Isaya 51
51
Matama anonyaladza Jerusalema
1“Mundihwilile imwi banotatamila ndulamo,
imwi munoshaka Yahwe.
Lingani ku shongwe yamakwamugwa mu yili,
ne ku gomba lamakatshiwa mu lili.
2Lingani kuna Abhurahama tate benyu
ne kuna Sara wakamuzwala.
Pandakan'dana wakabe ali nng'ompela koga
ngono ankombolela an'wanisa bana banjinji.
3Zwakwako Yahwe banowonyaladza Ziyoni,
banowonyaladza matongo ayo wose,
ngono banowothama tjilambanyika tjayo tjikanga Edeni,
tjilambanyika tjayo tjikanga nnda wa Yahwe.
Kushatha ne mpululu zowowang'wa muili,
mboko ne njimbo kowohwika muili.
4“Mundihwilile bathu bangu,
munditeedze itjaba tjangu,
ngoti nlayo unowobhuda mundili,
ne kutambunuka kwangu kube tjedza tje bathu.
5Kusunungula kwangu kosedzela pejo kulibilidza,
jidzo langu limu zila laswika, ngono ndowobusa njudzi.
Shango dze tjekelo dze gungwa dzakandilindila,
nge kugalabgwe mu simba langu.
6Milidzani mesho mulinge kudzimu zhuzhugwi,
kakale mulinge mu shango pasi,
kudzimu kowopela se busi,
shango inowoshakala se tjiambalo
bagali bayo banowofa se thuzi,
koga jidzo langu lowogala nge kusingapele,
ndulamo yangu ayingapele.
7“Mundihwilile imwi banoziba ndulamo,
imwi bathu bana nlayo wangu mu mimoyo yenyu,
musitje kutukwa nge bathu,
musipaluke moyo ha bemugongobola.
8Ngoti sole dzowobaja se dzinoja tjiambalo,
zwithusi zowobabhatsha se zwinothusa hwuni,
koga kusunungula kwangu kowogalila tjose,
ne jidzo langu loyenda nge zwizekugwana zose.”
9Milikani, milikani muzwiambadze kusima,
imwi luboko gwa Yahwe,
milikani se mu mazhuba akapinda,
se mu zwizekugwana zwantolo.
Apa ate imwi makathubulila Rahabi zwitibhutibhu,
ate imwi makabhaya bhophona kene?
10Apa ate imwi makapkhwisa gungwa,
mupkhwisa vula dzakangina,
muthama kuti gungwa gwakangina gube ne zila
kuti bakadzutunugwa batjuluke kene?
11Badzutunugwa ba Yahwe
banowoshanduka bakabuya ku Ziyoni
nge njimbo dze kushatha,
kushatha kusingame kowobe mubali,
banowobe ne kupembela ne kushatha,
buyendasi ne tjililo zowotizhila kutjena.
12Imi, ndimi iye unomunyaladza.
Iwe ndiwe ani unotja nthu iye unofa,
nkololo we nthu unotjila bufutshwanana se bushwa?
13Makakangang'wa Yahwe Mbumbi wenyu,
iye wakatambunudza kudzimu,
kateya thiwa dze shango.
Modwilila mutja zhuba lose,
muikhwa nge bushongola gwe ntshambilidzi,
ha ezwilulwamisila kukolomodza.
Koga gungayi bushongola gwe ntshambilidzi?
14Nsungwa unowosunungugwa tjinyolotjo,
aangafe kangina mu gomba
ne zojiwa aangazwishete.
15Kana ndimi Yahwe Ndzimu wenyu,
imi ndinoti adzonga gungwa kuti mapundu e vula yalo awone, zina Yahwe Masimbawose ndilo zina lawo.
16Ndakalonga dama langu mu nlomo uwo,
akusumbika mu nthutshi we tjiazha tjangu,
atambunudza kudzimu
ateya thiwa dze shango,
ngono ndoti ku Ziyoni, “Imwi mu bathu bangu.”
Bhelelo le kudziyila kwe Jerusalema
17 #
Zumbunulo 14:10; 16:19 Muka! Muka!
Ima nge makumbo iwe Jerusalema,
iwe wakang'wa mu luboko gwa Yahwe
mu bhepe le bushongola gwabo,
wakang'wa ukakunika madzongwe
anotshatsharikisa mu bhepe.
18Akuna unontungamila,
pakati kwe bakololo bose baakazwala,
akuna ungankweba nge luboko
pakati kwe bakololo bose baakalela.
19Zwithu izwezwi zwibili zwakakuwila,
ndiani unowolila nawe?
Kuthukudzika ne golomodzo, bhamba ne thumo,
ndiani unowokunyaladza?
20Bana babo bakatimbama,
balele mu n'dzibo mmwe ne mmwe we zila,
banonga ngolomu yabhakhwa nge dati,
bushongola gwa Yahwe gumu bali,
ne kutjemela kwe Ndzimu uwo.
21Ndizo wali hwilila woku, iwe wakakubadziwa,
iwe wakalaladza, koga kusi nge nkumbi we zhambi.
22Yahwe Ndzimu uwo ibo banogwila bathu bawo bakati,
“Bona, ndadusa mu luboko gugo
bhepe lina tjinotshatsharikisa,
amutjowong'wa kakale
mu bhepe le bushongola gwangu.
23Ngono ndowoyilonga mu maboko e badziyidzi babo
ibaba bakakudwa bakati,
‘Lala pasi ndizo tiyende pezhugwi kuko,’
ngono ukathama nshongoshongo uwo ukanga pasi,
ukanga zila kuti bayende pezhugwi.”
Kalanga Bible © Bible Society of Botswana, 2008, 2018.