Isaya 65
65
Kusumikilisa ne jidzo
1 #
Baroma 10:20
Ndakathama kuti ndizibgwe nge bathu bakabe basingandishake,
ndakawang'wa ndi ibabo basakatongo bhuzwa nge kwangu.
Ku itjaba tjisakatongo dana zina langu,
ndakati, “Ndipano! Ndipano!”
2 #
Baroma 10:21
Ndakashwa ndakatambunudza maboko angu zhuba lose
kuamutjila bapanduki,
banoyenda mu zila dzisaka naka belawugwa nge mikumbulo yabo,
3bathu bakadwilila nge kunditanga bakalingisana nami,
banodusa zwibhayilo mu minda,
bepisa motsha mu zwibeso zwakathamiwa nge zwitina,
4banogala pakati kwe zwikumbu,
bepitsha busiku bali mu magalo akasumbikala,
banoja nyama ye hwotji
ne ntubgwi we nyama dzakatemapala
mu zwija zwabo.
5“Gala kutjena, usisedzele kundili,
ngoti ndakayengemala kupinda iwe.”
Ibaba bathu busi gunongina mu zwimilo zwangu,
moto unotshwa zhuba lose.
6Bonani, kwakakwagwa mbeli kwangu kukayi,
“Anditowoletja kwakajalo koga, ndowobgwilizila,
e ndowobabgwilizila mu zwifuba zwabo,
7ngekwe zwibi zwabo ne zwabo tate babo, koleba Yahwe.
Ngoti bakapisa zwibhayilo pezhugwi kwe matombo,
ngono bakandituka pezhugwi kwe matuthu,
ndowolizanyidzila mu zwifuba zwabo
mbhayilo uzhele ngekwe mishingo yabo ye kutanga.”
8Yahwe bakati,
“Nkumbi se uli mu mitjelo,
ngono bathu beti, ‘Musiutjinye,
ngoti kuna makombolelo muuli,’
nditjo tjandinowothamila balanda bangu,
anditowobalobesa bose.
9Ndowowanisa Jakubo bana,
na Juda ndowon'wanisa bana,
banowothuwa matombo angu,
bashalugwa bangu banowoathuwa,
ibo balanda bangu banowogala ikoko.
10 #
Joshuwa 7:24-26
Sharoni inowobe mafulilo e ngubi,
Nkuku wa Akhori unowobe mabuthilo e matanga
e ng'ombe dze bathu bangu bakandishaka.
11“Koga imwi munofupatila Yahwe,
imwi munokangang'wa dombo langu lakayengemala,
imwi munoteyela tafuli ndzimu wenyu we phazha,
mukazhadza mapepe nge nkumbi wakashanganyiwa muuthamila ndzimu wenyu we bhelelo,
12ndowothama kuti bhelelo lenyu libe nge thumo,
ngono mose mowokotamila mbulayi,
ngoti ndakati ndidana mukasidabile,
ati ndilebeleka mukasihwilile koga mukashinga zwakabipa mu mesho angu mukashalula tjisingandishathise.”
13Ndizo wali She Yahwe bakati,
“Bonani, balanda bangu banowoja,
koga imwi mowofa nge zhala,
banowong'wa, koga imwi mowofa nge nyota,
balanda bangu banowoshatha,
koga imwi mowobhakhwa nge shoni.
14Balanda bangu banowomba nge kushatha kwe moyo,
koga imwi mowolila nge kuhwa zogwadza mu moyo,
mowokuwa nge zogwadza mu meya.
15Zina lenyu mowolisiyila bashalugwa bangu kulishingisa se bhiso,
ngono She Yahwe banomubulaya,
koga balanda babo banowobapa zina lipoga.
16Iye ungabe ekumbila makombolelo mu shango
ngaakumbile ku Ndzimu we lebeswa,
naiye unothama tjidumano mu shango
ngaatune nge Ndzimu we lebeswa,
ngoti zwakadziyidza mu misi yakapinda zowokanganika
zwikasumbikigwa mesho angu.
Kudzimu kutshwa ne shango tshwa
17 #
Isaya 66:22; 2 Pita 3:13; Zumbunulo 21:1 “Bonani, ndowobumba kudzimu kutshwa ne shango tshwa.
Zwithu zwe kutanga azwitowokumbugwa,
naiko azwingatongozha mu nkumbulo.
18Koga pululudzani mu shathe nge kusingapele
muna tjandinobumba,
ngoti ndowothama Jerusalema ikabe kushatha,
ne bathu bayo bakabe kupembela.
19 #
Zumbunulo 21:4
Ndowoshathila Jerusalema
ngono ashathisiwa nge bathu bangu,
zhoba ye kukuwa nekulila
ayitowohwika kakale.
20“Muuli akutjawobe
ne lushabana gunowotjila mazhuba mashomanana,
kene nthu nkulukulu akuna unowofa asawidza mazhuba awe e butjilo,
iye unowofa ana makole ali zana kowotogwa afa ali ntjetjana,
iye usatubula kutjila makole ali zana
unowotogwa ana bhiso.
21Banowobaka ng'umba bakagala mudzili,
banowolima minda ye mitjelo bakaja mitjelo yayo.
22Abatowobaka ng'umba dzibe dzigagwa nge bamwe, abatowolima kube kuzha kuja upoga.
Mazhuba e butjilo gwe bathu bangu anowolizana ne mazhuba e nti,
bathu bangu banowoshathila mishingo ye maboko abo tjibaka tjilefu.
23Abatowoshinga beshingila suli, bana babo abatowowigwa nge mbatsha,
ngoti banowobe bathu bakakombolegwa ndi Yahwe,
bose ne bana babo.
24Ndowobadabila basathu bakandidana,
banowoti batjalebeleka abe ndahwa kale.
25 #
Isaya 11:6-9
Phele ne pkhwizana zowojila pathu pang'ompela,
shumba iyo inowoja bushwa se ngabe, koga zojiwa zwe nyoka inowobe hwuluba.
Azwitowokubadza tjimwe kene zwikatjinya tjimwe
mu dombo langu lose lakayengemala.”
Koleba Yahwe.
Kalanga Bible © Bible Society of Botswana, 2008, 2018.