Isaya 64
64
1Ungati mungapalula kudzimu mukadelukila pasi,
kuyita kuti matombo ateteme pamulipo
2kufanane ne moto upisa hwunyana ube uthama kuti vula ipa moto ibile,
delukilani pasi muthame zina lenyu kuti lizibgwe nge zwita zwenyu
ngono kuthame zwitjaba zwiteteme mbeli kwenyu.
3Pamakashinga mishingo inokaabadza yatakabe tisakakumbula,
makadelukila pasi ngono matombo katetema mbeli kwenyu.
4 #
1 Bakorinta 2:9
Kudwila ntolo akuna wakatongohwa ngekwe Ndzimu unonga imwi,
akuna wakatongobona Ndzimu kuzhe kwenyu,
unoshingila ibabo banoulindila.
5Mozwishanganya naibabo banoshathila tjakalulwama,
banokumbula zila dzenyu.
Bonani, makagwadza moyo ngoti iswi tadwilila titjinya,
takatjinya tjibaka tjilefulefu ngono tingatjidziwa tjini?
6Tose koga tonga nthu usakatjenapala,
ne mishingo yedu yose yakanaka inonga gandana lina shambgwa,
tose toswaba se zhani, ne zwibi zwedu zonga phepo zotiwulusila kutjena.
7Akuna unodana zina lenyu, kene kuli kugwisa kuzwibhatilila namwi,
ngoti makatisumbikila buso gwenyu mukathama kuti tishakale ngekwe zwibi zwedu.
8Kana Yahwe imwi mu Tate bedu. Iswi ti ntapkhwi, imwi mu mbumbi,
iswi tose takathamwa nge maboko enyu.
9Musigwadze moyo kwakapindilila imwi Yahwe,
musitibalile zwibi zwedu nge kusingapele.
Bonani, iswi tose ti bathu benyu mutihwile ngoni.
10Mizi yenyu yakayengemala yabe tjilambanyika,
Ziyoni yabe tjilambanyika, nzi we Jerusalema wakathukudzika.
11Ng'umba yedu mbuya yakayengemala,
botate bedu yabakabe be mukudzila muili yakapisiwa nge moto,
ne magalo edu wose akabe edika abe matongo.
12Yahwe apa mungadwilila mutifupatila shule kwaikoku kose kene?
Apa munganyalala mukatiloba shamu inolema kwatisingake tikamilana nako kene?
Kalanga Bible © Bible Society of Botswana, 2008, 2018.