Jobe 15
15
Ndebesano ye bubili
(15:1—21:34)
1Ipapo Elifazi we N'temani kashandula eti,
2“Apa nthu wakatjenjela ungadabila nge matama asina mongo kene?
Kene ezhadza ntumbu uwe ne phepo ye bhezhuba kene?
3Apa ungazwilebelekela nge matama asina nshingo,
kene nge ndebo dzisinga mbhatshe nge tjimwe kene?
4Koga auna hanya nge kutja Ndzimu,
unoyisa pasi kunamata mbeli kwe Ndzimu.
5Ngoti jinyo lilo ndilo linodiya nlomo tjawakafanila kutjileba
ngono ube ushalula lulimi guzhele butjebeli.
6Nlomo uwo ndiwo unokusumikilisa, kusi imi,
milomo iyo ndiyo inopa butendeki gunonyanyayidzana nawe.
7“Apa ndiwe nthu wekutanga kuzwagwa kene?
Kene wakabambiwa kutangila matuthu kene?
8Apa wakatongo teedza gumbuludzo le Ndzimu kene?
Apa wakazwibigila butjenjedu woga kene?
9Apa ini tjaunoziba tjatisinga zibe kene?
Una hwisiso ipi yatisinayo kene?
10Tina sholotjena na bokwegu pakati gwedu,
bahwola pana tate babo dumbu.
11Apa nyaladzo ye Ndzimu ishomanana mukuli,
matama mabuya aunobudziwa kene?
12Ini udzipiwa nge moyo zwingapa kene,
ne mesho awo ashanduka kabe mashaba zwingapa?
13Uthama kuti bushongola gugo ugulingisanye ne Ndzimu,
uletja matama akajali kabhuda mu nlomo uwo wali?
14 #
Jobe 25:4-6
“Dumbu nthu ini kwaangabe akatjenapala kene?
Iye wakazwagwa nge nkadzi ungabe nlulwami kene?
15Bonani! Ndzimu autogalabgwe bayengemali bawo,
ne kudzimu dumbu akuzotjenapala mu mesho awo.
16Bukulu seni iye kee, unoshimisa, wakabola nkumbulo,
iye unogungila bubi se vula kene?
17“Unditeedze ndikutjenesele,
ima ndikubudze tjandakabona,
18tjakalebgwa ne bathu bakatjenjela,
itjo bobatategulu babo tjabasakasumbika,
19ibo boga bakapiwa shango,
kusakatongobe ne madeluka akapinda pakati kwabo.
20Mazhuba awe wose mbiimbi unodziyidzika,
bukukutu gose mu makole wose wakagubigigwa.
21Misindo inopalusa moyo inohwika mu zebe dzidze,
mu kubhudilila ntoleli unowozha kan'wila.
22Aatoduma kuti ungapudzumuka mu zhalima,
wakalulwamisigwa thumo.
23Unoyenda yeno na yeno eshaka zojiwa, eti, ‘Zwingayi?’
Unoziba dumbu kuti zhuba le zhalima labe pejo zubuyanana mu luboko gugwe,
24mang'oni ne zogwadza zowondziyidza,
zonkulila sa mambo akazwilulwamisila kugwa!
25Ngobe wakamilidzila Ndzimu luboko
kalobela Masimbawose ifuba,
26etshambila Ndzimu nge bukomba
akabhata zwivikisi zwikodu zwakasima,
27ngobe wakazwimba buso gugwe nge mafuta awe
wakatjibhuda mitumbu ngo kola,
28unowogala mu matongo e mizi mikulu
ne ng'umba dzisina banogala mudzile,
ng'umba dzakamisigwa kube matuluthulu e magwada.
29Aatowofuma, fumwa iye aitowobhatilila,
ne thundu iye aitowowanda mu shango.
30Aanga pudzumuke mu zhalima
nthuto unowowomesa thabi dzidze,
nge mafemo e Ndzimu unowotolegwa kutjena.
31Ngaasizwitjengedze nge kugalabgwe tjisi tje tjimwe,
ngobe akuna tjinowombuyila.
32Kowoti tjibaka tjitje tjisathu tjaswika,
unowobe alipiwa mbhayilo uwo nge buzhalo,
ne lutabi gugwe agutowopasula.
33Unowoshashamuka mitjelo se nzhambi ushashamuka zhambi dzisakabidwa
unonga nti we zhambi washashamuka mitjelo.
34Ngobe goko le basingagalebgwe lowoshaya bana,
moto unowoja mishasha ya ibabo banoda tjizwimba nlomo.
35Banozwisenga mang'oni, bakazwala bubi,
mitumbu yabo inolulwamisila butjebeli.”
Kalanga Bible © Bible Society of Botswana, 2008, 2018.