Jobe 34
34
1Ipapo Elihu kati,
2“Ihwani matama angu, imwi balume bakatjenjela,
mundibhulutane, imwi banoziba,
3Zebe dzohwa kene matama ezipa,
koga se lulimi gulabila zojiwa kuti kene zozipa.
4Ngati shaluleni tjakalulwama,
ngatiboneni pakati kwedu kuti tjakalulwama ini.
5Ngoti Jobe iye wati, ‘Andina nlandu,
koga Ndzimu unolandula ndulamo yangu,
6nenguba ndisina nlandu, ndotogwa ndili nnyepi,
mbonje yangu aitopola nenguba ndisina tjandatjinya.’
7Ndiupi nthu unonga Jobe kene,
iye unong'wa madado se vula kene?
8Unogala ntutshi ne banothama mbipo,
unoshingidzana ne bathu babi.
9Unoti, ‘Akutobhatsha tjimwe
kushathila Ndzimu.’
10“Ndizo mundibhulutane imwi balume be hwisiso,
ngakube kule kule ne Ndzimu kuti ungathama bubi,
kukule na Masimbawose kuti ashinge tjisiitjo.
11 #
Njimbo 62:12
Unopa bathu mbayilo kuyendidzana ne zwabathama
unopa mmwe ne mmwe kwa kanfanila.
12Ngelebeswa Ndzimu aaungathame bubi
Masimbawose abangapambuse tjakatambunuka.
13Apa ndiani wakaupa simba le kulaula shango kene,
ndiani wakaupa ndaulo ye shango yose kene?
14Ha Ndzimu ungazwitolegwa meya yawo,
ukazwikubunganyigwa mafemo awo,
15ipapo bathu bose babe bewofa,
bebgwilila mu hwuluba.
16“Ha una kuhwisisa, ihwa woku,
bhulutana tjandinoleba.
17Apa iye usingade ndulamo ungabusa kene?
Apa ungasola iye wakalulwama ne una masimba?
18Apa ate iwo unodwa bomambo uti ate betjimwe kene?
Apa ate iwo unodwa banotolegwa pezhugwi uti babi kene?
19Automa ne balauli
kene kuli kutolela bafumi pezhugwi kupinda bashayi,
ngobe ibo bose nshingo we maboko awo.
20Tingana tikafa takafala busiku.
Ndzimu unotiloba tikafa
bakasima unobalabhulila kutjena nge tjinyala.
21“Ngoti mesho awo anobona zila dze nthu,
unobona thambo dzidze dzose.
22Akuna zhalima lakati zwititi,
lingabgwata banothama bubi.
23Ndzimu autosheta kuti ungabigila nthu tjibaka,
kuti azhe mbeli kwawo mu kusumikilisiwa.
24Unolobesa bana masimba kuzhe kwe kushakisisa,
kabiga bamwe mu magalo abo.
25Ngobe unoziba zwabanothama,
unobadusila kutjena kabalobesa tjinyolotjo.
26Unoloba shamu banothama bubi,
mbeli kwe mmwe ne mmwe akalinga,
27ngobe bakaufupatila,
bakasibe ne hanya nge zila dzawo.
28Bakakombeledza bashayi kuti balilile ku Ndzimu
ngono ukahwa tjililo tjabo bekumbila bhatsho.
29Ngono koga ha Ndzimu unganyalala zwawo,
ndiani ungautilika nlandu kene?
Ha ungasumbika buso gwawo, ndiani ungaubona kene?
Ngoti upezhugwi kwe itjaba ne nthu ngofanana,
30ngoti akuna nthu usina Ndzimu ungabusa,
ngoti ungayisa bathu ku ndashiko koga.
31“Kuna wakatongoti ku Ndzimu,
‘Ndi nlandu koga anditjowotjinya kakale,
32undidiye tjandisingabone,
ha ndina nlandu, anditjowothama kakale.’
33Apa unoti uthame tjinoshakwa ndiwe kene,
koga iwe ulamba kushanduka kene?
Ndiwe wakafanila kutola thambo kusi imi,
Ndizo kee leba tjaunoziba.
34Bathu bana hwisiso banoti kundili,
ne wakatjenjela unohwa tjandinoleba unowoti,
35‘Jobe unoleba ngoshaya luzibo,
matama awe aatopa tjedza.’
36Kanukani tjinolebgwa ndi Jobe,
nge kuti unolebeleka koga se nthu mbi.
37Unopapha jinyo lile nge kupanduka,
unodadila Ndzimu mbeli kwedu,
unowatsha matama awe enyanyayidza Ndzimu.”
Kalanga Bible © Bible Society of Botswana, 2008, 2018.