Jobe 19
19
1Jobe kashandula eti,
2“Apa kowodza kukabe lini mundigongobola kene,
kakale mundikowobedza nge matama kene?
3Kwabe ka gumi makabhata mundituka,
apa amutobhakhwa nge shoni kunditanga kene?
4Ngono nenguba pamwe kuli lebeswa ndakatjinya,
nlandu wangu umu ndili ndoga.
5Ha nge malebeswa muzwikudza,
mushingisa kulengudzika kwangu kundibona nlandu,
6zibani ngono kuti Ndzimu ndiwo wanditanga,
wandibhatshila nge gwanga gwawo.
7Bonani, ndomimila nditi, ‘Ndatangiwa kaa!’ Akuna unonditeedza!
Ndolila ndishaka bhatsho koga akuna ndulamo.
8Wakazhalila zila yangu kuti ndisipinde,
ukabiga zhalima mu zila dzangu.
9Wakanditolela gudzo langu,
ukandiambula tjiala mu nsholo wangu.
10Unondipalulanya mbizho dzose, ndatjipelela,
ukadzikunula kugalabgwe kwangu se nti.
11Unothutidza bushongola gwawo mundili,
unonditola se tjita tjawo.
12Babhayani bawo banozwibumba
bakabaka matuluthulu kundipoteleka,
bakakomba nshasha wangu.
13“Wakandithubukanya ne zwikamu zwangu,
bandakawolobelana nabo banozwithama basingandizibe.
14Makamu angu bamile kule nami
bakwinya bangu batjindikangang'wa,
15bezi mu nzi wangu batjindikangang'wa,
balandakadzi bangu banonditola se nzhi,
ndatjibe ntaya ku bali.
16Nenguba ndidana nlanda wangu aatondidabila,
ne ndinkumbila dumbu nge wangu nlomo.
17Meya yangu inonuhwila nkadzi wangu,
bana ba mmeyangu bakati ndonuhwa.
18Ne bana batukununu banondilengudza,
anditi ndomilika banondiseka.
19Bose bakwinya bangu bakulu banondishima,
ibabo bandakabe ndida kwazo bakandifupatila.
20Mafupa angu akanamatilana ne ganda,
ndabuya pa tukununu koga.
21“Mundihwile zogwadza,
mundihwile zogwadza kaa bakwinya bangu!
Ngobe luboko gwe Ndzimu gwandiloba!
22Ini mundidziyidza se Ndzimu kene?
Apa kudziyidza nyama yangu kwenyu akuzogala kene?
23“Ekee, ungati matama angu angakwagwa!
Ekee, ungati angakwagwa mu bhuka!
24Ekee, ungati angakwagwa nge peni ye butale ne mu bgwe,
kuti akobolegwe mu bgwe ndizo agalile tjose!
25Ngobe ndoziba kuti Ndzutunuli wangu unotjila,
kowoti ku bupelo kama mu shango,
26nenguba ganda langu lapela sa ikoku,
koga mu mbili wangu iwoyu ndowobona Ndzimu.
27Ndiwo wandinowobona ku lubizho gwangu,
nge mesho angu ndowoubona kusi upoga.
Moyo wangu unoyemula ikoku.
Ndzimu unowomusumikilisa
28“Amuti, ‘Towon'sala shule kuti!’
Kakale kuti, ‘Budwilo gwe mang'oni ini
ne nlandu waakathama ndiupi?’
29Itjani thumo, imwi nge kwenyu,
ngobe bushongola gozhisa kulobgwa shamu nge thumo,
kuti muzibe kuti kuna kusumikilisa.”
Kalanga Bible © Bible Society of Botswana, 2008, 2018.