Jobe 42
42
1Ipapo Jobe kashandula Yahwe eti,
2“Ndoziba kuti mungathama zwithu zose,
tjamakazwimisila kutjithama akuna tjingamudzibila.
3 #
Jobe 38:2
‘Ndiani iwoyu unosumbika gumbuludzo ngosaziba kene?’
Ndizo ndaleba zwandabe ndisinga hwisise,
zwithu zwakandipinda, zwandakabe ndisingazibe.
4 #
Jobe 38:3
Mandidwa muti, ‘Tongoteedza ndowolebeleka!
Ndowokubhuzwa iwe undidabile.’
5Ndagala ndihwa koga nge kwenyu,
koga ngwenu mesho angu amubona.
6Ndizo kee, ndozwishima,
ndoshandukila jinyo langu ndili mu hwuluba ne nlota.”
Matama e bupelo
7Shule Yahwe basino kulebeleka na Jobe matama iyawa, bakadwa Elifazi we N'temani bakati, “Bushongola gwangu gwakulingisana iwe ne bakwinya babo babili, ngoti akuna tje malebeswa tjamaleba nge kwangu sa Jobe nlanda wangu aleba. 8Ndizoke tolani mikono ili kutendeka ne nyundo dzili kutendeka muyende ku nlanda wangu Jobe ngono mudziduse dzili zwibhayilo zwinopisiwa. Nlanda wangu Jobe unowomutembezelela, ngono imi ndowodabila ntembezelo uwe asithame kuyendidzana nge bulengwe gwenyu, ngoti amuzoleba tjakalulwama nge kwangu, Jobe nlanda wangu sekwa athama.”
9Ndizo Elifazi we N'temani na Bhilidadi we N'shuhi na Zofa we N'namathi bakayenda bakathama tjabadwiwa ndi Yahwe, ngono Yahwe bakaamutjila ntembezelo wa Jobe.
10 #
Jobe 1:1-3
Yahwe bakabgwilizila Jobe fumwa iye asinotembezelela bakwinya babe, Yahwe bakapa Jobe kwakawanda kabili muna kwaakabe anako kutanga.
11Ipapo kukazha kunli bana ba tate babe bose ne hazwadzi dzidze dzose na bose bakabe benziba ngono bakaja zojiwa naye mu ng'umba iye. Bakan'nyaladza ngekwe bubi gwakabe gwazhisiwa ndi Yahwe munli. Mmwe ne mmwe wabo kampa mari ne rin'gi ye golide.
12Yahwe bakakombolela Jobe kudwa ipapo kupinda mu tjibaka tje kutanga: Wakabe ne danga le pkhwizi dzili zwiwulu zwili gumi lina bunna (14 000) ne kamela dzili zwiwulu zwili tathatu (6 000) ne majokwi e ng'ombe ali tjiwulu (1 000) ne madonki makadzi ali tjiwulu (1 000). 13Jobe wakapiwa bakololo bali kutendeka ne bakololokadzi bali batatu. 14Ngono katumila nkololokadzi hwola eti, “Jemima,” we bubili kampa zina eti, “Keziya,” we butatu kati ndiye “Kerenihapuki.” 15Akuna mu shango yose kwakatongo wang'wa bakadzi bakanaka se bakololokadzi ba Jobe ngono tate babo bakabapa gobe le lukata gwabo pakati kwe hazwadzi dzabo.
16Shule kwa ipapo Jobe kadwapo katjila makole ali zana ling'ompela lina makole ali makumi manna (140), kabona bana babe ne bana be bana babe kunoti ku tjizekugwana tje bunna. 17Shule kwa ikoku Jobe kafa akula kwazo ana makole ali manjinji.
Kalanga Bible © Bible Society of Botswana, 2008, 2018.