Jobe 6
6
1Ipapo Jobe kashandula eti,
2“Dumbu shungu yangu ha ingabe ingayegwa,
mang'oni angu wose kabigwa mu zwiyelo,
3nge lebeswa angalema kupinda nsetje we gungwa,
ndizo dumbu matama angu epitsha zwingapa.
4Ngoti misebe ya Masimbawose imundili
meya yangu inong'wa bushongola gwayo,
Kutjisa kwe Ndzimu kwakandilingisana.
5Dumbu donki ye shango ingalilila zojiwa ina fulo kene?
Kene ng'ombe ingalilila zojiwa yakabhata ija kene?
6Apa zojiwa zwisina n'jo zwingajika zwisina mwenyu kene?
Kene kutjena kwe bumbulu#6:6 kutjena kwe bumbulu: Tjihebhuru atjitohwisisika. kungazipa kuli koga kene?
7Moyo wangu unoti zwi ha ndibona zojiwa zwakajali,
zojiwa zwakajali zondibuzisa moyo.#6:7 Moyo…moyo: Tjihebhuru atjitohwisisika.
8“Ungati ndingawana tjandinokumbila,
ungati Ndzimu ungandipa tjandinoyemula.
9Ungati kunga shathisa Ndzimu kundipeleledza,
ungati ungatambunudza luboko gwawo ukandithubulila kutjena!
10Ipapo ndingabe ndowobe nditjina kunyaladzika,
ndabe ndowoshatha nenguba ndili mu zogwadza zwingapani,
ngoti andizonyanyayidza matama e Wakayengemala.
11Dumbu simba langu ndilipi kuti ndingadzikitadza kene?
Kakale bhelelo langu ini kuti ndingabe moyo nlefu kene?
12Apa simba langu longa simba le bgwe kene?
Apa mbili wangu unonga phangula kene?
13Apa ndina simba kuzwibhatsha kene?
Bhudilila kwatatiwa mundili.
14“Iye wakadziyidzika wakafanila thamigwa buthu nge nkwinya uwe,
nenguba angadwa akafupatila kutja Masimbawose.
15Koga imwi zwikamu zwangu mu batjengedzi,
motjengedza se lukobana gunotuta makuni,
16guna vula ina kapuku ne makaa akazwisumbika,
17koga kuti mu tjibaka tjekupisa enyawuka,
kuti kopisa enyelela mu magalo awo.
18Bayendi banopambuka mu zila yabo betola zila ipoga,
bakayenda mu shango yakawomelela ngono bakafa.
19Bayendi be Tema banoshaka vula,
bayendi be Sheba banoishaka vula nge kugalabgwe!
20Banotemeka mafupa ngoti babe begalabgwe,
banoswika pa lukobana ngono bakapuna moyo.
21Saikoku ndiko sekwa muli iko kundili,
mobona tjiga tjandiwila ngono motja.
22Apa ndatongoti, ‘Mundipe tjipo?’
Kene kuli kuti, ‘Mu fumwa yenyu mundipe tjizwimba nlomo kene?’
23Kene kuli kuti, ‘Mundiangule mu luboko gwe tjita kene?’
Kene kuli kuti, ‘Mundidzutunule mu luboko gwe batshambilidzi kene?’
24“Mundidiye, ndowonyalala,
Ndakatjinyani? Munditjenesele.
25Lebeswa logwadza seni!
Koga kutjemela kwenyu kotjemelani?
26Apa mungati motjemela matama kene,
ngono mutola matama e nthu wazwitoboka se phepo koga kene?
27Mubuya mukalobela siyang'wa hakata,
mubuya muteetshanya nkwinya wenyu.
28“Koga ngwenu, shathilani kundilinga,
andingatjanyepe mbeli kwenyu.
29Shandukani kaa, letjani kulelekela ntome, ndomukumbila.
Shandukani kaa, imi andina nlandu ipapa.
30Kene kuna salulwama mu nlomo wangu?
Kene moti anditoziba lebeswa kene?
Kalanga Bible © Bible Society of Botswana, 2008, 2018.