Jobe 13
13
1“Ngayi? Mesho angu akabona kose ikoku
ne zebe dzangu dzakahwa dzikakuhwisisa.
2Tjamunoziba ndotjizibabo,
anditendili ntukununu mu muli.
3Koga ndowolebeleka ndakazwilingisanya na Masimbawose,
Ndoshaka kunyanyayidzana ne Ndzimu mu ndebo yangu.
4Ngono imwi mondidzinganyidza nge manyepkhwa,
mu ng'anga dzisidza tjimwe mose!
5Koga ha mabe munganyalala,
ndiko kungabe butjenjedu gwenyu!
6“Tjiteedzani ndebo yangu ndomukumbila,
tjibhulutanani tjinodwa mu nlomo wangu.
7Apa mowolebelekela Ndzimu zwisi izo?
Apa mungaulebelekela nge matama e butjebeli kene?
8Apa munga umilila kene?
Apa mungalebeleka ndebo ye Ndzimu muulebelekela kene?
9Apa kunga mululwamila wali ha unga mushakisisa kene?
Kene munga utjebela se munotjebela nthu wali?
10Nge malebeswa ungamutjemela,
ha muumilila nge kusakatambunuka.
11Apa bukulu gwawo agutomutjisa kene?
Apa kutjisa kwawo akutomuwila kene?
12Ndebeleko dzenyu makungulupeswa e hwuluba koga,
mbakililo dzenyu adzina mongo.
13“Nyalalani, nditongolebeleka,
andina hanya ne tjinga ndishingikalila.
14Ndozwilonga mu mbatsha,
alonga butjilo gwangu mu maboko angu.
15Bonani, nenguba ungandibulaya, anditjina kugalabgwe,
koga ndowozwilebelekela mbeli kwawo.
16Ikoku kowobe ilo jidzo langu,
ngoti akuna nthu we mbipo ungazha mbeli kukwe.
17Bhulutanani matama angu,
tjandinoleba ngatjingine mu zebe dzenyu.
18Bonani, ndalulwamisa ndebo yangu,
ndoziba kuti anditowobong'wa nlandu.
19Apa ndiani unga nyanyaidzana nami kene?
Ngoti aaliyapo ndowonyalala ngono ndikafa.
20“Mundithamile zwithu zwibili koga,
Ndizo anditowomubgwatila.
21Dusilani kutjena nami luboko gwenyu,
kutjisa kwenyu kusindipaluse moyo.
22Ndizo danani ndowodabila,
kene mundiletje ndilebeleke imwi mudabile.
23Ndakathama milandu mingana ne zwibi zwingana?
Mundizibise jinyo langu ne tjibi tjangu.
24“Ini mundisumbikila buso gwenyu?
Ini munditola se tjita tjenyu kene?
25Apa monditjisilani ndili zhani linotogwa nge phepo kene?
Apa mungashwa makatatana ne bunye gwakawoma kene?
26Mokwala zwithu zwakabipa nge kwangu,
mothama kuti ndimililane ne jinyo le butjetjana gwangu!
27 #
Jobe 33:11
Makasungilila makumbo angu mu mapangwana,
mogala makalingilila zila dzandinotola,
mukalonga lutjwayo mu zwitshitshino zwe matshambo angu.
28Ndoshashamuka se tjimwe tjakabola
se gandana lakajiwa ne ntjenje.
Kalanga Bible © Bible Society of Botswana, 2008, 2018.