, 27ebe enyasa nge tjinyala tjitje tjinotendeka katendeka mamwe e mafuta amu tjiazha tjitje tje luboko gwe lumeshwe mbeli kwa Yahwe. 28Ngono mpirisiti unowobhoma mamwe mafuta pa theswi ye zebe ye luji ya iwoyo unotjenapadziwa ne mu tjinyala tjikulu tje luboko gwe luji ne mu tjinyala tjikulu tje gumbo le luji, ipo zwapo pabhong'wa malopa e tjibhayilo tje nlandu. 29Ngono mafuta asala amu tjiazha tje mpirisiti unowoadila mu nsholo we ntjenapadziwa kun'gadzanya na Yahwe mbeli kwa Yahwe. 30Ndizo unoyisa, njiba kene ngurukukwana sekwa angatubula, 31imwe ili tjibhayilo tje tjibi imwe ili tjibhayilo tjinopisiwa ne tjipo tje mathunde. Mpirisiti unowobe egadzanya unotjenapadziwa na Yahwe ngothama saikoku. 32Oyu ndiwo nlayo we nthu unogwala mapele, asingatubule zwibhayilo zwe kutjenapadziwa kukwe.”
Bugwele gwe mapele mu ng'umba
33Yahwe bakadwa Mushe na Aroni bakati, 34“Ha mungina mu shango ye Kanana, yandakamupa kuti ibe yenyu, ndibe ndilonga mapele mu ng'umba mu shango yandakamupa, 35mweni we ng'umba wakafanila yenda ku mpirisiti kunombudza nge kwago eti, ‘Ndabona madziba anonga e bugwele mu ng'umba yangu.’ 36Mpirisiti unowolaula kuti kudusiwe zwija zose mu ng'umba kutanga asathu kanolinga bugwele mukati kwayo, kuti kusidwe kutogwa kuti tjimwe ne tjimwe tjimu ng'umba tjakatemapala, kukoti kwadusiwa zwija ndiko mpirisiti kwaanowongina mu ng'umba kuyibona. 37Ngono unowonolinga bugwele, ngono ha bugwele guli mu guma le ng'umba nge mbala we bgwelele kene nge madziba mashaba, kakale ha guboneka gwakangina kwazo mu guma, 38ndizo mpirisiti unowobhudila kuzhe kwe ng'umba kaizhalila kwe mazhuba ali kutendeka. 39Ngono mpirisiti unowozha kakale mu zhuba le butendeka kuwolinga, ngono ha bugwele gwakabdzwila mu guma le ng'umba, 40mpirisiti unolaula kuti kudusiwe mabgwe akanging'wa nge bugwele aposegwe ku bugalo gwakatemapala kuzhe kwe nzi. 41Ngono unowothama kuti ng'umba ikukugwe mpharelo mukati kose, mpharelo wose wakukugwa ube unotebuligwa ku bugalo gwakatemapala kuzhe kwe nzi. 42Ndizo kube kunotogwa mabgwe apoga kunomisa akadusiwa, kuko kopharegwa guma butshwa.
43“Ha bugwele gungabgwililila ng'umba kakale, shule kwe mabgwe ne mpharelo zwadusiwa, kubuya kupharegwa, 44mpirisiti unowonolinga kakale, ngono ha bugwele gwabdzwila mu ng'umba, gowobe guli mapele anobulaya, ndizo ng'umba inowobe yakatemapala. 45Ng'umba iligiwe, mabgwe ayo ne mapango ne mpharelo wose zwinolashigwa kuzhe kwe nzi ku bugalo gwakatemapala. 46Ha kuna ungangina mu ng'umba iyeyi itjakazhaligwa, unowotemapala kuswikila zhuba lingina. 47Ha kuna ungayizela kene kajila mu ng'umba yakazhaliligwa bugwele asuke zwiambalo zwizwe.
48“Koga ha mpirisiti angazha kuwolinga ng'umba, kawana bugwele gusakabdzwila mu ng'umba, shule kwe kupharegwa kwe ng'umba, mpirisiti unowoleba kuti ng'umba yakatjenapala, ngobe bugwele gwakadusiwa. 49Kutjenapadza ng'umba iyeyi, ngaatole nyuni mbili ne lukuni gwe nsida ne nsungo nshaba ne denjana le hisopi. 50Ngono abulayile nyuni ing'ompela mu ndilo ye ntapkhwi ina vula yakatjegwa mu nsenya iwunga. 51Abe etola lukuni gwe nsida ne denjana le hisopi ne nsungo nshaba ne nyuni inotjila azwidubike mu malopa e nyuni yabulawa ne mu vula yakatjegwa mu nsenya iwunga, abe enyasa ng'umba katendeka. 52Ndizo atjenapadze ng'umba nge malopa e nyuni ne vula yakatjegwa iwunga mu nsenya ne nyuni inotjila ne lukuni gwe nsida ne denjana le hisopi ne nsungo nshaba. 53Abe eletja nyuni inotjila iwuluka ibhuda mu nzi iyenda ku shango, ndizo abe ethama ng'umba kuti iamutjilike, ngono inowobe yatjenapala.”
54Oyu ndiwo nlayo we bugwele gumwe ne gumwe gwe mapele, we ikulu, 55dziba le bugwele gwe mapele mu tjiambalo kene mu ng'umba 56ne londa kene kudzuka kene tjibadzi 57kulakidza ha kwakatemapala ne kwakatjenapala. Oyu ndiwo nlayo we bugwele gwe mapele.
Currently Selected:
Zwipo 14: KBTP
Highlight
Share
Compare
Copy
Want to have your highlights saved across all your devices? Sign up or sign in
Kalanga Bible © Bible Society of Botswana, 2008, 2018.
