Basumikilisi 14
14
Samisoni ne nkadzi we Timina
1Kwakati limwe zhuba Samisoni kayenda ku Timina ngono kabona mwanadi we N'filisitiya. 2Wakati eshanduka kabudza tate babe na mme babe kati, “Ndabona mmwe nkololokadzi we Bafilisitiya mu Timina, ngono ngwenu mundishakile iye kube nkadzi wangu.” 3Koga tate babe na mme babe bakanshandula beti, “Apa akuna mwanadi mu bathu bakanyi kwenyu kene pakati kwe bathu bedu bose, kwaungadza ukanotola nkadzi ku Bafilisitiya basakathumbigwa kene?” Koga Samisoni kadwa tate babe kati, “Mundishakile iye, ndiye unondishathisa.”
4Tate babe na mmebabe bakabe basinga zibe kuti kwakabe kudwa kuna Yahwe, ngobe bakabeshaka zila yekugwa ne Bafilisitiya. Mu tjibaka itjetjo Bafilisitiya bakabe bebusa Baiziraela.
5Samisoni kadelukila ku Timina ana tate babe na mme babe, bakati batjilinga minda dze mizhambi dze Timina, tjinyolotjo kukabhuda shumbana i bomba izha kunli. 6Meya ya Yahwe ikazha munli nge masimba kwaakapalulanya shumba koga se unopalulanya tjibudzana, ngono asakabhata tjimwe mu maboko. Koga kasibudze tate babe kene mmebabe tjaathama. 7Ngono kayenda kanolebeleka ne nkadzi, ngono nkadzi kashathisa Samisoni kwazo.
8Kwakati shule kwe mazhuba ebgwilila enotola nkadzi, wakatendebuka kanolinga itumbu tje shumba, ngono bona, kukabe kuna nlunda we nyutji mu itumbu ne butji. 9Kamola nge maboko awe, kayenda eja mu zila, kanoswika kuna tate babe na mme babe ngono kabapabo dzimwe bakaja. Koga kasibabudze kuti watola butji mu itumbu tje shumba. 10Kwakati tate babe beswika ku nkadzi iwoyo, Samisoni kathama nzano ikweno ngoti kwakabekuli nja we bazhuzha. 11Kwakati bathu bembona bakanzhisila thaka dzidze dzili makumi matatu (30) kubenaye. 12Ngono Samisoni kabadwa kati, “Imani ndimu lipe, apa mungadibudza dabilo mu mazhuba ali tendeka e nzano, ndowomupa zwihempe zwili makumi matatu (30) ne zwiambalo zwakanaka zwili makumi matatu (30). 13Koga apa mungakong'wa ne kundidabila, mowondipa zwihempe zwili makumi matatu (30) ne zwiambalo zwakanaka zwili makumi matatu (30).” Ngono bakandwa bakati, “Leba libha lilo tilihwe.” 14Kababudza ilo kati,
“Mu nji kwakabuda zojiwa.
Muna wakasima, kukabuda butji.”
15Kwakati mu zhuba le bunna bakadwa nkadzi wa Samisoni beti, “Tjengela nlume uwo ati tjenesele libha kuti lodwani, kusakajalo tomupisa iwe ne be nsha wa tate babo. Apa matikokela kuwotilonga bushayi kene?” 16Ngono nkadzi wa Samisoni kalila mbeli kukwe eti, “Unondishima, autondida. Walibha bathu bakanyi kwedu ngono auzondibudza dabilo.” Ngono kandabila eti, “Bona, andizobudza tate kene mme, apa ndibudze iwe kene?” 17Kalila mazhuba wose ali kutendeka e nzano, kwakati mu zhuba le butendeka kambudza, ngobe wakabe atjinlonga hapa na hapa. Ngono nkadzi kanotjenesela balume bakanyikukwe. 18Zhuba lakati lisathu lamila mu zhuba le butendeka, balume be nzi bakandwa bakati,
“Ini tjinozipa kupinda butji gwe nyutji kene?
Ini tjakasima kupinda shumba kene?”
Ngono kabashandula eti, “Ha mungabe musalima ne gondolo langu, mungabe musatjenesa libha langu.”
19Ngono Meya ya Yahwe ikazha munli nge simba, kayenda ku Ashikiloni, kabulaya balume bali makumi matatu (30) mu nzi, katola thundu dzabo, kapa balume batjenesa libha zwiambalo zwakanaka. Kabgwilila ku ng'umba ya tate babe nge bushongola gunothuta. 20Nkadzi wa Samisoni kapiwa nzwalani uwe, iye wakabe ali ntjengeti uwe pa ndobolo iye.
Currently Selected:
Basumikilisi 14: KBTP
Highlight
Copy
Compare
Share
Want to have your highlights saved across all your devices? Sign up or sign in
Kalanga Bible © Bible Society of Botswana, 2008, 2018.
