Popular Bible Verses from Isaya 60

Milikani, penyani, ngoti tjedza tjenyu tjazha, ne gudzo la Yahwe lamuyedzela.

Zwitjaba zowozha ku tjedza tjenyu, na bomambo banowozha ku kupenya kwe kuyedza kwenyu.

Bonani, zhalima lakaambadza shango, zhalima gulu lakafukidza bathu, koga Yahwe bamuyedzela ne, gudzo labo lowoboneka mu muli.

Ntukununu tjose wenyu unowobe itjaba, unowobe itjaba tjikulu. Ndimi Yahwe, ndowokushingikadza nge kulibilidza mu nsi wako.

Zhuba alitjowobe tjedza tjenyu masikati, ne mwedzi awutjowomupenyela, koga Yahwe banowobe tjedza tjenyu nge kusingapele kose, Ndzimu wenyu unowobe gudzo lenyu.

Zhuba lenyu alitjawoshwa kakale, ne mwedzi awutjahwongina kakale, Yahwe banowobe tjedza tjenyu nge kusingapele kose, ne mazhuba enyu e buyendasi anowopela.

Ipapo mowobona ngono mowopenya, mimoyo yenyu inowotjuluka nge kushatha, fumwa dzinodwa ku makungwa dzowozhisiwa ku muli, ne fumwa dze zwitjaba dzowozhisiwa kumuli.

Milidzani mesho mulinge kumupoteleka, bose banokubungana bezha kumuli, bakololo benyu banowozha bedwa kule, ne bakololokadzi benyu banowogugiwa mu maboko.

Bose bathu benyu banowobe bathu bakalulwama, ngono banowothuwa shango nge kusingapele. Ba ndzi wandakadzikila imi unothinila, nshingo we maboko angu, kulakidza gudzo langu.

Phipiti ayitjowofa yahwika kakale mu shango yenyu, kene jinyo ne golomodzo azwitowohwika mu midzibo iyo, koga mowodana makuma enyu muti Jidzo, ne mikoba yenyu muti Kukudza.

Mikoba yenyu inowogala yakazhuka, siku ne sikati ayitowozhaligwa, kuita kuti zwitjaba zwimuzhisile fumwa yazo na bomambo bazo bakalongoloka.

Kamela njinji dzowozhala shango yenyu, kamela tjetjana dze Midiyani ne Efa. Dzose dzinodwa ku Sheba dzose dzowobuya, dzizhisa golide ne motsha, ne leba kukudziwa kwa Yahwe.

Bataya banowomusa makuma enyu, bomambo babo ibo banowomushingila. Nenguba ndakati ndagwadzamoyo amuloba, koga nge ludo gwangu ndakamuhwila ngoni.

Nenguba makatongoti mukasiiwa mukabengiwa, kusina unopinda ne pamuli, ndowomukudza nge kusingapele, mukawana kushatha mu zwizekugwana zwenyu zose.

Mowomwa nkaka we zwitjaba, mowomwisiwa mu mazhamu e bumambo. Ngono ipapo mowoziba kuti imi Yahwe, ndimi Ntjidzi wenyu, Ndzutunuli wenyu Wakasima wa Jakubo.