Jowele 1
1
1Dama la Yahwe lakazha kuna Jowele, nkololo wa Phetuwele.
Juda unowigwa nge golomodzo le phashu ne bhamba
2Teedzani imwi bathuntana!
Zhulani zebe mose bagali be shango iyeyi!
Apa kwakatongo shingikala kwakajali mu misi ye bupenyu gwenyu,
kene mu misi ye bupenyu gwa bobatategulu benyu kene?
3Budzani bana benyu ngekwako,
bana benyu babudzebo bana babo,
bana be bana benyu babudzebo bana babo.
4Kwakasiyiwa ne zwiwong'wani phashu dzakaja.
Kwakasiyiwa ne phashu magutegute akaja.
Kwakasiyiwa ne magutegute phashwana dzakaja.
5Mukani imwi zwidakwa, mulile!
Kuwani mose imwi bang'wi be nkumbi we zhambi!
Kuwani ngobe matolegwa nkumbi unozipa pa milomo.
6 #
Zumbunulo 9:8
Itjaba tjakasima tjangina nge ngwa mu shango yangu.
Tjina masimba ne bunji gusibunji,
tjina meno anonga e shumba,
matungashulo atjo anonga e shumbakadzi.
7Tjakathukudza mizhambi yangu,
tjakakumba mipaya yangu.
Tjakasubula makwati tjikaalashila pasi,
thabi dzayo dzatjisala dzili tjena.
8Lilani se phokosha yakazwipomba nge jila le saka,
ili mu tjililo ngekwe nlume wakabe akambigilidza.
9Tjipo tje mathunde ne tjipo tje tjing'o, zwakadzibisiwa kuyisiwa ku Ng'umba ya Yahwe.
Bapirisiti bashingili ba Yahwe, banolila.
10Minda yathukudzika yabe makula,
ne pasi panolila,
ngekuti mathunde akathukudziwa,
nkumbi we zhambi unozipa wakapela,
mafuta e ntoba akapela.
11Sunamwani imwi balimi,
lilani imwi balimi be nnda we mizhambi,
mulilile koroni ne mathunde e bhali,
ngobe minda yakafa.
12Mizhambi yakafa,
mipaya yakawoma,
pomegiranati, nlala ne apuli,
miti yose imu nnda yakawoma.
Ee, nenge bathu bapelegwa nge shatho.
13Muzwipombe mulile imwi Bapirisiti,
lilani imwi bashingili be tjibeso tjinopisigwa zwibhayilo.
Izhani bashingili be Ndzimu wangu, mupitshe busiku makazwipomba nge jila le saka,
ngobe tjipo tje mathunde ne tje tjing'o zwakadzibisiwa mu Ng'umba ye Ndzimu wenyu.
14Muzwimisile kuzwinyima zojiwa!
Danani gubungano lakayengemala!
Kubunganyilani sholotjena ne bagali bose be shango,
ku Ng'umba ya Yahwe Ndzimu wenyu,
ngono mulilile kuna Yahwe.
15 #
Isaya 13:6
Yee mme wee, ilelo zhuba!
Zhuba la Yahwe lasedzela.
Lozha se golomodzo linodwa ku Ndzimu Masimbawose.
16Apa zojiwa azwizoshandusiwa mu mesho edu
ne kushatha ne ipepkhwe mu Ng'umba ye Ndzimu wedu kene?
17Mbewu inoputa ili kusi kwe mavinga,
ng'umba dze mabiganyilo dzowa.
Matula akapkhwanyika,
ngobe mathunde akafa.
18Zwithuwo zogomela seni!
Ng'ombe dzakadzimila koga,
ngobe kusina fulo,
nenge ngubi ye pkhwizi inodziyila.
19Ndolilila kumuli, Yahwe,
ngobe moto wakapedza fulo mu shango,
nthuto ukapisa miti yose ye shango.
20Nenge phuka dze shango dzomulilila,
ngobe hwobana dzakapkhwa ne
moto wakapedza fulo mu shango.
Kalanga Bible © Bible Society of Botswana, 2008, 2018.