Jobe 21
21
1Ipapo Jobe kashandula eti,
2“Teedzani mu bhulutane matama angu,
etjo nditjo koga tjingabe nyaladzo yangu.
3Musindinyalile moyo, ima ndowolebeleka,
shule kwe ndalebeleka ukowondidadila zo.
4Apa imi, kung'on'gola kwangu ndokulingisa ku nthu kene?
Ini ndakafanila kuti ndisipele meya?
5Mundilinge, mutjename,
mubhate milomo.
6Andikumbula nge kwako, ndotetema,
anditjina gwangu mbili wangu unotetema koga.
7Ini babi betjila,
bedzina bekwegula, masimba abo epaphidzika kene?
8Bana babo bagele baligedzikane mbeli kwabo,
bana be bana babo banokulila mu mesho abo.
9Ng'umba dzabo dzakabakililika akuna tjinobatjisa,
shamu ye Ndzimu aitobaloba.
10Nkono uwe unokwiila usina mang'oni
ng'ombe mayi ina luzwalo aitosodza.
11Banozhulila bana babo se pkhwizi,
ngono bana babo bakatamba tamba.
12Banomba belidza dzithamborini ne matende
beshathila milidzo ye zwilidzo.
13Banotjila zwinozipa mazhuba wose,
nge mbakiso banoyenda ku bugalo gwe bafi.
14Banoti ku Ndzimu, ‘Idwani patili,
atitoyemula kuziba zila dzenyu.
15Masimbawose ndiani, watingashwa tishingila kene?
Kakale towobuyigwa ngeni atintembezela?’
16Bonani, kubhudilila kwabo ate kuli mu maboko abo kene?
Gumbuludzo le babi ndomila kule nalo.
17“Apa ndikangana luvone gwe babi godzimiwa kene?
Apa mbatsha dzabo dzobawila kangana kene?
Apa Ndzimu unosodelusila bushong'ola gwawo mu bali kangana kene?
18Apa ndikangana betutudziwa se lushanga nge phepo kene,
se bunye gunosengwa nge matutu kene?
19Moti, ‘Ndzimu unobigila mwana shamu ye nlandu wa tate babe.’
Ndzimu ngaulobe shamu iye wakafanigwa ne lobgwa,
ngauthame uijalo kuti azibe kuti unolobegwa zwibi zwizwe.
20Ngaabone golomodzo lile nge mesho awe,
ngaang'we bushongola gwa Masimbawose.
21Ngobe dumbu ini tje nsha uwe tjingan'dziyidza asinokufa,
ha mimwedzi ye bupenyu gugwe ithubugwa kene?
22Apa nthu ungadiya Ndzimu luzibo kene,
iwo unosumikilisa bamu magalo a pezhugwi kene?
23Mmwe unofila mukubhudilila kukwe,
aligele akaliga makumbo akabakililika,
24mbili uwe unokwidzima,
mafupa awe azhele mongo.
25Mmwe nthu unofa ali mu kuhwa zogwadza,
asatongo labila nzipo we butjilo.
26Bose banoizedziwa panofanana mu hwuluba,
bejiwa nge hwonyana ngofanana.
27“Bonani, ndoziba njalakang'wa dzenyu,
ne mikumbulo yenyu kunditanga.
28Mobhuzwa muti, ‘Ng'umba ye nkololo we bushe ingayi,
nshasha wakabe ugagwa nge babiibi ungayi?’
29Apa makatongo bhuzwa bapindi be zila kene?
Apa amutoduma zwabanoleba kene?
30Kuti mbi unotjidziwa mu zhuba le mbatsha
ne kuti unotjidziwa mu zhuba le bushong'ola kene?
31Ndiani ungambudzilila mbeli kukwe,
kene unontjemelela zwaakathama kene?
32Ha eyisiwa ku ikumbu,
kobigwa nlindi mu ikumbu tjitje,
33ne mavu e nkuku anon'zipila,
bathu bose banon'sala shule,
ne bakantungamila abana mbalo.
34Apa ngono mungandinyaladza nge zwithu zwisina nshingo?
Mu dabilo dzenyu akuna tjamusalila kuzhe kwe kusagalikabgwe koga!”
Kalanga Bible © Bible Society of Botswana, 2008, 2018.