Jobe 22
22
Ndebesano ye butatu
(22:1—27:23)
1 #
Jobe 35:6-8
Ipapo Elifazi we N'temani kadabila eti,
2“Apa nthu ungabhatsha Ndzimu ngeni?
Apa naiye unoyi ntjenjedu ungaubhatsha kene?
3Apa kuna tjinoshathisa Masimbawose ha uli nlulwami,
kene kuna tjinoubuyila ha ululwamisa zila dzidzo kene?
4Apa ndi ngekwe kutja Ndzimu kuko kunothama kuti ukutjemele,
kwaunodza ukakusumikilisa kene?
5Atenditi ndi ngekwe bubi gugo bukulu kene?
Akuna bhelelo mu milandu iyo.
6Ngoti wakalipisa bana ba tate babo basina nlandu,
ukabaambula zwiambalo zwabo bakasala bali mbujo.
7Wakanyima wakanyala vula kuti ang'we,
ukanyima una zhala zojiwa.
8Shango ngeye nlume una masimba!
Unokudziwa unogala muili.
9Wakatatila tjilikadzi kutjena dzakalembedza maboko,
ukapkhwapkhwata siyang'wa maboko.
10Ndizo ngwenu mapuzhu akakupoteleka,
tjinyolotjo unowigwa ngekutja kukulu.
11Tjedza tjitjo tjatjiti zwititi autjabona ne bona,
nkubila we vula unokukulila.
12“Apa Ndzimu autogala pezhugwizhugwi kene?
Bona nyenyedzi kuti dzizhuzhugwi tjini!
13Ngono iwe ukati, ‘Apa Ndzimu unozibani wali?
Apa ungasumikila uli yeno kwe makole tjini wali?
14Makole matema akaufukidza kuti ndizo usibone,
unoyenda yenda mu tjilungwane tje zhuzhugwi.’
15Apa unowobhatilila mu zila dza ntolo,
dzakabe dzitobegwa nge babi kene?
16Bakadzamugwa tjibaka tjabo tjisathu tjaswika,
thiwa dzabo dzikasengwa nge nkubila.
17Bakadwa Ndzimu bakati, ‘Idwani patili.
Masimbawose ungatithamani wali?’
18Nenguba uli iwo wakazhadza ng'umba dzabo nge zwithu zwakanaka,
dumbu, gumbuludzo le babi ngalibe kutjena nami!
19Balulwami banokubona ngono bakashatha,
basina nlandu banoseka bakadada beti,
20‘Nge malebeswa zwita zwedu zwalobesiwa,
ne thundu dzabo dzakasala dzajiwa nge moto.’
21“Ndizoke uzwigadzanye ne Ndzimu, ube ne mbakiso nawo,
ngekujalo unowozhigwa ne makombolelo.
22Amutjila tjaunolayiwa kaa, tjinodwa mu nlomo wawo,
ubiganye matama awo mu moyo uwo.
23Ha ubgwilila kuna Masimbawose, unowokubgwiliza mu tjimo tjitjo
ha udusila kutjena kushaya ndulamo mu nshasha uwo,
24ha ulashila kutjena golide ku hwuluba,
ne golide ye Ofiri mu mabgwana amu mikuku,
25ipapo Masimbawose banowobe golide iyo,
ne siliva iyo yakanaka,
26ipapo unowoshatha muna Masimbawose,
ukalingisana nabo usina shoni.
27Unowobatembezela bakakuteedza,
ndizo unowoshingikadza kutuna kuko.
28Muna tjaunozwimisila thama tjowoshingikala,
ne tjedza tjowopenya mu zila dzidzo.
29Ha bathu bedelusigwa pasi iwe unowoti, ‘Ngabamilidziwe’
unowotjidza banozwiyisa pasi.
30Unowosunungula na iye usina nlandu,
iye unowosunungugwa nge bubuyanana gwe maboko awo.”
Kalanga Bible © Bible Society of Botswana, 2008, 2018.