Jobe 8
8
1Bhilidadi we N'shuhi kashandula eti,
2“Apa kowodza kukabe lini wakabhata uleba zwithu izwezwi kene?
Matama e nlomo uwo i phepo isishoma!
3Apa Ndzimu unotongo peyamisa ndulamo kene?
Apa Masimbawose unotongo peyamisa tjakatambunuka kene?
4Ha bana babo bauthamila tjibi,
wakabaloba shamu yakalingisana tjibi tjabo.
5Koga iwe ha ushaka Ndzimu,
ukumbila iye Masimbawose,
6ha uli mbuyanana kakale wakatambunuka,
nge malebeswa unowomilika kakumilila,
ngono kakubgwilizila zwakakulingisana.
7Nenguba kutangisa kuko kwakabe kuli kutukununu,
misi imbeli kowobe kukulu.
8“Bhuzwa ba ntolo ndokukumbila,
ngono ubone kuti bobatategulu babo bakazwidiyani,
9ngoti iswi takazwagwa madekwe akuna tjatinoziba,
ne mazhuba edu mu shango mitutshi koga.
10Apa abangakudiye bakakubudza tjimwe wali?
Apa abangalebe matama anodwa mu hwisiso yabo kene?
11“Apa litokwe gungamela pasina dope kene?
Apa lushanga gungapasula pasina vula kene?
12Zoti zwitjakula zwisathu zwikatemiwa,
zwikabuna tjinyolotjo kupinda mimwe miti.
13Kwakajalo ndiyo zila ya bose banokangang'wa Ndzimu,
kugalabgwe kukwe kon'pelela iye usina Ndzimu.
14Kugalabgwe kukwe konga jegwa linofa
kugalabgwe kukwe konga ludandi gwe tjibubi.#8:14 Kugalabgwe…tjibubi: Tjihebheru atjitohwisisika.
15Unonaila ng'umba iye, koga aitoma,
unozwibhatilila nayo ngono aitosima.
16Unonga nti unodilidzigwa nenguba kuli zhuba
midzi yawo yakawala mu nnda.
17Midzi iye inozwipomba mu mabgwe,
unoshaka bugalo mu mabgwe.
18Koga ha angasimugwa pa magalo awe,
magalo anozwin'landula eti, ‘Andithu akubona.’
19Nge lebeswa ndiko kushatha kwe zila iye,
koga mu mavu mimwe miti inowomela.
20“Nge malebeswa Ndzimu autolamba nthu usina nlandu,
kene kubhatsha banothama mbipo.
21Koga unowozhadza nlomo uwo nge tjiseko,
milomo iyo inozhala nsindo we mpululu!
22Koga ibabo banokubenga banowobhakhwa nge shoni,
ne mishasha ye babi aitjowobepo.”
Kalanga Bible © Bible Society of Botswana, 2008, 2018.