Isaya 60
60
Gudzo le Ziyoni
1Milikani, penyani, ngoti tjedza tjenyu tjazha,
ne gudzo la Yahwe lamuyedzela.
2Bonani, zhalima lakaambadza shango,
zhalima gulu lakafukidza bathu,
koga Yahwe bamuyedzela ne,
gudzo labo lowoboneka mu muli.
3Zwitjaba zowozha ku tjedza tjenyu,
na bomambo banowozha ku kupenya kwe kuyedza kwenyu.
4Milidzani mesho mulinge kumupoteleka,
bose banokubungana bezha kumuli,
bakololo benyu banowozha bedwa kule,
ne bakololokadzi benyu banowogugiwa mu maboko.
5Ipapo mowobona ngono mowopenya,
mimoyo yenyu inowotjuluka nge kushatha,
fumwa dzinodwa ku makungwa dzowozhisiwa ku muli,
ne fumwa dze zwitjaba dzowozhisiwa kumuli.
6Kamela njinji dzowozhala shango yenyu,
kamela tjetjana dze Midiyani ne Efa.
Dzose dzinodwa ku Sheba dzose dzowobuya,
dzizhisa golide ne motsha,
ne leba kukudziwa kwa Yahwe.
7Ngubi dzose dze Kedari dzowokubunganyigwa kumuli,
nyundo dze Nebayoti dzowomushingila,
dzowoamutjilika se zwibhayilo mu tjibeso tjangu tje tjinopisigwa zwibhayilo,
ngono ndowokudza ng'umba yangu inokudzika.
8Ibaba ndiboani banowuluka se makole,
banowuluka se njiba dziyenda ku mashaka adzo?
9Nge lebeswa, shango dzimu tjekelo dze gungwa dzowolinga kundili,
kowotanga zwikepe zwe Tashishi,
zwizhisa bakololo benyu kudwa kule,
banowozha bana siliva ne golide,
kukudza zina la Yahwe Ndzimu wenyu,
Wakayengemala we Iziraela,
ngoti bakamuambadza gudzo.
10Bataya banowomusa makuma enyu,
bomambo babo ibo banowomushingila.
Nenguba ndakati ndagwadzamoyo amuloba,
koga nge ludo gwangu ndakamuhwila ngoni.
11 #
Zumbunulo 21:25, 26 Mikoba yenyu inowogala yakazhuka,
siku ne sikati ayitowozhaligwa,
kuita kuti zwitjaba zwimuzhisile fumwa yazo
na bomambo bazo bakalongoloka.
12Ngoti itjaba kene bumambo gusingawomushingila gowoloba,
gowokolomodziwa tjose.
13Gudzo le Lebanoni lowozha kumuli,
miti ye misipuri ne pulane ne phaine
inowozha kunakisa pagele bugalo gwangu gwakayengemala,
ngono ndowokudza pandinobiga makumbo angu.
14 #
Zumbunulo 3:9
Bakololo be batshambilidzi benyu banowozha bemuthigamila,
bose banomulingila pasi banowomuthigamila pa makumbo enyu,
ngono banomudana beti Nzi nkulu wa Yahwe,
Ziyoni we Wakayengemala we Iziraela.
15Nenguba makatongoti mukasiiwa mukabengiwa,
kusina unopinda ne pamuli,
ndowomukudza nge kusingapele,
mukawana kushatha mu zwizekugwana zwenyu zose.
16Mowomwa nkaka we zwitjaba,
mowomwisiwa mu mazhamu e bumambo.
Ngono ipapo mowoziba kuti imi Yahwe,
ndimi Ntjidzi wenyu,
Ndzutunuli wenyu Wakasima wa Jakubo.
17Mubumo gwe phangula ndowomuzhisila golide,
pana butale ndowozhisa siliva,
mubumo gwe hwuni ndowozhisa phangula,
mubumo gwe mabgwe ndowozhisa butale.
Ndowothama kunyalala kukabe mbusi wenyu
ne ndulamo ikabe nlauli wenyu.
18Phipiti ayitjowofa yahwika kakale mu shango yenyu,
kene jinyo ne golomodzo azwitowohwika mu midzibo iyo,
koga mowodana makuma enyu muti Jidzo,
ne mikoba yenyu muti Kukudza.
19 #
Zumbunulo 21:23; 22:5 Zhuba alitjowobe tjedza tjenyu masikati,
ne mwedzi awutjowomupenyela,
koga Yahwe banowobe tjedza tjenyu nge kusingapele kose,
Ndzimu wenyu unowobe gudzo lenyu.
20Zhuba lenyu alitjawoshwa kakale,
ne mwedzi awutjahwongina kakale,
Yahwe banowobe tjedza tjenyu nge kusingapele kose,
ne mazhuba enyu e buyendasi anowopela.
21Bose bathu benyu banowobe bathu bakalulwama,
ngono banowothuwa shango nge kusingapele.
Ba ndzi wandakadzikila imi unothinila,
nshingo we maboko angu, kulakidza gudzo langu.
22Ntukununu tjose wenyu unowobe itjaba,
unowobe itjaba tjikulu.
Ndimi Yahwe,
ndowokushingikadza nge kulibilidza mu nsi wako.
Kalanga Bible © Bible Society of Botswana, 2008, 2018.