Jeremiya 35
35
Bareka
1 #
2 Bomambo 23:36—24:6; 2 Zwiyitikalo 36:5-7 Dama lakazha kuna Jeremiya lidwa kuna Yahwe mu misi ya Jehoyakimu nkololo wa Josiya mambo we Juda liti, 2“Yenda ku nsha we Bareka ngono uswike ulebeleke nabo ngono ubazhise ku ng'umba ya Yahwe, ku mmwe we mimwe misha uswike ubapa nkumbi we zhambi kuti bang'we.” 3Ndizo ndakatola Jaazaniya nkololo wa Jeremiya, nkololo wa Habaziniya ne hama dzidze ne bakololo babe bose ne nsha wose we Bareka. 4Ndakabazhisa ku ng'umba ya Yahwe ku nsha we bakololo ba Hanani nkololo wa Igidaliya nlume we Ndzimu. Nsha wakabe uli pejo ne ng'umba ye makulukota yakabe ili pezhugwi kwe ya Maaseya nkololo wa Shalumu ntjengeti we nkoba. 5Ipapo abiga mapepe alizhele nkumbi we zhambi ne kopi mbeli kwe balume be nsha we Barekabi abadwa ndikati, “Ing'wani nkumbi we zhambi.”
6Koga bakashandula beti, “Atitong'wa nkumbi we zhambi ngoti batategulu bedu Jonadabu nkololo bakati laya beti, ‘Musitongofa mang'wa nkumbi we zhambi imwi ne bakololo benyu. 7Kakale musitongobaka ng'umba kene kuli kudzwala mbewu kene kulima mizhambi, musitongothuwa tjimwe tje zwithu izwezwi koga makafanila gala mu mishasha. Ndizo mowotjila lubaka gulefu mu shango yamuli bataya muili.’ 8Takateedza hwi la Jonadabi nkololo wa Rekabi tate bedu mu tjimwe ne tjimwe tjabakatidwa, kuti tising'we nkumbi we zhambi mu misi yedu, iswi ne bakadzi bedu ne bakololo bedu kene bakololokadzi bedu, 9ne kuti tisibake ng'umba kugala mudzili. Atina minda dze mizhambi kene minda kene mbewu, 10koga togala mu mishasha kakale takateedza tikathama kose kwatakadwiwa ndi Jonadabi tate bedu. 11Koga kwakati Nebukadineza mambo we Bhabhiloni wonginilila shango takati, ‘Buyani, ngatiyendeni ku Jerusalema titja babhayani be Bakhaladiya ne babhayani be Basiriya.’ Ndizo tiligele mu Jerusalema.”
12Ipapo dama la Yahwe likazha kuna Jeremiya liti, 13“Yahwe Masimbawose, Ndzimu we Iziraela bakati, ‘Yenda unodwa balume be Juda ne bagali be Jerusalema uti, “Apa amutoshaka kutjemegwa ne kuhwa matama angu kene?” Kojalo Yahwe. 14Nlayo wa Jonadabi nkololo wa Rekabi waakapa bakololo babe kuti basing'we nkumbi we zhambi wakalondolodziwa, na nasi kose abatong'wa, ngoti bakateedza ndaulo ya tate babo. Ndakalebeleka namwi ndisisithila koga amuzonditeedza. 15Ndakamutumila balanda bose bangu balebesambeli, ndibatumila ndakalonga meya mu nyama nditi, “Mmwe ne mmwe wenyu ngaashandukile zila iye mbimbi ngono alulwamise zwiyito zwizwe, musitobele midzimu ipoga kuishingila, ngono ndizo mowogala mu shango yandakapa bobatategulu benyu.” Koga amuzobhulutana kene kuli kunditeedza. 16Zwizekugwana zwa Jonadabi nkololo wa Rekabi zwakashingikadza ndaulo ya zwakapiwa ndi bobatategulu bazo, koga bathu ibaba abazonditeedza.’
17“Ndizoke Yahwe Ndzimu Masimbawose, Ndzimu we Iziraela bakati, ‘Bonani, ndozhisila Juda ne bagali bose be Jerusalema bubi gose gwandakaleba ndigulingisanya nabo, ngoti ndakalebeleka nabo abazoteedza, ndakabadana ngono abazodabila.’ ”
18Koga ku nsha we Bareka Jeremiya kabe eti, “Yahwe Masimbawose, Ndzimu we Iziraela bakati, ‘Ngoti makalondolodza ndaulo ya Jonadabi tate benyu mukatobela ndayo dzidze dzose mukathama tjimwe ne tjimwe tjaakamudwa, 19ndizoke Yahwe Masimbawose, Ndzimu we Iziraela bakati, “Jonadabi nkololo wa Rekabi aatowofa ashaya nthu we lutshinga gugwe unowondishingila.” ’ ”
Kalanga Bible © Bible Society of Botswana, 2008, 2018.