Jobe 41
41
1 #
Njimbo 74:14; 104:26; Isaya 27:1 “Apa ungadusa zhithu le gungwa linoyi Livatani nge hwuka kene?
Kene kuli kusungilila lulimi gwalo nge ntjili kene?
2Apa ungalonga nsungo mu zwimilo zwalo kene?
Kene kuli kulonga hwuka mu shaya dzalo kene?
3Apa lingakukumbila kene?
Apa lingalebeleka nawe nge matama manyolo kene?
4Apa lingathama tjidumano nawe kene,
tjekuti lowobe nlanda uwo butjilo gwalo gose kene?
5Apa ungazana nalo se unozana ne nyuni kene,
ungayenda yenda nalo wakalilonga nsungo kulilakidza badwana kene?
6Apa babhati be hwobe bangaliyingidza kene?
Apa bangalithubukanyila batengi kene?
7Apa ungazhadza mathumo mu ganda lalo kene?
Kene kulikubhaya nsholo wayo nge mihwa kene?
8Biga maboko mulili ubone, autjofa wakuma kakale,
autofa wakakangang'wa dzulana kwamunowodzulana.
9Bona, kugalabgwe kwe nthu wuzwibiga ludandi mu mesho,
aelibona koga, unohwa epelegwa akalilinga.
10Akuna ndodwa ungalitanga.
Apa ndiani ngono ungama akalingisana nami kene?
11Apa ndiani wakatongo ndipa tjimwe ndin'bgwilizile itjo?
Tjimwe ne tjimwe tjimu shango yose ngetjangu.
12“Ima ndikubudze ngekwe makumbo e zhithu le gungwa,
ndikubudze kuti lakasima kakale lina masimba kungapani.
13Apa ndiani ungaliambula ganda lalo kene,
ungapubula ganda lalo nge mbambo kene?
14Apa ndiani ungazhula nlomo walo kene?
Meno alo anotjisa nge zila dzose koga.
15Ikamba tjalo zwivikili zwakatathikana
zwakabhatshanyiwa kwakasima tjose,
16tjimwe ne tjimwe tjiwunde ne tjimwe,
akuna ndodwa ne phepo inongina pakati kwazo.
17Zwakabhatshanyiwa kwazo,
zwakanamatilana kwa zwisinganamutshuke.
18Alitshimuta kobhuda nthuto,
mesho alo anonga mazazi e kuyedza.
19Mu nlomo walo kobhuda mithuto ye moto,
sasi dzowuluka dzibhuda mulili.
20Zwimilo zwalo zothungayila busi,
se hali inobila ili mu moto we hwuni dze mpani.
21Nfemo walo unobhatidza masimbe,
mu nlomo walo kobhuda bhuba le nthuto.
22Ntshibha walo wakasima,
kutjisa ku mbeli kwayo.
23Mabundi e nyama dzayo akatathikana,
akasima aatozunguzika, ndodwa.
24Lina moyo wakasima se bgwe,
se bgwe le gwiyo litjakusi.
25Ali milika lotetemesa bakasima,
bakahwumanyiwa nge lutjo.
26Nenguba nthu elibhaya, thumo akuna tjalinothama,
akuna bukano kene nsebe ungalihwisa zogwadza.
27Butale golitola se lushanga,
ne phangula se lukuni gwakabola.
28Misebe aitothama kuti litizhe,
mabgwe e tjivirimabgwe anonga bunye kulili.
29Swimbo golitolabo se lushanga koga,
loseka ibabo banoliposa nge mathumo.
30Makwapa alo akusi anopitsha se zwiyenga,
anoyenda etsha pasi esiya nkwala se tjileyi.
31Lobidza vula ye gungwa se hali inobila,
likaithama kuti ikapaile se hali ye mafuta.
32Lothama kuti palapinda vula isale ipenya,
likasiya gungwa gwaka kapa mafulo.
33Akuna tjimwe tjinofanana nalo mu shango yose,
tjibumbiwa tjisingatje tjimwe ndodwa.
34Lolingilila zose zwikulu lisingatje tjimwe,
ndilo she muna zose zwinozwibona.”
Kalanga Bible © Bible Society of Botswana, 2008, 2018.