Jeremiya 34
34
Jenjedzo kuna Zedekiya
1 #
2 Bomambo 25:1-11; 2 Zwiyitikalo 36:17-21 Dama lakazha kuna Jeremiya lidwa kuna Yahwe, tjibaka Nebukadineza mambo we Bhabhiloni ne ngwa iye yose ne mibuso yose mu shango yakabe ili pasi kukwe ne bathu bose bakabe begwa ne Jerusalema ne mizi yayo yose lakazha liti, 2“Yahwe Ndzimu we Iziraela bakati yenda unolebeleka na Zedekiya mambo we Juda uti, Yahwe banolebeleka bakati, ‘Bona ndolonga nzi nkulu iwoyu mu luboko gwe mambo we Bhabhiloni ngono unowoupisa nge moto. 3Autosiya mu luboko gugwe nge malebeswa unowotapiwa ukalongwa mu luboko gugwe, unowobona mambo we Bhabhiloni makalingisana ku mesho ngono unowotolegwa ku Bhabhiloni.’ 4Koga ihwa dama la Yahwe iwe Zedekiya mambo we Juda! Yahwe bakati nge kuko, ‘Autobulawa nge thumo! 5Unowofa lubuya. Koga sekwa zwipayisi zwakapisigwa bobatategulu babo, bomambo bekutanga bakazha mbeli kuko ne bathu banowokupisilabo zwipayisi bakakulila beti, “Yee mme wee imwi tetshi!” Ngoti ndaleba dama ilele,’ kojalo Yahwe.”
6Ipapo Jeremiya nlebesambeli kaleba matama wose iyawa kuna Zedekiya mambo we Juda mu Jerusalema, 7tjibaka ngwa ya mambo we Bhabhiloni yakabe ibhayana ne Jerusalema nenge mizi yose ye Juda yakabeyasala, mizi ye Lakhishi ne Azeka, ngoti ndiyo mizi koga ye matizhilo e Juda yakabeyasala.
Kusunungugwa kwe balanda
8Dama lakazha kuna Jeremiya lidwa kuna Yahwe, Zedekiya asinothama tjidumano ne bathu bose mu Jerusalema kuti kulebgwe kuti kusunungugwe balanda, 9kuti mmwe ne mmwe asunungule nlada uwe we Nhebheru ali we tjilume kene we tjikadzi kuti kushete walonga hama iye ye N'juta mu busungwa. 10Ndizo makulukota wose ne bathu bakadumana nge tjidumano itjetji bakaduma kuti banowosunungula balume ne bakadzi be balanda bakasitjibalonge mu busungwa, bakaduma ngono bakabasunungula. 11Ngono ngwenu kukati shule bakashanduka bakatola balanda be tjilume ne tjikadzi babakabe basunungula ngono bakabathama basungwa kakale.
12Ipapo dama la Yahwe likazha kuna Jeremiya lidwa kuna Yahwe liti, 13“Yahwe Ndzimu we Iziraela bakati, ‘Ndakathama tjidumano na bobatategulu babo tjibaka tjandakabadusa mu shango ye Egipiti mu ng'umba ye busungwa nditi, 14#Kufuluka 21:2; Matama 15:12“Mu gole limwe ne limwe le butendeka mmwe ne mmwe wenyu wakafanila sunungula Nhebheru naye waakatengesegwa ngono akakushingila bulanda makole ali matathatu, wakafanila kuti unsunungule mu kukushingila kukwe.” ’ Koga bobatategulu benyu abazonditeedza kene kuli kundibhulutana. 15Ngono imwi mabe mashanduka mathama tjakalulwama mbeli kwangu ngoleba kuti kusunungugwe balanda, mmwe ne mmwe kuna wa kanyi kwabo. Makathama tjidumano mbeli kwangu mu ng'umba inodang'wa nge zina langu. 16Koga kudwapo mube mupituka muzhadza shambgwa zina langu tjibaka mmwe ne mmwe wenyu awotjitola balanda babe be tjilume ne be tjikadzi bamakabe masunungulila kuyenda kwa banoshaka. Makabakombeledza kuti babe balanda kakale.”
17Ndizo Yahwe bakati, “Amuzondibhulutana, amuzoleba sununguko ku hama dzenyu. Ndizoke ngwenu ndoleba sununguko. Sununguko ye kuti mupiwe thumo ne bugwele ne bhamba kojalo Yahwe. Ndowokuthama tjithu tjinopalusa moyo ku mibuso yose ye shango. 18Balume bakatjinya tjidumano tjangu bakasilondolodze milawana ye tjidumano tjabakathama mbeli kwangu, ndowothama se phulu yabakathubukanya kabili ngono bakayenda pakati kwe makwamu atjo mabili. 19Batungamili be Juda ne Jerusalema ne bashingi be misha ne bapirisiti ne bathu bose mu shango banoyenda bakapalama pakati kwe phulu, 20ndowobalonga mu luboko gwe zwita zwabo izo zwinoshaka kubabulaya. Zwitumbu zwabo zowobe zojiwa zwe nyuni dze phepo ne phuka dze shango.
21“Ndowolonga Zedekiya mambo we Juda ne makulukota awe mu luboko gwe tjita tjabo ne mu maboko aibabo banoshaka kubabulaya ne mu luboko gwe ngwa ya mambo we Bhabhiloni iyo yakazwilulwamisa ngono bakamuletja. 22Bonani ndowodusa ndaulo kojalo Yahwe ngono ndowobabgwiliza mu nzi nkulu iwoyu. Banowogwa nawo bakautola bakaupisa nge moto. Ndowothama mizi mikulu ye Juda kuti ibe matongo asina n'gali.”
Kalanga Bible © Bible Society of Botswana, 2008, 2018.