Jowele 2
2
Zhuba La Yahwe
1Lidzani lunyanga mu Ziyoni,
longani mima inotjenjedza mu dombo langu lakayengemala.
Bagali bose be shango iyeyi ngabateteme,
ngobe zhuba la Yahwe laswika, labe pejo pejo,
2zhuba le zhalima lakatizwi, i zhuba linotjisa,
zhuba le makole, kwakatizwi.
Se zhalima dema lakafukidza matombo, babhayani bakasima be bunji gusibushoma banozha,
kuli kusakatongo shingikala mu misi ya ntolo,
kakale kusi kunowotongoshingikala mu misi yose inowozha.
3Moto unotjinya mbeli kwabo,
nthuto uthuta shule kwabo,
shango inonga nnda we Edeni mbeli kwabo,
koga shule kwabo konga tjilambanyika,
ngono akuna tjinobapudzumuka.
4 #
Zumbunulo 9:7-9
Banolingika se mbizi,
banolabuka se mbizi dze ngwa.
5Banolabuka bedzadzanya pezhugwi kwe matombo,
nsindo wabo unonga koloyi dze ngwa,
kuthathanyika se nthuto we moto upisa mashanga,
kunga babhayani bakasima bakalulwamisigwa ngwa.
6Mbeli kwabo zwitjaba zomanikana,
njiso dzose dzikafubala.
7Banolabuka se balume bakasima,
banotatha guma se babhayani,
mmwe ne mmwe unoyenda mu zijana iye,
ngono abatobhuda mu zijana dzabo.
8Naiko abatosundasundana,
mmwe ne mmwe unoyenda mu zijana iye.
Banopalama zwibhayano ne beyenda bewa,
akuna tjinobama mbeli.
9Banowila nzi nkulu;
banolabuka pezhugwi kwe makuma,
banotathila mukati kwe dzing'umba,
banongina nge mafesitere se mbava.
10 #
Zumbunulo 8:12
Shango inotengenyeka mbeli kwabo,
zhuzhugwi kozunguzika,
zhuba ne mwedzi zowotizwi,
tjedza tje nyenyedzi tjotundubala.
11 #
Zumbunulo 6:17
Yahwe banomilidza hwi labo mbeli kwe ngwa yabo.
Ngono ngwa yabo ihwulu seni ne bunji gusibushoma.
Iye unolondolodza dama labo wakasima kwazo.
Zhuba la Yahwe igulu kwazo kakale lotjisa.
Apa ndiani ungalidzikitadzila kene?
Yahwe banodanila bathu kushandukila ku bali
12“Ngono na ngwenu,” koleba Yahwe,
“shandukilani kundili nge moyo yenyu yose, nge
kuzwinyima zojiwa, mulila, kakale muli mu buyendasi.
13Palulani moyo yenyu kusi zwiambalo zwenyu.”
Shandukilani kuna Yahwe, Ndzimu wenyu,
Ngobe ibo bana ngoni ne lubu, bana moyonlefu,
abatotjimbidza gwadzamoyo, bazhele ludo, banozwidziba mu kuloba babi.
14Ndiani unoziba kuti pamwe swiyo bangashanduka bakamusiyila makombolelo, tjipo tje mathunde ne tje tjing'o zwili zwa Yahwe, Ndzimu wenyu.
15Lidzani lunyanga mu Ziyoni,
zibisani kuzwinyima zojiwa kwakayengemala,
danani gubungano lakayengemala.
16Kubunganyani bathu,
yengemadzani gubungano.
Kubunganyani bahwola,
kubunganyani bana
nenge ngawana dzinomwa.
A nloboli abhude mu ng'umba iye
ne nlobogwa mu bulalo gugwe.
17Bapirisiti bashingili ba Yahwe,
balile bali pakati kwe tjibeso tjinopisigwa zwibhayilo ne nkoba we Ng'umba ye Ndzimu,
ngono bati, “Yahwe, tjidzani bathu benyu.
Musiletje lukata gwenyu gukalengudziwa,
musiletje zwitjaba zwibanyenya.
Kowobe tjini ha bangahwiwa
nge bathu beti, ‘Ndzimu wabo ungayi kene?’ ”
Ndzimu unobuzila shango fumwa
18Ipapo Yahwe bakabe ne fupa ngekwe shango yabo,
ngono bakahwila ngoni bathu babo.
19Yahwe bakadabila bathu babo bakati,
“Bonani, ndomuzhisila mathunde ne nkumbi we zhambi ne mafuta,
ngono zowomugutsha.
Andingatjayite
kuti mulengudziwe pakati kwe zwitjaba.
20Ndowosedzedza ngwa ye bunandzwa kutjena namwi,
ndowobatatila kwakawomelela, shango kwaisingamele tjimwe.
Babhayani bambeli banowotatigwa mu gungwa guku bhezhuba.
Bhayani bashule banowotatigwa mu gungwa guku golombedzo.
Kowobe ne ithungethunge tje nnuhwo wabo.
Nnuhwo wabo unowobe wakapindilila,
ngobe bakayita zwithu zwikulu kulu.
21“Usitongotja iwe shango,
ushathe upembele,
ngobe Yahwe bakayita zwithu zwikulu kulu.
22Musitongotja, imwi phuka dze shango,
ngobe fulo iyapo shango yakamuka.
Miti ye mitjelo inozwala,
mipaya ne mizhambi yakakulumula.
23“Shathani kaa, bana be Ziyoni!
Mushathile Yahwe Ndzimu wenyu,
ngobe bamupa vula ye nseulo nge ndulamo,
bakamutebulila vula ye nseulo
ne vula ye mbodzamashanga sa ntolo.
24Mbuwa dzowozhala mathunde,
hali dzinokutunuligwa dzowozhala
dzikatebuka nkumbi we zhambi ne mafuta.
25Ndowomubuzila kwe makole iyawaje
kwakabe kwajiwa nge zwiwong'wani
ne phashu ne magutegute ne phashwana,
ili ngwa yangu hwulu yandakatumila pakati kwenyu.
26Mowowana zojiwa zwinjinji, ngono mowoguta.
Mowokudza zina la Yahwe Ndzimu wenyu,
ibo bakamuthamila makaabadzo.
Bathu bangu abatjowofa babhakhwa nge shoni kakale.
27Ndizo mowoziba andilipo pakati kwe Iziraela,
kuti ndimi Yahwe, Ndzimu wenyu,
akuna mmwe kakale, ndodwa!
Bathu bangu abatjowofa babhakhwa nge shoni.
Zhuba la Yahwe
28“Shule kwa ikoku, ndowodelusila meya yangu mu bathu bose.
Bakololo ne bakololokadzi benyu banowolebesambeli,
bathuntana benyu banowowolota,
bazhuzha benyu banowobona mibono.
29Mu misi iyeyo,
ndowodelusila meya yangu ne mu balanda,
bose betjilume ne betjikadzi.
30“Ndowolakidza makaabadzo pezhugwi na pasi,
malopa, moto, ne bhulubusi linothungayila.
31 #
Matewu 24:29; Mako 13:24, 25; Luke 21:25; Zumbunulo 6:12, 13 Zhuba lowoshanduka likabe zhalima
mwedzi ukashanduka ukabe malopa,
zhuba gulu linotjisa la Yahwe lisathu likaswika.
32 #
Mishingo 2:17-21
#
Baroma 10:13
Ndizo mmwe ne mmwe unodana zina la Yahwe unowotjidziwa,
sekwa kwakaleba Yahwe,
‘Ngobe mu Dombo le Ziyonine mu Jerusalema kowobe ne jidzo,
muna bakatjila ibo Yahwe babanowodana.’ ”
Kalanga Bible © Bible Society of Botswana, 2008, 2018.