Jobe 16
16
1Jobe kashandula eti,
2“Ndakahwa zwithu zwinjinji zwinonga izwezwi,
mose banyaladzi ndimwi motjenamisa!
3Apa matama e phepo sa iyawa anowopela kene?
Kene ini tjinomusendedzela kuti mulebeleke?
4Namibo ndabe ndingatubula kulebeleka,
ha mabe muli mu tjimo tjangu.
Ndabe ndowomulukila matama zubuyanana,
ndimu zunguzila nsholo.
5Ndingabe ndimusimisa nge nlomo wangu,
nyaladzo yangu yabe yozhisa kutebama mu muli.
6“Nenguba ndilebeleka kugwadziwa kwangu akutotapudzika,
kakale ne ndinganyalala naiko akutotapudza zogwadza zwangu.
7Nge malebeswa wakanditolela matatabuko,
wakalobesa nsha wangu wose.
8Wakandisunga, zogwadza zwangu butendeki,
ndatjibe mafupa woga,
kwatjibe igo butendeki guno nyanyaidzana nami.
9Wakandipalulanya nge bushongola gwawo,
nge mesho mashaba, wakandilinga nge lubengo
kundilumanya nge meno,
tjita tjangu tjakandilinga ne mesho anopitsha.
10Bathu bakandiashamila,
banondipkhwaula mu lushaya, bendiseka mahanya
banozwishanganya kuti bandigwise.
11Ndzimu wakandilashila mu maboko e bakabipa meya,
kandiposela mu maboko e babi.
12Ndakabe ndili gele ndakaliga makumbo,
ukandibhata ne ntshibha, ukandipkhwanya,
asala ndili zwitibhutibhu.
Wakandithama tjilipo tjawo,
13Baposi bawo be misebe bakandipoteleka,
unondipubulanya so dzangu asina ngoni,
kapubula ndulu kaitebulila pasi.
14Unondipubula pubula ubgwilulula,
unondiwila se mbhayani.
15Ndatjithumila saka pezhugwi kwe ganda langu,
ndatjibe gele mu hwuluba ndisina matatabuko.
16Buso gwangu gwazwimba ngolila
hwope dzangu dzotjindilemela ngolila.
17Nenguba ndisina butjinyi mu maboko angu,
ne ntembezelo wangu mbuyanana.
18“Shango wee, usizwimbe malopa angu!
Usitongo wanila tjililo tjangu magalo ekunyaluluka.
19 #
Jobe 19:25
Na ngwenu kose ntendeki wangu ukudzimu,
ne mmilili wangu uku zhuzhugwi.
20Bakwinya bangu banondiseka,
mesho angu anotebulila mishodzi ku Ndzimu,
21kuti abhatilile ndulamo pakati kwe nthu ne Ndzimu,
se nthu ali n'gadzanyi egadzanya bakwinya babe.
22Ngoti mu makole asimuni anozha
ndowoyenda kwandisowoshanduka!
Kalanga Bible © Bible Society of Botswana, 2008, 2018.